కుక్కర్లో ఇరుక్కుపోయిన తల.. ఏడాది చిన్నారికి నరకయాతన
ఏడాది వయసున్న చిన్నారి ఆటాడుకుంటూ ప్రమాదవశాత్తూ ప్రెషర్ కుక్కర్లో తల ఇరుక్కుపోయి నరకయాతన అనుభవించిన ఘటన గుజరాత్లో శుక్రవారం ఉదయం చోటుచేసుకుంది. ప్రెషర్ కుక్కర్లో తలదూరడంతో కొన్ని గంటల పాటు విలవిలలాడిన ఆ చిన్నారిని తల్లిదండ్రులు హాస్పిటల్కు తీసుకెళ్లగా.. వైద్యులకు కూడా ఇది సవాల్గా మారింది. తొలుత డాక్టర్లు ప్రయత్నించినా ఫలితం లేకపోయింది. చివరకు పాత్రలను తయారుచేసే వ్యక్తిని హాస్పిటల్కు రప్పించి, కట్టర్ సాయంతో కుక్కర్ను కత్తిరించారు. అనంతరం అందులో ఇరుక్కున్న చిన్నారి తలను బయటకు తీశారు. రాజ్కోట్లోని సర్ టీ హాస్పిటల్ వైద్యులు వెల్లడించిన వివరాల ప్రకారం... ఏడాది వయసున్న చిన్నారి అటాడుకుంటుండగా ప్రెషర్ కుక్కర్లో తల ఇరుక్కుపోయింది. కుక్కర్లో నుంచి తలను బయటకు తీయడానికి కుటుంబసభ్యులు తీవ్రంగా శ్రమించారు. అయినా, ఎంత ప్రయత్నించినా తల బయటకు రాకపోవడంతో చివరకు హాస్పిటల్కు తరలించారు. హాస్పిటల్లోని ఆర్దోపెడిక్స్, చిన్నపిల్లల వైద్యు నిపుణులు ప్రయత్నించి విఫలమయ్యారు. చివరకు పాత్రలను తయారుచేసే వ్యక్తిని పిలిపించాల్సి వచ్చిందన్నారు. హాస్పిటల్లోని వైద్యుడు హార్దిక్ గథానీ మాట్లాడుతూ.. ‘మేము చివరకు పాత్రలను తయారుచేసే వ్యక్తిని పిలవాల్సి వచ్చింది. అతను కట్టర్ సాయంతో చాకచక్యంతో తల నుంచి మెల్లగా కత్తిరించి బయటకు తీశాడు. ఇంటి వద్ద కుటుంబసభ్యులు తలను బయటకు తీసేందుకు ప్రయత్నించారని, అయితే ఈ సమయంలో పాప నుదటిపై అనేక గాయాలు కావడంతో వాపు వచ్చింది.. ఈ సంఘటన వల్ల మెదడు లేదా వెన్నెముక రక్త ప్రసరణలో చిన్నారికి ఏమైనా సమస్య వచ్చిందా అని పర్యవేక్షిస్తున్నామని అన్నారు. ఒకవేళ ఎలాంటి ప్రమాదం లేదని ధ్రువీకరిస్తే శనివారం ఇంటికి పంపుతామని అన్నారు.
By June 13, 2020 at 10:33AM
No comments