దేశంలో మహా ఉద్ధృతంగా కరోనా.. శుక్రవారం ఏకంగా 23,500కిపైగా కేసులు

దేశంలో వ్యాప్తి మహా ఉద్ధృతంగా ఉంది. రెండు రోజుల కిందటి వరకు సగటున 19వేలు కేసులు నమోదు కాగా.. ప్రస్తుతం ఆ సంఖ్య 20వేలను దాటేసింది. శుక్రవారం ఏకంగా 23వేలకుపైగా కొత్త కేసులు నమోదయ్యాయి. కేవలం రెండు రోజుల్లో కరోనా కేసులు 45వేలుగా నమోదుకావడం దేశంలో మహమ్మారి విజృంభణకు అద్దం పడుతోంది. అలాగే, దేశవ్యాప్తంగా మరో 446 మంది కరోనాతో చనిపోయారు. దీంతో దేశవ్యాప్తంగా కరోనా వైరస్ కేసుల సంఖ్య 649,708కి చేరగా.. మరణాల సంఖ్య 18,667కి చేరింది. అయితే, కరోనా బాధితుల రికవరీ రేటు మాత్రం ఎక్కువగా ఉండటం సానుకూలంశం. రికవరీ రేటు 60 శాతం ఉండగా.. ఇప్పటి వరకూ కరోనా నుంచి 3.95 లక్షల మంది కోలుకోగా.. 2.36 లక్షల మంది వివిధ ఆస్పత్రులు, కోవిడ్ కేంద్రాల్లో చికిత్స పొందుతున్నారు. శుక్రవారం దేశవ్యాప్తంగా 23,500 మందికి వైరస్ నిర్ధారణ కావడంతో పాజిటివ్ కేసుల్లో గురువారం నాటి రికార్డు కనుమరుగయ్యింది. కేవలం రెండు రోజుల్లోనే పాజిటివ్ కేసులు 6 లక్షల నుంచి 6.49 లక్షలకు చేరాయి. మహారాష్ట్రలో అత్యధికంగా 6,300కిపైగా కేసులు నమోదయ్యాయి. దీంతో అక్కడ మొత్తం కేసుల సంఖ్య 192,990కి చేరాయి. అక్కడ మరో 198 మంది శుక్రవారం ప్రాణాలు కోల్పోవడంతో మహారాష్ట్రలో కరోనా మరణాలు 8,376గా నమోదయ్యాయి. ఒక్క ముంబయిలోనే 75 మంది కరోనాకు బలయ్యారు. తమిళనాడులోనూ వైరస్ విజృంభిణ మామూలుగా లేదు. శుక్రవారం అక్కడ 4,329 మందికి వైరస్ నిర్ధారణ అయ్యింది. దీంతో అక్కడ కరోనా వైరస్ కేసుల సంఖ్య లక్ష దాటేసింది. ఇప్పటి వరకూ 1,358 మంది కరోనాతో చనిపోయారు. దక్షిణాది రాష్ట్రాల్లోనే శుక్రవారం ఏకంగా 9వేలకుపైగా కేసులు నమోదయ్యాయి. తెలంగాణలో ఏకంగా 1,892 మందికి కొత్తగా వైరస్ నిర్దారణ కాగా.. తర్వాత కర్ణాటకలోనూ రికార్డుస్థాయిలో 1,694 కేసులు నమోదయ్యాయి. తర్వాత ఉత్తరప్రదేశ్ 972, గుజరాత్ 687, బెంగాల్ 669, ఒడిశా 561, కేరళ 211 కేసులు బయటపడ్డాయి. ఇప్పటి వరకూ ఈ రాష్ట్రాల్లో ఇంత భారీగా కేసులు నమోదుకావడం ఇదే తొలిసారి. ఢిల్లీలో 2,520 కొత్త కేసులు నిర్ధారణ కాగా.. మొత్తం కేసుల సంఖ్య 94,600 దాటింది. ఆంధ్రప్రదేశ్‌లో కరోనా వ్యాప్తి కొనసాగుతోంది. శుక్రవారం 837 పాజిటివ్‌ కేసులు నిర్ధారణ అయినట్టు వైద్య ఆరోగ్యశాఖ బులిటెన్‌లో తెలిపింది. అయితే, వీటిలో విదేశాలకు చెందిన ఇద్దరు, పొరుగు రాష్ట్రాలకు సంబంధించిన 46 కేసులు ఉండగా.. రాష్ట్రంలో 789 పాజిటివ్‌ కేసులు వచ్చాయి. వివిధ రాష్ట్రాల నుంచి వచ్చిన వారితో కలిపి ఏపీ ఇప్పటివరకు మొత్తం 16,934 కేసులు నమోదయ్యాయి. తెలంగాణలో కరోనా వైరస్‌ విజృంభిస్తోంది. శుక్రవారం ఏకంగా 1,892 కేసులు నమోదయ్యాయి. ఇప్పటి వరకూ రాష్ట్రంలో ఒక్కరోజులో నమోదైన కేసుల్లో ఇదే అత్యధికం. గత మూడు రోజులుగా వరుసగా వెయ్యికి పైగా కేసులు వస్తున్నాయి. ఇక, జీహెచ్‌ఎంసీలో వైరస్‌ ఉద్ధృతి కొనసాగుతుంది. రాష్ట్రం మొత్తంమీద అత్యధికంగా 1,658 కేసులు ఇక్కడే నమోదయ్యాయి. రంగారెడ్డి (56), మేడ్చల్‌ (44), సంగారెడ్డి (20), వరంగల్‌ గ్రామీణ (41) జిల్లాల్లోనూ వైరస్‌ విజృంభిస్తోంది.

By July 04, 2020 at 07:23AM

Read More https://telugu.samayam.com/latest-news/india-news/coronavirus-in-india-record-23500-cases-on-friday-446-deaths/articleshow/76779430.cms