పేద పిల్లల కోసం 300 కోట్ల ఆస్తిని దానంగా ఇచ్చిన మనసున్న మా‘లక్ష్మి’
ఒకప్పుడు సినీతారలు, వ్యాపార వేత్తలకు అత్యంత ఇష్టమైన బెంగళూరు నగరం నడిబొడ్డున ఉన్న హోటల్‌ ఇప్పుడు కొంత రూపు సంతరించుకోనుంది. వందల కోట్ల విలువైన ఈ ఆస్తిని యజమాని పేదల కోసం దానంగా ఇచ్చి తన గొప్ప మనస్సు చాటుకుంది. సిలికాన్ సిటీ బెంగళూరులో ఒక్క అడుగు భూమి విలువ లక్షల్లోనే ఉంటుంది. ఇక, వాణిజ్య, వ్యాపార, సినీ పరిశ్రమకు కేంద్రమైన ప్రాంతంలో దీని విలువ గురించి చెప్పనక్కర్లేదు. గాంధీనగర్‌లోని రూ.300 కోట్ల విలువచేసే ఆస్తిని ఆ యజమాని మీరా నాయుడు క్యాన్సర్‌తో బాధపడే బాలల సంక్షేమం కోసం దానం చేశారు. గాంధీనగరలోని లక్ష్మీ హోటల్‌ అంటే తెలియనవారు ఉండరు. గతంలో సినీ ప్రముఖులకు ఎంతో ఇష్టమైన ఈ హోటల్‌ లక్ష్మీ బాలల ఆరోగ్య కేంద్రంగా మారనుంది. ఈ హోటల్ను రూ.300 కోట్లు చెల్లించి కొనుగోలు చేయడానికి చాలా మంది ముందుకు వచ్చినా తిరస్కరించిన .. కేన్సర్‌తో బాధపడే గ్రామీణ ప్రాంతాల నుంచి వచ్చే పేద బాలల కోసం ఆ భవనాన్ని కేటాయించాలని ఆమె నిర్ణయించారు. దీంతో పేదలకు ఉచితంగా చికిత్స అందిస్తున్న నగరంలోని శంకర్ కేన్సర్ హాస్పిటల్‌కు దానంగా ఇచ్చారు. దీనిపై మీరానాయుడు మాట్లాడుతూ..తన భర్త శ్రీనివాసనాయుడు ఎంతో కష్టపడి ఈ హోటల్ను కట్టించారని, ఆయన మరణం తరువాత అనేక మార్పులు చోటుచేసుకున్నాయని అన్నారు. ఆయన గౌరవార్ధం ఈ భవనాన్ని పేద బాలలకు దానం చేస్తున్నందుకు నాకు ఎంతో సంతోషంగా ఉందన్నారు. క్యాన్సర్‌ చికిత్స కోసం వచ్చి నెలల తరబడి నగరంలో ఉండడం పేదలకు ఎంత కష్టమో తనకు తెలుసని, అందుకే ఈ నిర్ణయం తీసుకున్నానని మీరా స్పష్టం చేశారు. మూడు అంతస్తుల ఈ భవనంలో 32 గదులుండగా ప్రతి అంతస్తులో కొత్తగా కిచెన్ నిర్మిస్తారు. చికిత్స కోసం వచ్చే చిన్నారులు, వారి తల్లిదండ్రులు ఇక్కడే ఉచిత వసతి, భోజనం కల్పించనున్నారని ఆమె వివరించారు. త్వరలోనే సేవలను అందుబాటులోకి తెస్తామని ప్రకటించారు. మీరానాయుడు నిర్ణయంపై శంకర్ కేన్సర్ హాస్పిటల్‌లో వైద్యుడిగా పనిచేస్తున్న ఆమె మేనల్లుడు అరుణ్ నాయుడు హర్షం వ్యక్తం చేశారు. ఈ హెటల్‌ను మావయ్య ఎలా నిర్మించారో తనకు తెలుసని, దీనిని చిన్నారుల కేన్సర్ సెంటర్‌కు దానం చేసి ఆయనకు ఘనమైన నివాళి అర్పించారని వ్యాఖ్యానించారు.
By January 04, 2020 at 10:38AM
No comments