రైళ్లు రద్దు.. ప్రయాణికులకు టికెట్ డబ్బులు వెనక్కి.. రూ.1885 కోట్లు రీఫండ్

కరోనా వైరస్ కట్టడి కోసం లాక్‌డౌన్ విధించడంతో దేశవ్యాప్తంగా రైలు సేవలు రద్దయిన సంగతి తెలిసిందే. మార్చి 21 నుంచి మే నెలఖారు వరకు ప్రయాణికుల టికెట్లను ఇండియన్ రైల్వే రద్దుచేసింది. ఆన్‌లైన్ విధానంలో టికెట్లు బుక్ చేసుకున్న ప్రయాణికులకు రూ.1885 కోట్లు రీఫండ్ చేసింది. టికెట్ బుక్ చేసిన సమయంలో ఏ ఖాతా నుంచైతే పేమెంట్ చేశారో.. అదే ఖాతాకు డబ్బులను బదిలీ చేశారు. ఇండియన్ రైల్వే సకాలంలో రీఫండ్ చేయడం వల్ల ప్రయాణికులు తమ టికెట్ డబ్బుల కోసం రిజర్వేషన్ కౌంటర్లకు వెళ్లే బాధ తప్పింది. సాధారణ రోజుల మాదిరి కాకుండా టికెట్ ధర మొత్తాన్ని రైల్వే శాఖ ప్రయాణికులకు రీఫండ్ చేసింది. దేశంలోని ప్రధాన నగరాల మధ్య ప్రత్యేక రైళ్లను నడుపుతోన్న రైల్వే శాఖ.. ప్రస్తుతం 200 రైళ్లను నడుపుతోంది. ఇండియన్ రైల్వే జూన్ 30 వరకు సాధారణ రైలు టికెట్ల బుకింగ్‌లను నిలిపేసింది. వలస కూలీలను సొంత రాష్ట్రాలకు తరలించడం కోసం మే 1 నుంచి కేంద్రం శ్రామిక్ రైళ్లను నడిపిన సంగతి తెలిసిందే. జూన్ 3వ తేదీ వరకు రైల్వే శాఖ 4197 శ్రామిక్ స్పెషల్ రైళ్లను నడిపింది. వీటి ద్వారా 58 లక్షల మంది వలస కూలీలను సొంత రాష్ట్రాలకు తరలించింది. గుజరాత్, మహారాష్ట్ర, పంజాబ్, ఉత్తర ప్రదేశ్, బిహార్ రాష్ట్రాలకు ఎక్కువ సంఖ్యలో రైళ్లను నడిపారు.

By June 04, 2020 at 10:31AM

Read More https://telugu.samayam.com/latest-news/india-news/indian-railways-refunds-rs-1885-cr-for-cancellation-of-services/articleshow/76189066.cms