ఇరాన్ ప్రతీకారేచ్ఛ.. అమెరికా బలగాలన్నీ ఉగ్ర జాబితాలోకి.. ట్రంప్‌కి షాకిచ్చిన పెంటగాన్
సులేమానీ హత్యతో ఇరాన్, అమెరికా మధ్య యుద్ధ మేఘాలు కమ్ముకున్నాయి. ప్రతీకారేచ్ఛ, ట్రంప్ హెచ్చరికల కారణంగా.. ప్రపంచం మొత్తాన్ని యుద్ధం ముప్పు భయపెడుతోంది. ఇరాన్‌లోని 52 ప్రాంతాలను టార్గెట్ చేశామని.. ప్రపంచంలోని అత్యాధునిక సైనిక వ్యవస్థ మా సొంతమని ఇరాన్‌ను ట్రంప్ హెచ్చరించారు. మరోవైపు ఇరాన్ కూడా ఏమాత్రం వెనక్కి తగ్గేది లేదనే సంకేతాలు ఇస్తోంది. టాప్ మిలటరీ కమాండర్ సులేమానీని హతమార్చిన అమెరికా బలగాలన్నింటిని ఉగ్రవాదులుగా పేర్కొంటూ.. ఇరాన్ పార్లమెంట్ ఓ బిల్లును ఆమోదించింది. ఈ బిల్లు ప్రకారం అమెరికాకు చెందిన అన్ని భద్రతా బలగాలు, పెంటాగాన్ ఉద్యోగాలు, అనుబంధ సంస్థలు, ఏజెంట్లు, కమాండర్లు.. సులేమానీ హత్యకు ఆదేశించిన వారందర్నీ ఉగ్రవాదులుగా ఇరాన్ పేర్కొంది. ఈ బలగాలకు మిలిటరీ, ఇంటెలిజెన్స్, ఆర్థిక, సాంకేతిక, సేవా తదితరాలుగా సహకరించేవారని ఉగ్రవాదులకు సహకరించే వారిగా గుర్తిస్తామని ఇరాన్ ప్రకటించింది. సులేమానీ హత్యకు ప్రతీకారం తీర్చుకోవడం కోసం తమ ముందు 13 మార్గాలున్నాయని ఇరాన్ సెక్యూరిటీ కౌన్సిల్ సెక్రటరీ తెలిపారు. ఇరాన్ చారిత్రక స్థలాలపై దాడి చేస్తామని ట్రంప్ హెచ్చరించగా.. అమెరికా విషయంలో అది మాకు అత్యల్ప ప్రాధాన్యమైన అంశమని ఇరాన్ జాతీయ భద్రతా మండలి కార్యదర్శి తెలిపారు. ఒబామా ప్రభుత్వం సులేమానీని ఉగ్రవాదిగా గుర్తించిందన్న ట్రంప్.. ఇరాన్‌కు 150 బిలియన్ డాలర్ల సాయం చేయడం మినహా ఒబామా సర్కారు చేసిందేమీ లేదన్నారు. ఇరాన్ దగ్గర అణ్వాయుధాలేవీ ఉండబోవంటూ ఆయన ట్వీట్ చేశారు. కాగా ఇరాన్‌లోని సాంస్కృతిక కట్టడాలను టార్గెట్ చేస్తామన్న ట్రంప్ హెచ్చరికలను పెంటగాన్ తిరస్కరించింది.
By January 07, 2020 at 01:59PM
No comments