దేశంలో 20వేల మార్క్ దాటిన కరోనా కేసులు.. 17వ స్థానంలో భారత్

దేశంలో తీవ్రత క్రమంగా పెరుగుతోంది. రోజు రోజుకూ పాజిటివ్ కేసులు పెరుగుతుండటంతో మరింత ఆందోళన వ్యక్తమవుతోంది. ప్రస్తుతం దేశవ్యాప్తంగా కరోనా పాజిటివ్ కేసుల సంఖ్య 20వేల మార్క్ దాటింది. దీంతో ప్రపంచంలో 20వేల పాజిటివ్ కేసులు దాటిన 17వ దేశంగా భారత్ నిలిచింది. మహారాష్ట్రలో మంగళవారం భారీగా కొత్త కేసులు నమోదయ్యాయి. ఒక్క మహారాష్ట్రలోనే ఇప్పటి వరకూ వైరస్ బాధితుల సంఖ్య 5,200 దాటింది. అక్కడ మంగళవారం 552 మందికి వైరస్ నిర్ధారణ కాగా.. మరో 19 మంది ప్రాణాలు కోల్పోయారు. ఇప్పటి వరకూ దేశవ్యాప్తంగా 20,080 మందికి వైరస్ సోకినట్టు నిర్ధారణ కాగా.. 645 మంది మృతిచెందారు. నిన్న ఒక్కరోజే దేశంలో 1,493 పాజిటివ్ కేసులు నమోదయ్యాయి. అత్యధికంగా మహారాష్ట్రంలో 552, గుజరాత్ 239, రాజస్థాన్ 159, ఉత్తరప్రదేశ్‌ 153 కేసులు నిర్ధారణ అయ్యాయి. పశ్చిమ్ బెంగాల్‌లో 53 కేసులు నిర్ధారణ కాగా.. ఆ రాష్ట్రంలో ఒక్క రోజు ఇంత పెద్ద సంఖ్యలో కేసులు నిర్ధారణ కావడం ఇదే తొలిసారి. మహారాష్ట్ర తర్వాత దేశంలోనే అతిపెద్ద కరోనా వైరస్ హాట్‌స్పాట్‌గా గుజరాత్ నిలిచింది. ఈ రాష్ట్రంలో కేసుల సంఖ్య 2,000 దాటింది. దీంతో 2వేలకుపైగా కేసులు నమోదయిన మూడో రాష్ట్రం గుజరాత్ కావడం గమనార్హం. ఒక్క అహ్మదాబాద్‌ నగరంలో 15 మంది మంగళవారం మృతిచెందారు. రెండు రోజుల్లోనే మహారాష్ట్రలో 1,000పైగా కేసులు నమోదయ్యాయి. ఇక, ముంబయి నగరంలో మహమ్మారి మహోగ్రరూపం దాల్చింది. ఢిల్లీలో 12 రోజుల తర్వాత మరో కరోనా మరణం చోటుచేసుకుంది. అజాద్‌పూర్ మార్కెట్‌లో కూరగాయల వ్యాపారి కరోనాతో మృతిచెందాడు. గడచిన 24 గంటల్లో 75 మందికి వైరస్ నిర్ధారణ కాగా.. మొత్తం కరోనా కేసులు 2,156గా నమోదయ్యింది. రాజస్థాన్‌లోనూ కరోనా వైరస్ కేసులు 1,735గా నమోదయ్యాయి. మంగళవారం అక్కడ 159 మందికి వైరస్ నిర్ధారణ కాగా.. ఆ రాష్ట్రంలో వైరస్ వెలుగుచూసిన తర్వాత ఇంత పెద్ద సంఖ్యలో కేసులు నమోదుకావడం ఇదే తొలిసారి. పశ్చిమ్ బెంగాల్‌లోనూ మహమ్మారి చాపకింద నీరులా వ్యాప్తిచెందుతోంది. ఒక్కసారిగా కేసులు పెద్ద సంఖ్యలో మంగళవారం వెలుగుచూశాయి. దీంతో, మొత్తం కరోనా కేసుల సంఖ్య 392కి చేరింది. ఉత్తరప్రదేశ్‌లో 153 మందికి వైరస్ నిర్ధారణ కావడంతో ఆ రాష్ట్రంలో మొత్తం కోవిడ్ బాధితుల సంఖ్య 1,337గా నమోదయ్యింది. మధ్యప్రదేశ్‌లోనూ కోవిడ్-19 కేసులు 1,553 మందికి వైరస్ నిర్ధారణ అయ్యింది. తెలుగు రాష్ట్రాల్లోనూ కొవిడ్‌ 19 ఉద్ధృతి కొనసాగుతోంది. మంగళవారం ఒక్క రోజే తెలంగాణలో 56 కేసులు నమోదయ్యాయి. వీటిలో సూర్యాపేట జిల్లాలోనే అత్యధికంగా 26 మందిలో వైరస్‌ నిర్ధారణ అయ్యింది. జీహెచ్‌ఎంసీలో 19, నిజామాబాద్‌లో 3, గద్వాల, ఆదిలాబాద్‌ జిల్లాల్లో రెండేసి, ఖమ్మం, మేడ్చల్‌, వరంగల్‌ నగర, రంగారెడ్డి జిల్లాల్లో ఒక్కొక్కటి చొప్పున కేసులను నిర్ధరించారు. ఆంధ్రప్రదేశ్‌లోనూ కరోనా మహమ్మారి విజృంభిస్తోంది. ముఖ్యంగా కర్నూలు, గుంటూరు జిల్లాల్లో ఉద్ధృతి కరోనా కొనసాగుతోంది. సోమవారం ఉదయం నుంచి మంగళవారం ఉదయం 10 గంటల వరకు.. 24 గంటల్లో రాష్ట్రవ్యాప్తంగా కొత్తగా 39 కేసులు నమోదుకాగా.. ఇందులో గుంటూరులో 13, కర్నూలులో 10 కేసులున్నాయి. మొత్తంగా రాష్ట్రంలో 761 పాజిటివ్‌ కేసులు నమోదయ్యాయి. గుంటూరు జిల్లాలో కరోనా వైరస్‌ తగ్గినట్లే తగ్గి.. మళ్లీ విజృంభించింది. సోమ, మంగళవారాల్లోనే 33 కేసులు నమోదయ్యాయి. సోమవారం 20, మంగళవారం 13 కేసులు వచ్చాయి. దీంతో యంత్రాంగం అప్రమత్తమైంది.

By April 22, 2020 at 08:22AM

Read More https://telugu.samayam.com/latest-news/india-news/india-become-17th-nation-to-hit-20000-coronavirus-cases-death-toll-crosses-600/articleshow/75284456.cms