కరోనా ఎఫెక్ట్: రంగంలోకి ప్రపంచ బ్యాంకు.. 12 బిలియన్ డాలర్ల అత్యవసర నిధి
ప్రపంచ దేశాలను తీవ్ర ఆందోళనకు గురిచేస్తోన్న కొత్తరకం ప్రాణాంతక కరోనా వైరస్ను ఎదుర్కొనేందుకు సమర్ధవంతమైన చర్యలు తీసుకోవాలని డబ్ల్యూహెచ్ఓ తరుచూ హెచ్చరిస్తోంది. ఈ నేపథ్యంలో రంగంలోకి దిగింది. వైరస్ను అరికట్టడానికి 12 బిలియన్ డాలర్ల నిధిని ఏర్పాటు చేస్తున్నట్లు మంగళవారం ప్రకటించింది. వివిధ దేశాలు ముఖ్యంగా అభివృద్ధి చెందుతున్న, అట్టడుగు దేశాలు కరోనా ముప్పును ఎదుర్కొనేందుకు త్వరితగతిన నిధులు అందజేయడానికి ఈ నిర్ణయం తీసుకున్నట్లు ఆ సంస్థ అధ్యక్షుడు డేవిడ్ మల్పాస్ తెలిపారు. సహాయం కోరిన దేశాలకు ఇందులో ఎనిమిది బిలియన్ డాలర్లు అందజేస్తామని, ఇప్పటికే పలు దేశాలతో సంప్రదింపులు జరుపుతున్నామని ఆయన వెల్లడించారు. అయితే అవి ఏ దేశాలు అన్నది మాత్రం పేర్కొనలేదు. తక్కువ వడ్డీ రుణాలు, నిధులు, సాంకేతిక సహాయం కోసం అత్యవసర నిధిని వినియోగిస్తామని ఆయన తెలిపారు. కరోనా ముప్పును ఎదుర్కోవడం భారంగా ఉన్న పేద దేశాలను గుర్తించడం ప్రస్తుతం కీలకమైన అంశమని మల్పాస్ వ్యాఖ్యానించారు. ఇప్పటికే ఆయా దేశాలకు ప్రపంచ బ్యాంకు కేటాయించిన నిధులను కరోనాను అరికట్టేందుకు వినియోగించుకోవాలని సూచించారు. అవసరమైన వైద్య సదుపాయాలు, నిపుణులు, విధివిధానాలు రూపకల్పనకు వినియోగించాలని, గతంలో ఎబోలా, జికా వ్యాప్తి సమయంలోనూ ప్రపంచ బ్యాంకు ఈ తరహా చర్యలు చేపట్టిందని ఆయన గుర్తుచేశారు. ఈ వ్యాధిని సాధ్యమైనంత తక్కువ వ్యాప్తి చెందేలా ప్రయత్నిస్తున్నామని అన్నారు. వైరస్ నిరోధించడానికి మరిన్న వనరులు అవసరమని, వాటిని సమకూర్చడానికి ప్రయత్నాలు చేపట్టామని స్పష్టం చేశారు. ఆర్ధిక వ్యవస్థలపై తీవ్ర ప్రభావం చూపడంతో ఈ సంక్షోభం నుంచి తమను బయటపడేయాలని వివిధ దేశాల నేతలు విజ్ఞప్తి చేయడంతో ప్రపంచ బ్యాంకు ఈ చర్యలు చేపట్టింది. ప్రయివేట్ భాగస్వామ్యంతో ప్రజారోగ్య వ్యవస్థను మెరుగుపరిచి, ఆర్ధిక సంక్షోభం తగ్గించుకోడానికి ఈ నిధి ఉపయోగపడుతుంది. ప్రపంచవ్యాప్తంగా మూడు వేల మందికిపైగా ప్రాణాలు కోల్పోగా, 92 వేలకుపైగా కేసులు నమోదయ్యాయి. మరోవైపు, కరోనా దెబ్బకు అన్ని దేశాల ఆర్ధిక వ్యవస్థలు కుదేలవుతున్నాయి. క్షణాల్లో లక్షల కోట్లు ఆవిరవడంతో మదుపర్లు లబోదిబోమంటున్నారు.
By March 04, 2020 at 12:06PM
No comments