కోవిడ్-19 సంక్షోభంలో సోలార్ ఎనర్జీ కీలకం.. దీనికి భారత్ మంచి ఉదాహరణ: ఐరాస

కోవిడ్-19 సంక్షోభంలో సోలార్ విద్యుత్ వేలం ప్రజాదరణ పొందిందని, దీనికి భారత్ ఓ మంచి ఉదాహరణ అని ప్రధాన కార్యదర్శి వ్యాఖ్యానించారు. ఇంటర్నేషనల్ ఎనర్జీ ఏజెన్సీ గురువారం నిర్వహించిన క్లీన్ ఎనర్జీ ట్రాన్సిషన్ సమ్మిట్‌లో విర్చువల్ ద్వారా పాల్గొన్న గుటెర్రెస్ మాట్లాడుతూ.. 2020లో వృద్ధి చెందుతున్న ఏకైక సోలార్ విద్యుత్తు అని, శిలాజ ఇంధన పరిశ్రమ కంటే ఇందులో ఎక్కువ ఉద్యోగాల కల్పన ఉందని గుటెర్రెస్ చెప్పారు. అభివృద్ధి చెందుతున్న దేశాలు బొగ్గు వినియోగాన్ని తగ్గించడానికి, దీనిపై పెట్టుబడులు తగ్గించడానికి అంతర్జాతీయ సమాజం కట్టుబడి ఉండాలి సూచించారు. ‘కోవిడ్-19 రికవరీ ప్రణాళికల్లో బొగ్గుకు చోటులేదు.. 2050 నాటికి దీని వినియోగాన్ని సున్నాకు తీసుకురావడానికి కట్టుబడి ఉండాలి.. వచ్చే ఏడాది జరిగే కాప్-26కి ముందు మరింత ప్రతిష్టాత్మక జాతీయ వాతావరణ ప్రణాళికను సమర్పించాలి’ అని పేర్కొన్నారు. ‘మార్పునకు బీజాలు పడ్డాయి.. పునరుత్పాదక శక్తి 2020లో వృద్ధి చెందుతుందని అంచనా వేసిన ఏకైక శక్తి వనరు. కరోనా సంక్షోభంలో సౌర విద్యుత్ వేలం ప్రజాదరణ పొందింది. భారతదేశం దీనికి మంచి ఉదాహరణ.. పునరుత్పాదక రంగం శిలాజ ఇంధన పరిశ్రమ కంటే మూడు రెట్లు ఎక్కువ ఉద్యోగాలను అందిస్తోంది’ అని గుటెర్రెస్ అన్నారు. దేశంలో ఎనిమిది గిగావాట్ల విద్యుత్ ఉత్పత్తి, రెండు గిగావాట్ల పరికరాల తయారీకి రూ.45వేల కోట్ల విలువైన కాంట్రాక్ట్‌ను కార్పొరేషన్ ఆఫ్ ఇండియా నుంచి దక్కించుకున్నట్టు అదానీ గ్రీన్ ఎనర్జీ గత నెలలో ప్రకటించింది. దేశంలోనే తొలి సోలార్ విద్యుత్- తయారీ అనుసంధాన ఒప్పందం అని ఆ సంస్థ తెలిపింది. అన్ని దేశాలూ తమ ఆర్థిక వ్యవస్థలను రక్షించడం, పునర్నిర్మించడం, రీసెట్ చేయడం వంటి ఆరు వాతావరణ అనుకూల చర్యలను పరిగణనలోకి తీసుకోవాలని గుటెర్రెస్ చెప్పారు. మన సమాజాలను మరింత స్థితిస్థాపకంగా మార్చాలి.. హరిత ఉద్యోగాలు, స్థిరమైన వృద్ధి అవసరమని వక్కాణించారు. పరిశ్రమలు, విమానయానం, షిప్పింగ్ వంటి రంగాలకు మద్దతు విషయంలో ప్యారిస్ ఒప్పందం లక్ష్యాల ఆధారంగా షరతులు విధించాలన్నారు. శిలాజ ఇంధనాల రాయితీలకు డబ్బు వృధాను తగ్గించి, కార్బన్‌పై ధరను నిర్ణయించాల్సిన అవసరం ఉందని, తమ నిర్ణయాధికారంతో వాతావరణ ప్రమాదాన్ని దేశాలు పరిగణనలోకి తీసుకోవాల్సిన అవసరం ఉందని ఆయన అన్నారు. ‘ప్రతి ఆర్దిక నిర్ణయంలో పర్యావరణ, సామాజిక ప్రభావాలను పరిగణనలోకి తీసుకోవాలని, మొత్తం మీద మనం కలిసి పనిచేయాలి’ అని గుటెర్రెస్ స్పష్టం చేశారు.

By July 10, 2020 at 10:58AM

Read More https://telugu.samayam.com/latest-news/international-news/uno-chief-antonio-guterres-says-india-good-example-as-solar-auctions-gain-popularity-amid-covid/articleshow/76886973.cms