RRR: అజయ్ దేవగణ్‌తో షూటింగ్ స్టార్ట్ చేసిన రాజమౌళి

తెలుగు సిసినిమా ప్రేక్షకులు ఎంతో ఆసక్తిగా ఎదురు చూస్తున్న భారీ మల్టీస్టారర్‌ ‘RRR’. యంగ్ టైగర్ ఎన్టీఆర్‌, మెగా పవర్ స్టార్ రామ్‌ చరణ్‌ హీరోలుగా, దర్శకధీరుడు ఎస్‌.ఎస్‌.రాజమౌళి ప్రతిష్టాత్మకంగా ఈ చిత్రాన్ని తెరకెక్కిస్తున్నారు. శరవేగంగా చిత్రీకరణ జరుపుకొంటున్న ఈ సినిమాను జులై 30న విడుదల చేయనున్నట్లు చిత్ర బృందం ఇప్పటికే ప్రకటించింది. అయితే, ఈ సినిమా విడుదల తేదీ మారనున్నట్టు తాజాగా వార్తలు వినిపిస్తున్నాయి. ఇదిలా ఉంటే, బాలీవుడ్ నటుడు అజయ్ దేవగణ్ RRRలో నటిస్తోన్న విషయం తెలిసిందే. ఇప్పటి వరకు జరిగిన షెడ్యూల్స్‌లో ఈయనపై సన్నివేశాలను చిత్రీకరించలేదు. మంగళవారం నుంచి అజయ్ దేవగణ్ షెడ్యూల్ ప్రారంభమవుతుంది. ఈ మేరకు చిత్ర యూనిట్ ప్రకటించింది. అజయ్ దేవగణ్ షూటింగ్‌లో పాల్గొన్నారని చెబుతూ ఆయన రాజమౌళితో దిగిన ఫొటోలను కూడా విడుదల చేసింది. ఈ షెడ్యూల్‌లో అజయ్ దేవగణ్‌తో పాటు ఎన్టీఆర్, రామ్ చరణ్ కూడా పాల్గొంటారు. సినిమా వాయిదా పడుతుందా..? RRR సినిమా అనుకున్న తేదీకి విడుదలవ్వడం కష్టమని కచ్చితంగా వాయిదా పడుతుందని గత కొద్దిరోజులుగా టాలీవుడ్‌లో వినిపిస్తోన్న వార్త. అయితే, బాలీవుడ్‌కు చెందిన ప్రముఖ సినీ విశ్లేషకుడు తరణ్ ఆదర్శ్ రెండు రోజుల క్రితం చేసిన ఒక ట్వీట్ ఈ రూమర్‌కు బలం చేకూరుస్తోంది. ‘‘ఎక్స్‌క్లూజివ్‌: విశ్వసనీయ వర్గాల సమాచారం ప్రకారం.. దక్షిణాదికి చెందిన బ్లాక్‌బస్టర్‌ డైరెక్టర్‌ దర్శకత్వంలో తెరకెక్కుతున్న సినిమా విడుదల తేదీ మారనుంది. ఈ భారీ చిత్రం అక్టోబరు 2020లో వచ్చే అవకాశం ఉంది’’ అని తన ట్వీట్‌లో తరణ్ ఆదర్శ్ పేర్కొన్నారు. ఈ ట్వీట్ ఒక్కసారిగా ట్రెండింగ్‌లోకి వచ్చింది. తరణ్ ఆదర్శ్ ట్వీట్ చేసింది RRR సినిమా గురించేనంటూ చర్చ మొదలైంది. అయితే, ఆయన ట్వీట్ చేసింది ‘కేజీఎఫ్ ఛాప్టర్ 2’ సినిమా గురించి అని వాదించే వాళ్లు కూడా ఉన్నారు.

By January 21, 2020 at 11:47AM

Read More https://telugu.samayam.com/telugu-movies/cinema-news/bollywood-star-ajay-devgn-starts-shooting-for-ss-rajamoulis-rrr/articleshow/73473783.cms