చైనాలో 56కి చేరిన కరోనా మృతులు.. అదే జరిగితే 6.5 కోట్ల మంది ప్రాణాలకు ముప్పు!
చైనాలో మృతుల సంఖ్య 56కు చేరుకుంది. అంతేకాదు, 2000కిపైగా కరోనా వైరస్ కేసులు నమోదైనట్టు చైనా జాతీయ ఆరోగ్య కమిషన్ ఆదివారం ప్రకటించింది. శనివారం నాడు 15 మందికిపైగా ప్రాణాలు కోల్పోయారని, కొత్తగా మరో 688 మందిలో కరోనా వైరస్ లక్షణాలు బయటపడినట్టు తెలిపింది. శనివారం హుబే ప్రావిన్సుల్లో 13 మంది, షాంఘైలో ఒకరు మృతిచెందారు. కరోనా వైరస్తో ఒక్క హుబే ప్రావిన్సుల్లోనే ఇప్పటి వరకు 52 మంది చనిపోగా, హెలాంగ్జియాంగ్లో ఒకరు, హెబేలో ఒకరు మృత్యువాతపడ్డారు. హుబే ప్రావిన్సుల్లో కొత్తగా మరో 323 కరోనా వైరస్ కేసులు గుర్తించినట్టు ఆ ప్రాంతానికి చెందిన ఆరోగ్య విభాగం అధికారులు ప్రత్యేకంగా ఓ ప్రకటన వెలువరించింది. దేశవ్యాప్తంగా 1,975 కేసులు నమోదయినట్టు అధికార వర్గాలు పేర్కొన్నాయి. మరోవైపు, చైనా అత్యంత భయంకరమైన పరిస్థితిని ఎదుర్కొంటోందని ఆ దేశాధినేత జీ జింగ్పింగ్ వ్యాఖ్యానించారు. చైనా నూతన సంవత్సర వేడుకల వేళ కరోనా వైరస్ వెలుగుచూడటంతో అధికార యంత్రాంగం మరింత ఆందోళనకు గురువుతోంది. కరోనా వైరస్ తొలిసారి బయటపడిన వుహాన్లో ఇప్పటి వరకు ఏడుగురు ప్రాణాలు కోల్పోగా, మరో 46 మందిలో దీని లక్షణాలు గుర్తించినట్టు వైద్యులు తెలిపారు. ఇప్పటికే వుహాన్ సహా మొత్తం 12 నగరాల్లో ప్రజా రవాణా వ్యవస్థ నిలిచిపోయింది. విమానాశ్రయాలు, రైల్వే స్టేషన్లను మూసివేసి ప్రయాణాలపై ఆంక్షలు విధించారు. వైద్యసేవల కోసం మిలటరీ డాక్టర్లను చైనా ప్రభుత్వం రంగంలోకి దింపింది. అలాగే 1000 పడకల ప్రత్యేక హాస్పిటల్ నిర్మాణం శరవేగంగా జరుగుతోంది. ఇది ఫిబ్రవరి 3 నాటికి అందుబాటులోకి రానుంది. ఇదిలా ఉండగా, చైనా సహా 11 దేశాలకు విస్తరించిన ప్రాణాంతక ‘కరోనా వైరస్’ ఏడాదిన్నరలోనే ప్రపంచంలోని అన్ని మూలలకు విస్తరించి, ఆరున్నర కోట్ల మందిని పొట్టనబెట్టుకునే ప్రమాదం ఉందని అమెరికాలోని ప్రతిష్టాత్మక ‘జాన్స్ హాప్కిన్స్ సెంటర్ ఫర్ హెల్త్ సెక్యూరిటీ’ హెచ్చరించింది. చైనాలో కరోనావైరస్ బయట పడడానికి రెండు నెలల ముందు, అంటే గత అక్టోబర్లోనే ఇలాంటి ప్రాణాంతక వైరస్ ఎన్ని నెలల్లో ప్రపంచ దేశాలకు విస్తరిస్తుంది ? ఎంత మంది మరణిస్తారు? అన్న అంశంపై కంప్యూటర్ సిములేషన్ ద్వారా అంచనా వేసి ఈ విషయాన్ని వెల్లడించింది.
By January 26, 2020 at 11:17AM
No comments