పలు విభాగాలకు కేరళ మినహాయింపులు.. అభ్యంతరం వ్యక్తం చేసిన కేంద్రం

మహమ్మారి వ్యాప్తిని కట్టడిచేయడానికి విధించిన లాక్‌డౌన్ 2.O దేశవ్యాప్తంగా కొనసాగుతుండగా.. దేశ ఆర్ధిక వ్యవస్థను తిరిగి గాడిలో పెట్టేందుకు కేంద్రం కొన్ని మినహాయింపులను ఇచ్చింది. కరోనా వైరస్ కేసులు నమోదుకాని ప్రాంతాల్లో ఆంక్షల సడలింపు సోమవారం నుంచి అమల్లోకి వచ్చింది. ఈ నేపథ్యంలో రాష్ట్రాల ప్రధాన కార్యదర్శులకు కేంద్ర హోంశాఖ కార్యదర్శి అజయ్ భల్లా మరోసారి లేఖ రాశారు. ఏప్రిల్ 15న జారీ చేసిన మార్గదర్శకాలను తప్పక పాటించాల్సిందేనని ఆ లేఖలో స్పష్టం చేశారు. లాక్‌డౌన్‌ నిబంధనల విషయంలో రాష్ట్ర ప్రభుత్వాలు ఇష్టానుసారం నిర్ణయం తీసుకోవడం కుదరదని, కేంద్రం సూచనలను పాటించాల్సిందేనని అన్నారు. అత్యవసరం కాని సేవలు, కార్యకలాపాలకు పలు రాష్ట్రాలు అనుమతులు ఇస్తున్నట్టు సమాచారం వస్తోందన్న అజయ్ భల్లా.. దేశమంతా విపత్తు నిర్వహణ సంస్థ ఉత్తర్వులను పాటించాలని ఆదేశించింది. రాష్ట్రాలు అనుసరించాల్సిన వైఖరిపై గతంలో సుప్రీంకోర్టు ఆదేశాలు ఉన్నాయని గుర్తుచేసింది. ఎవరికి వారి నిర్ణయాల వల్ల దేశమంతా నష్టపోయే పరిస్థితి రాకూడదని హెచ్చరించింది. రెస్టారెంట్లు, సరి-బేసి విధానంలో ప్రయివేట్ వాహనాలకు అనుమతిస్తూ కేరళ ప్రభుత్వం తీసుకున్న నిర్ణయంపై కేంద్ర హోంశాఖ అభ్యంతరం వ్యక్తం చేసింది. కేరళ రాష్ట్ర ప్రధాన కార్యదర్శికి ప్రత్యేకంగా హోం శాఖ కార్యదర్శి లేఖ రాశారు. అత్యవసరం కాని సేవలకు అనుమతివ్వడంపై అసంతృప్తి వ్యక్తం చేసిన ఆయన.. వెంటనే దిద్దుబాటు చర్యలు చేపట్టాలని ఆదేశించారు. మొత్తం 14 జిల్లాల్లో ఏడు జిల్లాలో రెస్టారెంట్లు పునఃప్రారంభం సహా పరిమిత సంఖ్యలో ప్రయివేట్ వాహనాలకు సరి-బేసి విధానంలో అనుమతించనుంది. రాష్ట్రాన్ని రెడ్, ఆరెంజ్-ఏ, ఆరెంజ్-బి, గ్రీన్ మొత్తం నాలుగు జోన్లుగా విభజించి కేంద్రానికి ప్రతిపాదనలు పంపింది. ఆరెంజ్-ఏ, ఆరెంజ్-బి, గ్రీన్ జోన్‌లలో ఆంక్షలను పరిమితస్థాయిలో సడలించారు. ఈ ప్రతిపాదనలకు కేంద్రం శుక్రవారం ఆమోదం తెలిపిందని ప్రకటించారు. కానీ, సోమవారం, బుధవారం, శుక్రవారం సరి సంఖ్య వాహనాలు, మంగళవారం, గురువారం, శుక్రవారం బేసి సంఖ్య వాహనాలను అనుమతించడం. వాహనాలు నడిపే మహిళా డ్రైవర్లకు కూడా అనుమతిస్తున్నట్టు ప్రభుత్వం తెలిపింది. కారులో ముగ్గురు (డ్రైవర్ సహా వెనుక సీట్లలో ఇద్దరు), ద్విచక్రవాహనంపై నడుపుతున్న వ్యక్తితోపాటు కుటుంబసభ్యుడికి మాత్రమే అవకాశం ఇస్తున్నట్టు కేరళ ప్రభుత్వం మార్గదర్శకాలు వెల్లడించింది. ఆప్టికల్స్, మొబైల్, కంప్యూటర్, యాక్ససరీస్ షాప్‌లు, ఆటో వర్క్‌షాప్‌లు, సెలూన్స్, బుక్ స్టోర్స్ వారానికి రెండు రోజులు తెరుచుకుంటాయి. ఏప్రిల్ 20 లేదా 24 నుంచి ఇవి ప్రారంభం కానున్నాయి. మే 3 వరకు విద్యా సంస్థలు, ప్రార్థనాలయాలు, షాపింగ్ మాల్స్ మాత్రం తెరుచుకోవని కేరళ ప్రభుత్వ ప్రధాన కార్యదర్శి వెల్లడించారు.

By April 20, 2020 at 11:36AM

Read More https://telugu.samayam.com/latest-news/india-news/union-government-objects-to-kerala-govt-giving-additional-relaxation-during-lockdow/articleshow/75244845.cms