‘కరోనా’తో వణుకుతున్న చైనా: 25కి చేరిన మృతులు.. మరో 8 సిటిల్లో రవాణా బంద్!
సరిగ్గా చైనా నూతన సంవత్సర వేడుకలకు ముందు భూతం డ్రాగన్ను వెంటాడుతోంది. జంతువుల నుంచి మనిషికి వ్యాప్తిచెందే ఈ వైరస్.. మనిషి నుంచి మనిషి కూడా సోకుతున్నట్టు గుర్తించారు. ఇప్పటికే కరోనా వైరస్ కారణంగా చైనాలో 25 మంది మృత్యువాతపడగా, మరో 800పైగా కేసులు నమోదుకావడంతో మరింత ఆందోళనకలిగిస్తోంది. కరోనా తొలి కేసు గుర్తించిన వుహాన్లో ఇప్పటికే ప్రజా రవాణాను అధికారులు నిలివేయగా, తాజాగా మరో ఎనిమిది నగరాల్లో రవాణాపై ఆంక్షలు విధించారు. బ్రిడ్జ్లు, విమానాశ్రయాలు, రైల్వే స్టేషన్లను మూసివేయడంతో ప్రయాణాలు నిలిచిపోయాయి. హుబా ప్రావిన్సుల్లోని హునగ్షీలో శుక్రవారం నుంచి ప్రజా రవాణాను నిలిపివేశారు. యాంగ్జీ నది పక్కన ఉన్న ఈ నగర జనాభా 2.4 మిలియన్ల మంది కాగా, బస్ స్టేషన్లు, రైల్వే స్టేషన్లను మూసివేశారు. అలాగే, హుబా ప్రావిన్సుల్లోని 10 లక్షల జనాభా కలిగిన మరో నగరం చించాగ్లోనూ గురువారం సాయంత్రం నుంచి దూర ప్రయాణాలు నిలిచిపోయాయి. ట్రావెల్స్, ప్రజా రవాణాను రద్దుచేశారు. ప్రాణాంతక కరోనా వైరస్ వేగంగా వ్యాప్తిచెందుతుందని, దీని వల్ల ఇప్పటి వరకు 25 మంది చనిపోయారని, మరో 800 మందిలో దీని లక్షణాలు కనిపించాయని అధికారులు తెలిపారు. తొలిసారిగా కరోనా వైరస్ను హుబా ప్రావిన్సుల్లోని వుహాన్ నగరంలోని సముద్ర ఆహార ఉత్పత్తుల మార్కెట్లో గుర్తించారు. ఈ వైరస్కు సార్స్కు దగ్గర పోలికలు ఉండటంతో చైనా ఆందోళన చెందుతోంది. సార్స్ భూతానికి 2002-03 ఏడాది చైనా, హంకాంగ్ల్లో 650 మందిపైగా చనిపోయారు. నాటి పరిస్థితులే ఇప్పుడూ గోచరించడంతో వీలైనంత ప్రాణనష్టం తగ్గించి, వైరస్ను నివారించడానికి చైనా ప్రయత్నిస్తోంది. ఇందులో భాగాంగానే వుహాన్ నగరం నుంచి ఎవరూ బయటకు వెళ్లకుండా, ఇతర ప్రాంతాల నుంచి కొత్తవారిని లోనికి రాకుండా రవాణాను నిలిపివేశారు. షాంటామ్, చిబి, ఇజహౌ, హుగాంగ్, లించువాన్ నగరాల్లోనూ రవాణను నిలిపివేసిన అధికారులు.. ప్రజలు సమూహాలుగా ఉండరాదని పేర్కొన్నారు. అత్యవసర సమయాల్లో బయటకు వెళ్తే నాణ్యమైన మాస్క్లు ధరించాలని సూచించారు. ట్రావెల్ ఏజెన్సీల కార్యకలాపాలను నిలిపివేసి, దూర ప్రయాణాలు రద్దుచేశారు. ఆన్లైన్ ట్యాక్సీ సేవలను కూడా అత్యవసరంగా నిలివేశారు.
By January 24, 2020 at 10:55AM
No comments