ట్రంప్ తెంపరితనం.. అది యుద్ధ నేరాల కిందకు వస్తుందని తెలియదా?
అగ్రరాజ్యం అమెరికా వ్యవహార శైలిపై యావత్ ప్రపంచం నివ్వెరపోతుంది. అమెరికా తాజా చర్యలు పశ్చిమ ఆసియాలో ఉద్రిక్తతలు కారణమవుతున్నాయి. బాగ్దాద్‌ విమానాశ్రయంపై రాకెట్ దాడికి పాల్పడి ఇరాన్ సైన్యాధిపతి సులేమానీని హతమార్చిన ట్రంప్ సర్కారు.. యుద్ధాన్ని ఆపడానికే ఈ చర్యలు చేపట్టాల్సి వచ్చిందని సమర్థించుకుంటున్నారు. అంతేకాదు, ఆయనపై ఉగ్రవాద ముద్రవేసి సరికొత్త వాదాన్ని తెరపైకి తీసుకొచ్చారు. ఇరాక్‌ సిరియాల్లో ఇస్లామిక్‌ ఉగ్రవాదులను మట్టుబెట్టడానికి పరోక్షంగా అమెరికాకు సహకరించిన విషయం అగ్రరాజ్యాధినేత మరిచిపోయారు. తమ సైన్యాధిపతి హత్యకు ప్రతీకారం తీర్చుకుంటామని ఇరాన్ శపథం చేయడంతో మూడో ప్రపంచం యుద్ధం తప్పదనే భావన మొదలైంది. ఇరాన్‌‌తో గతంలో ఒబమా ప్రభుత్వం కుదుర్చుకున్న అణు ఒప్పందం నుంచి ఏకపక్షంగా వైదొలగిన ట్రంప్ సర్కారు మాటలకు చేతలకు పొంతన లేని విధానాల్ని అనుసరిస్తోంది. సెప్టెంబరు 11 ఉగ్రదాడులకు, సులేమానీ హత్యతో ముడిపెడుతూ తన తప్పిదాల్ని కప్పిపుచ్చేందుకు అమెరికా తీవ్రంగా ప్రయత్నిస్తోంది. సున్నీ, షియా వర్గాల మధ్య వైషమ్యాలతో రణక్షేత్రంగా మారిన పశ్చిమాసియాలో అమెరికా చర్యలు మరింత ఆజ్యం పోశాయి. ఉగ్రవాదాన్ని ఉక్కుపాదంతో అణచివేస్తామంటూ రెండు దశాబ్దాల కిందట ఇరాక్‌పై భయానక దాడులకు తెగబడి అమెరికా సృష్టించిన మారణహోమం ఇంకా చల్లారలేదు. తాజాగా, ట్రంప్ దుందుడుకు చర్యలు మరోసారి ఇరాన్-ఇరాక్‌లో యుద్ధ మేఘాలు కమ్ముకున్నాయి. కాగా, తమపై ప్రతీకార దాడులకు ఇరాన్ పాల్పడితే.. ఆ దేశంలోని ముఖ్యమైన చరిత్రాత్మక ప్రదేశాలను బాంబులతో కూల్చివేస్తామని ట్రంప్ హెచ్చరించడం గమనార్హం. ఇరాన్ చరిత్రకు, సంస్కృతికి వారసత్వ సంపదగా ఉన్న 52 ప్రాంతాలను తాము కూల్చేస్తామని ట్రంప్ బహిరంగంగా హెచ్చరించడంపై ప్రపంచ దేశాలు, మేధావులు ఆశ్చర్యపోతున్నాయి. శత్రువుల సైనిక స్థావరాల లక్ష్యాన్ని మించి వారి వారసత్వ సంపదలను నాశనం చేస్తామని బెదిరించడం చూస్తుంటే అఫ్గన్‌లో తాలిబన్లు కూల్చివేసిన యునెస్కో వారసత్వ సంపద బొమియన్ బుద్ధతో విశ్లేషకులు పోల్చుతున్నారు. అంతేకాదు, వారసత్వ కట్టడాలపై దాడిచేస్తామని ట్రంప్ బెదిరింపులకు పాల్పడటం అంటే యుద్ధ నేరాల కిందకు వస్తుందని ఒబామా హయాంలో కీలక అధికారిగా ఉన్న కొలిన్ కహల్ పేర్కొన్నారు.
By January 06, 2020 at 09:06AM
No comments