యూపీలో బంగారు గనులు: 3వేల టన్నులు కాదు 160 కిలోలే.. జీఎస్ఐ ప్రకటన!
ఉత్తరప్రదేశ్లోని సోన్భద్ర జిల్లాలో 3 వేల టన్నుల బంగారు నిక్షేపాలను జియోలాజికల్ సర్వే ఆఫ్ ఇండియా గుర్తించినట్టు మీడియాలో ప్రచారం సాగుతోన్న విషయం తెలిసిందే. అయితే, ఈ వార్తలను ఖండించిన జీఎస్ఐ... అందులో వాస్తవం లేదని స్పష్టం చేసింది. ఈ మేరకు జీఎస్ఐ డైరెక్టర్ జనరల్ ఎం.శ్రీధర్ శనివారం కోల్కతాలో మీడియాతో మాట్లాడుతూ.. సోన్భద్ర జిల్లాలో భారీ మొత్తంలో బంగారు నిక్షేపాలు గుర్తించలేదని, ఈ నివేదిక తాము ఇవ్వలేదని తెలిపారు. యూపీలోని సోన్భద్ర జిల్లాలో 1998-2000 మధ్య ఖనిజ నిక్షేపాల కోసం అన్వేషణ సాగించామని, బంగారు నిక్షేపాలున్న 52,806.25 టన్నుల క్షేత్రాలు అక్కడ ఉండవచ్చని అంచనాకు వచ్చామన్నారు. ఆ నిక్షేపాలను వెలికి తీసి, శుద్ధిచేస్తే టన్నుకు 3.03 గ్రాముల చొప్పున సాధారణ శ్రేణి బంగారం వస్తుందని, ఆ లెక్కన అక్కడి క్షేత్రాలన్నింటిలో కలిపి మొత్తం 160 కిలోల పసిడిని వెలికి తీయవచ్చని ఆయన పేర్కొన్నారు. దీనికి సంబంధించిన నివేదికను ఉత్తరప్రదేశ్ గనులు మరియు భూగర్బ శాఖతో కలిసి సిద్ధం చేశామన్నారు. బంగారం కోసం జీఎస్ఐ చేసిన అన్వేషణ సంతృప్తికరంగా లేదని, సోన్భద్ర జిల్లాలో పసిడి నిక్షేపాలు అంత ఆశాజనకంగా లేవన్నారు. కాగా, సోన్భద్ర జిల్లా మైనింగ్ అధికారి శుక్రవారం మాట్లాడుతూ.. సోన్పహడ్, హార్డీలో పెద్ద ఎత్తున్న బంగారు నిక్షేపాలు ఉన్నట్టు గుర్తించామని అన్నారు. వీటిని శ్రీధర్ ఖండించారు. సోన్పహాడీలో 2,943 టన్నులు, హార్దీలో 646 టన్నుల బంగారు నిల్వలు ఉన్నట్లు అంచనా వేశామని, ఈ నిక్షేపాలను వెలికితీయడానికి మైనింగ్ కార్యక్రమాన్ని లీజుకు ఇవ్వాలని యూపీ ప్రభుత్వం యోచిస్తున్నట్టు అధికారులు వ్యాఖ్యానించడం గమనార్హం. కేవలం బంగారమే కాదు యురేనియం నిల్వలు కూడా ఉండే అవకాశం ఉందని అంచనా వేస్తున్నట్టు వివరించారు. సోన్భద్రలోని బంగారు నిక్షేపాలు ప్రస్తుతం దేశంలో ఉన్న 618.2 టన్నుల బంగారం కంటే ఐదు రెట్లు ఎక్కువ... దీని విలు రూ.12 లక్షల కోట్లపై మాటే ఉంటుంది... దాదాపు 20 ఏళ్లపాటు ఈ ప్రాంతంలో మైనింగ్కు అవకాశం ఉందని జీఎస్ఐ అంచనా వేసినట్టు మీడియాలో వార్తలు వచ్చాయి.
By February 23, 2020 at 12:21PM
No comments