దేశంలో 14వేలు దాటిన కోవిడ్ కేసులు.. వణుకుతున్న ముంబయి

దేశంలో కరోనా మహమ్మారి తీవ్రత రోజు రోజుకూ అధికమవుతోంది. వైరస్‌ను కట్టడిచేయడానికి విధించిన రెండో విడత లాక్‌డౌన్ దేశవ్యాప్తంగా కొనసాగుతుండగా.. ఏప్రిల్ 20 నుంచి కొన్ని సడలింపులు అమల్లోకి రానున్నాయి. ఆర్ధిక వ్యవస్థను చక్కదిద్దేందుకు వ్యవసాయం, అనుబంధ రంగాలు సహా పలు విభాగాలకు కేంద్రం వెసులుబాటు కల్పించింది. ఇదిలా ఉండగా.. కేసుల గ్రోత్ ఫ్యాక్టర్ నెమ్మదించినట్టు కేంద్ర ఆరోగ్య శాఖ వెల్లడించింది. గడచిన 24 గంటల్లో దేశవ్యాప్తంగా 1,100 కేసులు నిర్ధారణ కాగా.. 37 మంది ప్రాణాలు కోల్పోయారు. కరోనా మహమ్మారి మహారాష్ట్రను బెంబేలెత్తిస్తోంది. ముఖ్యంగా దేశ ఆర్థిక రాజధాని ముంబయి చిగురుటాకులా వణుకిపోతోంది. దేశంలో అత్యధికంగా కరోనా కేసులు, మరణాలు మహారాష్ట్రలోనే నమోదవుతున్నాయి. వైరస్‌ వ్యాప్తి, మరణాల రేటు రెండూ ఎక్కువే. ఆసియాలోనే అతిపెద్ద మురికివాడ ధారవిలోనూ కేసులు పెద్ద సంఖ్యలో నిర్దారణ కావడం మరింత కలవరపాటుకు గురిచేస్తోంది. ఇది ప్రపంచంలోనే అత్యంత కిక్కిరిసిన ప్రాంతం కావడం వారి ఆందోళనకు ప్రధాన కారణం. ఇక్కడ మొత్తంగా శుక్రవారం సాయంత్రానికి 101 కేసులు, 10 మరణాలు సంభవించినట్లు అధికారులు తెలిపారు. దేశవ్యాప్తంగా మొత్తం కేసుల సంఖ్య 14,352కు చేరుకోగా.. ఇప్పటి వరకు 486 మంది ప్రాణాలు కోల్పోయారు. శుక్రవారం ఒక్క రోజే గుజరాత్‌లో అత్యధికంగా 170 మందికి వైరస్ నిర్ధారణ అయ్యింది. దీంతో ఆ రాష్ట్రంలో మొత్తం కేసుల సంఖ్య 1,000 దాటింది. అత్యధికంగా మహారాష్ట్రలో 3,320 కేసులు నమోదయ్యాయి. మొత్తం 201 మంది ప్రాణాలు కోల్పోయారు. శుక్రవారం మరో 118 కేసులు నమోదు కాగా.. ముంబయిలోనే 2,200 మందికి వైరస్ నిర్ధారణ అయ్యింది. తెలంగాణలోనూ కరోనా వైరస్ వ్యాప్తి తీవ్రంగా ఉంది. శుక్రవారం కొత్తగా 66 కేసులు నిర్ధారణ కాగా.. ఇందులో 30 జీహెచ్‌ఎంసీ పరిధిలోనే ఉన్నాయి. సూర్యాపేట జిల్లాలో 15 కేసులు నమోదుకావడం మరింత ఆందోళన వ్యక్తమవుతోంది. తెలంగాణలో మొత్తం కేసుల సంఖ్య 766కి చేరింది. ఆంధ్రప్రదేశ్‌లోనూ శుక్రవారం 38 కేసులు బయటపడగా.. కర్నూలులో ఒకే కుటుంబంలో ఆరుగురికి కోవిడ్ నిర్ధారణ అయ్యింది. ఇప్పటి వరకూ ఏపీలో మొత్తం 572 కేసులు నమోదయ్యాయి. తెలంగాణలో 18 మంది, ఆంధ్రప్రదేశ్‌లో 14 మంది కోవిడ్ కారణంగా చనిపోయారు. ఇప్పటి వరకూ దేశవ్యాప్తంగా 486 మంది మృతిచెందగా.. మహారాష్ట్రలో అత్యధికంంగా 201 మంది ఉన్నారు. తర్వాతి స్థానంలో మధ్యప్రదేశ్ 69, ఢిల్లీ 42, గుజరాత్ 41, తెలంగాణ 18, రాజస్థాన్ 17, తమిళనాడు 15, ఆంధ్రప్రదేశ్, పంజాబ్, యూపీలో 14, కర్ణాటక 13, పశ్చిమ్ బెంగాల్ 10, జమ్మూ అండ్ కశ్మీర్ 5, మిగతా రాష్ట్రాల్లో ఒకరు నుంచి ముగ్గురు ప్రాణాలు కోల్పోయారు. ఇప్పటి వరకు 2,041 మంది బాధితులు కోలుకోవడం సానుకూలంశం. మహారాష్ట్రలో 3,320, ఢిల్లీలో 1,707, తమిళనాడు 1,323, మధ్యప్రదేశ్ 1,310, రాజస్థాన్ 1,229, గుజరాత్ 1,099, ఉత్తరప్రదేశ్ 849, తెలంగాణ్ 766, ఆంధ్రప్రదేశ్ 572, కేరళ 395, కర్ణాటక 359, జమ్మూ కశ్మీర్ 328, పశ్చిమ్ బెంగాల్ 255, హర్యానా 223, పంజాబ్ 211 కేసులు నమోదు కాగా.. బీహార్ 95, ఒడిశా 60, ఉత్తరాఖండ్ 40, హిమాచల్‌ప్రదేశ్ 38, చత్తీస్‌గఢ్ 36, అసోం 34, ఝార్ఖండ్ 32, చండీగఢ్ 21, లడఖ్ 18, అండమాన్ 12, మేఘాలయ 9, గోవా 7, పుదుచ్చేరి 7, మణిపూర్, త్రిపుర 2, అరుణాచల్ ప్రదేశ్, మిజోరాం, నాగాలాండ్ 1 కేసు న నమోదయ్యాయి.

By April 18, 2020 at 08:18AM

Read More https://telugu.samayam.com/latest-news/india-news/coronavirus-cases-crosses-14300-and-486-people-died-across-country/articleshow/75214704.cms