ఉత్తర కొరియా అధినేత కిమ్ ఆరోగ్యంపై ప్రచారం.. ఐరాస స్పందన ఇదీ
అధ్యక్షుడు కిమ్ జోంగ్‌ ఉన్ ఆరోగ్యంపై ప్రపంచవ్యాప్తంగా తీవ్రమైన చర్చ కొనసాగుతోంది. కిమ్ ఆరోగ్యంపై ప్రచారం జోరుగా సాగుతున్న వేళ ఐక్యరాజ్య సమితి దీనిపై స్పందించింది. కిమ్ ఆరోగ్య పరిస్థితిపై తమకు ఎలాంటి సమాచారం లేదని ఐరాస ప్రధాన కార్యదర్శి ఆంటోనియో గుటెరస్‌ స్పష్టం చేశారు. ఈ విషయంపై తమ ప్రతినిధులెవరూ ఉత్తరకొరియా ప్రభుత్వంతోగానీ, ఆ దేశ ప్రతినిధులతోగానీ మాట్లాడలేదని వ్యాఖ్యానించారు. ఇదే సందర్భంగా కరోనా వైరస్ విషయంలో అమెరికా, చైనాల మధ్య సాగుతున్న మాటల యుద్ధంపై పరోక్షంగా వ్యాఖ్యలు చేశారు. అంతర్జాతీయంగా కరోనా వైరస్‌పై పోరులో చైనా, అమెరికాల పాత్ర చాలా కీలకమైందని, అంతర్జాతీయ సంబంధాలు మరింత బలపడాల్సిన అవసరం ఉందని అన్నారు. ఆర్ధిక, రాజకీయ, సైనికపరంగా బలమైన దేశాలైన అమెరికా, చైనాలు కరోనాపై పోరులో అంతర్జాతీయ సమాజంలో ముఖ్యమైన భూమిక పోషించాలని సూచించారు. కాగా, ఏప్రిల్ 15న తన తాత కిమ్ ఇల్ సంగ్‌ జయంతి వేడుకలకు గైర్హాజరైనప్పటి నుంచి కిమ్ ఆరోగ్య పరిస్థితిపై అనేక ఊహాగానాలు వెలువడుతున్న విషయం తెలిసిందే. గుండె సంబంధిత శస్త్రచికిత్స చేస్తుండగా.. ఆయన కోమాలోకి వెళ్లారన్న వార్త చక్కర్లు కొట్టింది. ఇప్పటి వరకు ఈ విషయాన్ని ఆ దేశం అధికారికంగా ఖండించకపోవడం గమనార్హం. అయితే, దక్షిణ కొరియా మాత్రం కిమ్ ఆరోగ్యంగానే ఉన్నారని ప్రకటించింది. మరోవైపు కిమ్ ఆరోగ్య పరిస్థితిపై తనకు పూర్తి సమాచారం ఉందని.. కానీ, బయటకు చెప్పలేనని ఇటీవల అమెరికా అధ్యక్షుడు ట్రంప్‌ ప్రకటించిన విషయం తెలిసిందే. ఉత్తర కొరియా అధినేత ఆరోగ్యం గురించి ప్రపంచవ్యాప్తంగా పెద్ద చర్చ జరుగుతోంది. ఆయన ఆరోగ్యం విషమించిందంటూ అంతర్జాతీయ మీడియాలో పలు కథనాలు వెలువడుతున్న విషయం తెలిసిందే. అయితే దీనిపై ఇప్పటి వరకు ఆ దేశం కానీ.. అక్కడి అధికారిక మీడియా కానీ ఎలాంటి ప్రకటక చేయలేదు. పొరుగు దేశం చైనా ఏకంగా ఓ వైద్య బృందాన్ని శుక్రవారం పంపింది. ఈ నేపథ్యంలో వాన్సన్ నగరంలో కిమ్ ఉన్నట్టు భావిస్తున్నారు. దీనికి బలం చేకూరేలా కిమ్‌కు చెందిన ప్రత్యేక రైలు వాన్సన్ పట్టణంలో ఈ వారం పర్యటించినట్టు వాష్టింగ్టన్ కేంద్రంగా పనిచేసే 38 నార్త్ అనే వెబ్‌సైట్ తెలిపారు. ఏడాది జరిగిన ఉత్సవాలకు కిమ్ హాజరుకాలేదు. ఏప్రిల్ 15న జరిగిన కిమ్ ఇల్ సుంగ్ జయంతి వేడుకల్లో కిమ్ జాంగ్ ఉన్ కనిపించలేదు. ఆ దేశ మీడియా ప్రకారం ఏప్రిల్ 11న చివరిసారిగా కిమ్ ఓ సమావేశంలో పాల్గొన్నారు. దీంతో ఆయన ఆరోగ్య పరిస్థితిపై తీవ్ర చర్చ జరుగుతోంది. తాత జయంతి ఉత్సవాల్లో ఎప్పుడూ పాల్గొనే కిమ్ కనిపించకపోవడంతో ఆయన ఆరోగ్యంపై అనుమానాలు మరింత బలపడుతున్నాయి.
By May 01, 2020 at 11:41AM
No comments