‘బాబూ.. అప్పుడు జగన్ను ఏ చట్టం కింద ఎయిర్పోర్ట్ నుంచి తిప్పి పంపావ్?’
టీడీపీ అధినేత ఉత్తరాంధ్ర పర్యటన సందర్భంగా.. ఆయన్ను వైఎస్సార్సీపీ కార్యకర్తలు వైజాగ్ విమానాశ్రయంలో అడ్డుకున్న సంగతి తెలిసిందే. గంటల తరబడి వాహనంలో నిరీక్షించినప్పటికీ.. అధికార పార్టీ శ్రేణులు ఆయన కాన్వాయ్ను ముందుకు కదలనీయలేదు. దీంతో ఆయన కాలినడకన ముందుకు వెళ్లాలని నిర్ణయించుకున్నారు. కానీ పోలీసులు వారించడంతో ఆయన వెనక్కి తగ్గారు. వైఎస్సార్సీపీ కార్యకర్తలు దారి ఇవ్వకపోవడం, బాబు వాహనంపై చెప్పులు, గుడ్లు, టమోటాలతో దాడి చేయడంతో భద్రతా కారణాల దృష్ట్యా పోలీసులు ఆయన్ను అరెస్ట్ చేశారు. చివరికి ఆయన విమానంలో హైదరాబాద్ చేరుకున్నారు. చంద్రబాబును విశాఖలో అడ్డుకోవడంతో తీవ్ర ఉద్రిక్తతలు తలెత్తాయి. ఓ సందర్భంలో సహనం కోల్పోయిన బాబు.. నా పర్యటనకు అనుమతి ఉన్నా ఎందుకు వెళ్లనీయడం లేదని పోలీసులను ప్రశ్నించారు. పోలీసులు కావాలనే వైసీపీకి అనుకూలంగా వ్యవహరిస్తున్నారంటూ మండిపడ్డారు. నన్ను షూట్ చేయండి, ఎన్కౌంటర్ చేస్కోండంటూ పోలీసులకు ఆయన ఆఫర్ ఇచ్చారు. ఏ చట్టం కింద నన్ను వెనక్కి పంపుతారని ప్రశ్నించారు. విశాఖ ఎయిర్పోర్టులో గురువారం జరిగిన ఘటన గతంలో జగన్కు ఎదురైన అనుభవాన్ని గుర్తుకు తెచ్చింది. అప్పటి ఘటనకు జగన్ రివేంజ్ తీర్చుకున్నారనే ప్రచారం కూడా జరుగుతోంది. వైఎస్సార్సీపీ ఎంపీ చేసిన ట్వీట్ కూడా ఈ వాదనకు బలం చేకూరుస్తున్నట్టుగా ఉండటం గమనార్హం. ‘‘ఏం చట్టం కింద నన్ను వెనక్కు పంపుతారని బట్టలు చించుకుంటున్నాడు. ప్రజల మధ్య విష బీజాలు నాటే వారిని వంద సెక్షన్ల కింద లోపలికి నెట్టొచ్చు. ఏడాది కిందట స్పెషల్ స్టేటస్ కోరే ఆందోళనలో పాల్గొనేందుకు వచ్చిన జగన్ గారిని ప్రజా ప్రతినిధులను ఏ చట్టం కింద ఎయిర్ పోర్టు నుంచి తిప్పి పంపావు?’’ అని విజయసాయి రెడ్డి పరోక్షంగా బాబును ఉద్దేశించి వ్యాఖ్యానించారు. ‘‘జగనన్న గోరుముద్ద, అమ్మ ఒడి కింద ఏటా 15 వేలు, కాలేజి విద్యార్థులకు 20 వేల వసతి దీవెన, ఇంగ్లిష్ మీడియంలో బోధన. విద్యార్థుల భవిష్యత్తు కోసం రూపొందించిన ఇన్ని పథకాలు ఏ రాష్ట్రంలో కనిపించవు. పిల్లల నోరుకొట్టి మీరు తాగే హిమాలయ వాటర్ కు మాత్రం కోట్లు పోశావు కదా బాబూ!’’ అంటూ ఆయన చంద్రబాబుకు చురకలు అంటించారు.
By February 28, 2020 at 10:59AM
No comments