శబరిమలలో ప్రవేశానికి ప్రయత్నించిన ఆ మహిళా ఉద్యోగికి నిర్బంధ పదవీవిరమణ!

శబరిమల అయ్యప్ప స్వామి ఆలయంలోకి అన్ని వయసుల మహిళలను అనుమతించాలని 2018 సెప్టెంబరులో తీర్పు వెలువరించిన విషయం తెలిసిందే. ఈ తీర్పుతో 50 ఏళ్లలోపు మహిళలు కొందరు ఆలయంలోకి ప్రవేశించే ప్రయత్నం చేశారు. వీరిలో కేరళకు చెందిన బీఎస్ఎన్ఎల్ టెక్నీషియన్, ఉద్యమ కార్యకర్త రెహానా ఫాతిమా సైతం ఉంది. సుప్రీంకోర్టు తీర్పు తరువాత శబరిమల ఆలయంలోకి ప్రవేశించేందుకు ప్రయత్నించిన ఇద్దరు మహిళల్లో ఆమె ఒకరు. దీంతోపాటు ఫేస్‌బుక్ పేజ్‌లో మత విద్వేషాలను రొచ్చగొట్టేలా చేసిన పోస్ట్ వివాదానికి కారణమైంది. ఆ సమయంలో ఆమె ఇంటిపై రాళ్లదాడి కూడా జరిగింది. కుటుంబసభ్యులే ఆమెను వెలేశారు. తాజాగా ఆమెకు బీఎస్ఎన్ఎల్ సంస్థ నిర్బంధ పదవీ విరమణ ఆదేశాలు జారీ చేసింది. ఆమెపై శాఖా పరమైన విచారణ జరిపిన అనంతరం ఉన్నతాధికారులు ఈ మేరకు ఉత్తర్వులు జారీ చేశారు. ‘శబరిమల ఆలయంలోకి అన్ని వయసుల మహిళలను అనుమతించాలన్న సుప్రీంకోర్టు తీర్పునకు వ్యతిరేకంగా ఉద్రిక్తతలు కొనసాగుతుండగా.. దాని పర్యవసానాలను పట్టించుకోకుండా ఫాతిమా ఉద్దేశపూర్వకంగానే ఈ చర్యకు పాల్పడినట్టు అందులో పేర్కొన్నారు. అయితే, తనపై నమోదైన కేసుల్లో చార్జ్ షీట్ ఇంకా దాఖలు కాలేదని, విచారణలో ఉండగా, ఇలా నిర్బంధ పదవీవిరమణ చేయిస్తూ ఉత్తర్వులు ఎలా జారీ చేస్తారని పేర్కొంటూ సెంట్రల్ అడ్మినిస్ట్రేటివ్ ట్రైబ్యునల్‌ను ఆశ్రయించింది. కాగా, బిందు (40), కనకదుర్గ (39) అనే ఇద్దరు మహిళలు 2019 జనవరి 1న శబరిమల ఆలయంలోకి ప్రవేశించిన విషయం తెలిసిందే. కేరళకు చెందిన బిందు, కనకదుర్గ 2018 డిసెంబర్ 24న కూడా ఆలయంలోకి వెళ్లేందుకు ప్రయత్నించారు. అయితే, వారి ప్రయత్నం అప్పుడు ఫలించలేదు. తాను ఆలయంలో అయ్యప్ప స్వామిని 3.45గంటలకు దర్శించుకున్నానని స్థానిక టీవీ చానెల్‌తో చెప్పారు. రాత్రి 1.30కి తమ ప్రయాణం ప్రారంభమైందని, 6.1 కిలోమీటర్ల దూరం కొండలు ఎక్కి ఆలయాన్ని చేరుకున్నామని ఆమె వివరించారు.

By May 15, 2020 at 10:50AM

Read More https://telugu.samayam.com/latest-news/india-news/bsnl-tells-rehana-fathima-who-trying-enter-into-sabarimala-temple-to-compulsorily-retire/articleshow/75751555.cms