సీఎం రమేశ్ కుమారుడి పెళ్లి రిసెప్షన్లో వైసీపీ కీలక ఎంపీ.. ఆ ట్వీట్ ఆసక్తికరం!
కుమారుడు రిత్విక్ వివాహం ఫిబ్రవరి 7న జరిగిన సంగతి తెలిసిందే. సోమవారం రాత్రి ఢిల్లీలో రిసెప్షన్ నిర్వహించారు. ఈ కార్యక్రమంలో హోం మంత్రి అమిత్ షా, బీజేపీ జాతీయ అధ్యక్షుడు జేపీ నడ్డా పాల్గొని వధూవరులను ఆశీర్వదించారు. ఈ విషయాన్ని ట్వీట్ చేసిన సీఎం రమేశ్.. విలువైన సమయాన్ని వెచ్చించి.. తమ కుమారుడి వివాహ రిసెప్షన్‌కు హాజరైన అమిత్ షా, నడ్డాలకు ధన్యవాదాలు తెలిపారు. ఈ కార్యక్రమంలో వైఎస్సార్సీపీ కీలక నేత, రాజ్యసభ సభ్యుడు కూడా పాల్గొన్నారు. గతంలో సీఎం రమేశ్ టీడీపీలో ఉన్నప్పుడు వైఎస్సార్సీపీ నేతలు, ఆయన మధ్య మాటల యుద్ధం నడిచేది. కానీ ఆయన బీజేపీలో చేరిన తర్వాత పరిస్థితి మారింది. రాజకీయాలను పక్కనబెట్టి.. రిసెప్షన్లో విజయసాయి రెడ్డి పాల్గొనడం మంచి పరిణామమని భావిస్తున్నారు. ఫిబ్రవరి 10న ఢిల్లీలోని తాజ్ ప్యాలెస్‌లో నిర్వహించిన రిసెప్ఫన్‌‌కు తాను హాజరైన విషయాన్ని విజయసాయి రెడ్డి ట్వీట్ చేయడం గమనార్హం. కాగా బడ్జెట్ సమావేశాల సందర్భంగా.. పార్లమెంట్‌లో తాను మాట్లాడిన సమయంలో విజయసాయి రెడ్డి సభలో లేరు. దీంతో ఆయన మాట్లాడే అవకాశాన్ని కోల్పోయారు. ఇదే విషయాన్ని కొందరు నెటిజన్లు ప్రస్తావిస్తున్నారు. సీఎం రమేశ్ కుమారుడి వివాహం విషయానికి వస్తే.. పారిశ్రామికవేత్త రాజా తాళ్లూరి కుమార్తె పూజతో రిత్విక్ పెళ్లి జరిగింది. అంతకు ముందు దుబాయ్‌లో ఎంగేజ్‌మెంట్ నిర్వహించగా.. భారీ సంఖ్యలో అతిథులను ప్రత్యేక విమానాల్లో దుబాయ్ తీసుకెళ్లారు. తన కుమారుడి వివాహానికి హాజరు కావాలని ప్రధాని మోదీతోపాటు సీఎం జగన్‌ను సైతం సీఎం రమేశ్ ఆహ్వానించారు.
By February 11, 2020 at 10:01AM
No comments