అల్ఖైదా ఉగ్రవాది లాడెన్ అమరవీరుడంటూ పాక్ ప్రధాని ప్రశంసలు!
ఉగ్రవాదుల పట్ల పాలకుల ద్వంద్వ నీతి మరోసారి బయటపడింది. ఏకంగా ఏ అంతర్జాతీయ ఉగ్రవాదినే అమర వీరుడంటూ పాక్ ప్రధాని ప్రశంసలు కురిపించడం ఉగ్రవాదంపై వారికున్న వైఖరికి నిదర్శనం. అల్ ఖైదా ఉగ్రవాద సంస్థ వ్యవస్థాపకుడు ఒసామా బిన్ లాడెన్ అమరవీరుడంటూ పాక్ ప్రధాని ఇమ్రాన్ ఖాన్ ప్రశంసించారు. ఏకంగా పార్లమెంటులోనే ఇమ్రాన్ ఈ వ్యాఖ్యలు చేయడం గమనార్హం. బడ్జెట్ సమావేశాల సందర్భంగా పార్లమెంటులో గురువారం ప్రసంగించిన ఇమ్రాన్ ఖాన్.. అమెరికా దళాలు కనీసం సమాచారం ఇవ్వకుండా పాకిస్థాన్లో ప్రవేశించి అతడ్ని చంపేశాయని అన్నారు. ఇది ప్రపంచంలోని పాక్ పౌరులందరికీ ఇబ్బంది కలిగించిందని వ్యాఖ్యానించారు. మిత్రదేశమే ఇలా చెప్పాపెట్టకుండా వచ్చి దాడి చేసినందుకు అందరూ తమను దూషించారని అన్నారు. అయితే ఇమ్రాన్ వ్యాఖ్యలపై విమర్శలు వెల్లువెత్తుతున్నాయి. ఓ ఉగ్రవాదిని అమరు వీరుడంటూ ప్రధాని చేసిన ప్రకటనపై ప్రతిపక్షాలు దుమ్మెత్తిపోస్తున్నాయి. ఉగ్రవాది అయిన లాడెన్ను అమరవీరుడని పొగడడం ఏమిటని పాకిస్థాన్ ముస్లిం లీగ్ (నవాజ్) నేత, విదేశాంగ శాఖ మాజీ మంత్రి క్వాజా అసిఫ్ ప్రశ్నించారు. ఇటీవల కాలంలో పెరుగుతున్న ఉగ్రవాదం కారణంగా ప్రపంచవ్యాప్తంగా ముస్లింలు వివక్షతను ఎదుర్కొంటూ నానా కష్టాలు పడుతున్నారు.. ఇలాంటి తరుణంలో బిన్ లాడెన్ ఉగ్రవాదిని అమరవీరుడు మా ప్రధాని సంబోధించడం సిగ్గుచేటని పాకిస్థాన్ హక్కుల కార్యకర్త మీనా గబీనా అన్నారు. 2001 సెప్టెంబరు దాడుల తర్వాత బిన్ లాడెన్ను మట్టుబెట్టడం కోసం అమెరికా ఆపరేషన్ చేపట్టింది. చివరకు 2011 మే 5న పాకిస్థాన్లోని అబోటాబాద్లో ఉన్నట్టు గుర్తించి, మెరుపుదాడి చేసి హతమార్చింది.
By June 26, 2020 at 09:35AM
No comments