అమెరికా అధ్యక్షుడి భారత్ పర్యటన.. ఖరారు చేసిన వైట్ హౌస్
అమెరికా అధ్యక్షుడు భారత పర్యటన తేదీలను వైట్ హౌస్ అధికారికంగా ఖరారు చేసింది. ఫిబ్రవరి 24, 25 తేదీల్లో ట్రంప్ సతీసమేతంగా భారత్‌లో పర్యటిస్తారని శ్వేత సౌధం తెలిపింది. వీరిద్దరూ న్యూఢిల్లీ, అహ్మదాబాద్‌ల్లో పర్యటిస్తారని వెల్లడించింది. ఇరు దేశాల మధ్య సంబంధాలను, వ్యూహాత్మక భాగస్వామ్యాన్ని బలోపేతం చేయడానికి ట్రంప్ పర్యటన తోడ్పడుతుందని భావిస్తున్నారు. అమెరికా అధ్యక్షుడిగా ట్రంప్ భారత్‌లో పర్యటించనుండటం ఇదే తొలిసారి. ట్రంప్‌తోపాటు ఆయన భార్య మెలీనియా ట్రంప్ కూడా భారత్ వస్తున్నారు. ద్వైపాక్షిక పర్యటనల కోసం సతీసమేతం అమెరికా అధ్యక్షుడు రావడం అరుదుగా జరుగుతుంది. సాధారణంగా అమెరికా అధ్యక్షులు భారత పర్యటనకు వస్తే.. తాజ్‌మహల్‌ను సందర్శిస్తుంటారు. కానీ ట్రంప్ పర్యటన సందర్భంగా తాజ్‌మహల్‌ను సందర్శించే అంశాన్ని వైట్ హౌస్ పేర్కొనలేదు. అమెరికాలో మోదీ పర్యటన సందర్భంగా హూస్టన్‌లో హౌడీ మోదీ అని ప్రచారం చేపట్టగా.. ట్రంప్ పర్యటన సందర్భంగా అహ్మదాబాద్‌లో కెమ్ చో ట్రంప్ (హౌడీ ట్రంప్) కోసం ప్లాన్ చేస్తున్నారు. ట్రంప్, మోదీ ఇద్దరూ కలిసి మొతేరా స్టేడియాన్ని ప్రారంభిస్తారని భావిస్తున్నారు. లక్ష పది వేల మంది కూర్చోగల సామర్థ్యం ఉన్న ఈ స్టేడియం ప్రపంచంలోకెల్లా అతిపెద్ద క్రికెట్ స్టేడియంగా రూపొందనుంది. వాస్తవానికి 2019 రిపబ్లిక్ డే వేడుకల ముఖ్య అతిథిగా ట్రంప్‌ను మోదీ సర్కారు ఆహ్వానించింది. కానీ ఆయన అందుకు అంగీకరించలేదు. అమెరికా అభ్యంతరాలు వ్యక్తం చేసినప్పటికీ.. రష్యా నుంచి ఎస్-400 మిస్సైల్ వ్యవస్థను కొనుగోలు చేసుకోవడం కోసం భారత్ ఒప్పందం చేసుకోవడమే దీనికి కారణమనే వార్తలొచ్చాయి.
By February 11, 2020 at 09:24AM
No comments