ముజఫర్‌పూర్ హర్రర్: బాలికల హత్యకు ఆధారాల్లేవన్న సీబీఐ.. మరి అప్పుడెందుకలా చెప్పారు?

రెండేళ్ల వెలుగులోకి వచ్చిన బీహార్‌లోని ముజఫర్‌‌పూర్ షెల్టర్ హోం బాలికల ఉదంతం దేశవ్యాప్తంగా సంచలనం సృష్టించిన విషయం తెలిసిందే. ప్రస్తుతం ఈ కేసులో దర్యాప్తు కొనసాగుతోంది. తాజాగా, ఈ కేసు పురోగతికి సంబంధించిన నివేదికను సుప్రీంకోర్టుకు సీబీఐ సమర్పించింది. ముజఫర్‌నగర్‌ షెల్టర్ హోం బాలికలు హత్యకు గురైనట్టు ఆధారాలు లభించలేదని అందులో తెలిపింది. వేధింపులకు గురైన 35 మంది బాలికలు మరోచోట సజీవంగానే ఉన్నారని తెలిపింది. అయితే ఓ మహిళ, మరో పురుషుడికి సంబంధించిన అస్థిపంజరాలు మాత్రం లభించాయని వెల్లడించింది. ముజఫర్‌నగర్‌లో ఓ స్వచ్ఛంద సంస్థ ఆధ్వర్యంలో నిర్వహిస్తోన్న షెల్టర్ హోంలోని బాలికలను శారీరకంగా, మానసికంగా వేధింపులకు గురిచేసినట్టు టాటా ఇన్‌స్టిట్యూట్‌ ఆఫ్‌ సోషల్‌ సైన్సెస్‌ అధ్యయనంలో వెల్లడయ్యింది. దీనికి సంబంధించిన వీడియోలు బయటకు రావడంతో సంచనలంగా మారింది. ఈ కేసును ప్రస్తుతం ప్రధాన న్యాయమూర్తి జస్టిస్‌ ఎస్‌.ఎ.బోబ్డే నేతృత్వంలోని ధర్మాసనం బుధవారం విచారణ చేపట్టింది. సీబీఐ తరఫున అటార్నీ జనరల్‌ కె.కె.వేణుగోపాల్‌ వాదనలు వినిపించారు. ముజఫర్‌నగర్‌ సహా బిహార్‌లోని మొత్తం 17 షెల్టర్ హోమ్స్‌లోని బాలికలు వేధింపులకు గురవుతున్న విషయమై సీబీఐ విచారణ చేపట్టిందని అటార్నీ జనరల్ కోర్టుకు తెలియజేశారు. మొత్తం 13 గృహాలపై న్యాయస్థానాల్లో ఛార్జిషీట్లను సమర్పించిందని, నాలుగు కేసుల్లో ప్రాథమిక ఆధారాల్లేవని, ఒక కేసులో విచారణ పూర్తయిందని వేణుగోపాల్‌ వివరించారు. అంతేకాదు, తోటి బాలికలు హత్యకు గురైనట్టు షెల్టర్ హోంలోని అక్కడ బాలికలు గతంలో ఇచ్చిన వాంగ్మూలంలో వాస్తవం లేదని నేషనల్‌ ఇన్‌స్టిట్యూట్‌ ఆఫ్‌ మెంటల్‌ హెల్త్‌ అండ్‌ న్యూరో సైన్సెస్‌ నిపుణులు తేల్చినట్టు ఆయన పేర్కొన్నారు. అయితే, షెల్టర్ హోం నుంచి అదృశ్యమైన 11 మంది బాలికలను హత్య చేసినట్లు గతేడాది మేలో సీబీఐ అధికారులు పేర్కొవడం గమనార్హం. ఈ కేసులో కీలక నిందితుడు బ్రజేష్‌ ఠాకూర్‌.. ఆ బాలికలను దారుణంగా హత్య చేశాడని సుప్రీంకోర్టుకు సీబీఐ తెలిపింది. బ్రజేష్‌ ఠాకూర్, అతడి సహచరులు కలిసి చిన్నారులను హత్యచేసి పూడ్చి పెట్టారని.. ఆ ప్రాంతం నుంచి ఎముకల పోగులను తవ్వి తీసి స్వాధీనం చేసుకున్నామని సీబీఐ వెల్లడించింది. ఆశ్రమంలో బాధిత బాలికలు తెలిపన వివరాల ప్రకారం.. ఆ 11 మంది బాలికల పేర్లు వెలుగులోకి వచ్చినట్లు సీబీఐ తన అఫిడవిట్‌లో వివరించింది.

By January 09, 2020 at 09:05AM

Read More https://telugu.samayam.com/latest-news/india-news/cbi-says-to-supreme-court-no-evidence-of-murder-of-girls-in-muzaffarpur-shelter-home-case/articleshow/73165728.cms