అక్క చేసిన మోసం భరించలేక.. నవవధువు ఆత్మహత్య
కోటి ఆశలతో కొత్త జీవితం మొదలు పెట్టింది. పెళ్లై నెలరోజులే అయ్యింది. ఇంతలోనే అక్క, బావ చేసిన మోసం ఆమెకు తెలిసింది. ఆ బాధ తట్టుకోలేక.. వాళ్లు అన్న మాటలు పడలేక ఆవేదనతో ఆత్మహత్య చేసుకుంది. ఈ దుర్ఘటన కృష్ణా జిల్లాలో చోటు చేసుకుంది. గుడివాడ ఒకటో పట్టణ పోలీసులు తెలిపిన వివరాల ప్రకారం.. బేతవోలు నిమ్మతోటలో నివాసముంటున్న వీరంకి గంగారావు, చుక్కమ్మల ఇద్దరు కూతుళ్లే. పెద్ద కూతురుకి ఎప్పుడో పెళ్లైంది. పిల్లలు కూడా ఉన్నారు. అయితే ఈ మధ్యే చిన్నకూతురు మౌనిక వివాహం కూడా జరిపించారు. గత నెలలో కొడాలికి చెందిన డేనియల్‌కు ఇచ్చి వివాహం జరిపించారు. ఇద్దరి బాధ్యత తీరిందనుకున్నారు తల్లిదండ్రులు. కానీ పెద్ద కూతురు రూపంలో కష్టాలు.. వారి తలుపు తట్టాయి. పమిడిముక్కల మండలం వీరంకిలాకులో నివాసముండే పెద్దకూతురు బొల్లా నాగలక్ష్మి అల్లుడు శ్రీనివాసరావు ఇంటికి వచ్చారు. ఇల్లుకట్టుకుంటున్నాం.. బ్యాంక్ ష్యూరిటీ కోసం పొలం డాక్యుమెంట్లు ఇవ్వాలని అడిగారు. దానికేమంది అంటూ ... కన్నకూతురు మాటలు గుడ్డిగా నమ్మిన నిరక్షరాస్యులైన తల్లిదండ్రులు పొలం పత్రాలు కూతురు,అల్లుడు చేతిలో పెట్టారు. అయితే తల్లిదండ్రులను మోసం చేసి ఆ భూమిని తమ పేరుతో రిజిస్ట్రేషన్‌ చేయించుకున్నారు. అయితే గత నెలలో చిన్న కూతురు మౌనిక వివాహమైంది. కట్నం కింద ఎకరంన్నరలో అర ఎకరం ఆమె పేరుతో తల్లిదండ్రులు రాశారు. ఆ భూమి డాక్యుమెంట్లు కావాలని తమ పెద్ద కుమార్తెను కోరారు. వారు ఇదిగో అదిగో ఇస్తామని చెపుతూ వచ్చి చివరకు భూమి తమపేరుతో రిజిస్ట్రేషన్‌ చేయించుకున్నామని, ఇచ్చేది లేదని తేల్చి చెప్పారు. దీంతో మౌనిక కోపంతో అక్కబావలను ఫోన్లో నిలదీసింది. దీంతో ఆమెను వారు ఇష్టం వచ్చినట్లు తిట్టి పోశారు. పెరిగిన అక్కకొడుకు కూడా అనరాని మాటలు అనడంతో ఆమె తట్టుకోలేకపోయింది. తల్లి, భర్త ఇంట్లో లేని సమయంలో శుక్రవారం పొలం కోసం తెచ్చిన గుళికలు తిన్నది. కుటుంబ సభ్యులు ఆమెను చికిత్స నిమిత్తం ప్రాంతీయ ఆరోగ్య కేంద్రానికి తరలించారు. చికిత్స పొందుతున్న ఆమె శుక్రవారం రాత్రి మృతి చెందింది. తల్లి చుక్కమ్మ ఫిర్యాదు మేరకు పెద్ద కూతురు బొల్లా నాగలక్ష్మి, అల్లుడు శ్రీనివాసరావు, మనమలు సాయి, మరో బాలుడిపై కేసు నమోదు చేసినట్లు ఎస్సై దుర్గాప్రసాద్‌ తెలిపారు.
By May 16, 2020 at 10:13AM
No comments