ఏడాదిలోగా జగన్ సతీమణి సీఎం అవుతారు: జేసీ సంచలన వ్యాఖ్యలు
ఏపీ రాజకీయాలపై టీడీపీ నేత, మాజీ ఎంపీ మరోసారి సంచలన వ్యాఖ్యలు చేశారు. ఏడాదిలోగా జగన్ సతీమణి భారతి సీఎం కాబోతున్నారని ఆయన జోస్యం చెప్పారు. జగన్ నమ్మకాన్ని కోల్పోయారన్న ఆయన.. పరిశ్రమలు రాష్ట్రం నుంచి పొరుగు రాష్ట్రాలకు తరలివెళ్తున్నాయన్నారు. అమరావతినే రాజధానిగా కొనసాగించాలంటూ మందడంలో దీక్ష చేస్తున్న రైతులకు.. టీడీపీ అధినేత చంద్రబాబు దంపతులతోపాటు మాజీ ఎంపీలు జేసీ దివాకర్రెడ్డి, మాగంటి బాబు సంఘీభావం తెలిపారు. ఈ సందర్భంగా జేసీ దివాకర్ రెడ్డి ఈ వ్యాఖ్యలు చేశారు. ఒకరి మూర్ఖత్వం వల్ల మనకు ఈ పరిస్థితి వచ్చిందంటూ జేసీ పరోక్షంగా సీఎంపై విమర్శలు గుప్పించారు. విశాఖలో రాజధాని ఏర్పాటుకు జగన్ నిర్ణయం మాత్రమే సరిపోదన్న ఆయన.. అందరి అభిప్రాయాలను పరిగణనలోకి తీసుకోవాలన్నారు. మనిషికి తల ఎంత ముఖ్యమో రాజధానికి సచివాలయం, శాసనసభ అంతే ముఖ్యం. ఏడు నెలలుగా విజయసాయి రెడ్డి వైజాగ్లో తిష్ట వేశాడన్న జేసీ.. అక్కడ వైఎస్ఆర్సీపీ నేతలు భూములు కొనుగోలు చేశారని అర్థం వచ్చేలా వ్యాఖ్యానించారు. అమరావతిలో కేవలం కమ్మ వాళ్లు మాత్రమే భూములు కొనుగోలు చేయలేదన్నారు. ఎన్నికల్లో జగన్కు తెలంగాణ సీఎం కేసీఆర్ ఆర్థిక సాయం చేశాడని.. అందుకే జగన్ మన రక్తాన్ని పీల్చి కేసీఆర్కు రెట్టింపు చెల్లించాడంటూ జేసీ ఆరోపణలు గుప్పించారు. జగన్.. తాతకు దగ్గులు నేర్పించొద్దని జేసీ దివాకర్రెడ్డి వ్యాఖ్యానించారు.
By January 15, 2020 at 12:30PM
No comments