CAAపై అట్టుడికిన యూపీ: 10 మంది మృతి.. ఒక్క తూటా కూడా పేల్చలేదన్న డీజీపీ!

పౌరసత్వ సవరణ చట్టానికి వ్యతిరేకంగా చేపట్టిన నిరసనలతో యావత్‌ దేశం అట్టుడుకుతోంది. యూపీలో శుక్రవారం జరిగిన ఆందోళనల్లో 10 మంది ప్రాణాలు కోల్పోయారు. మరో 50 మందికిపైగా తీవ్రంగా గాయపడ్డారు. అయితే, పోలీసులు మాత్రం ఆరుగురే మృతిచెందినట్టు ప్రకటించారు. అంతేకాదు, పోలీసులు ఒక్క బుల్లెట్ కూడా పేల్చలేదని యూపీ డీజీపీ ఓపీ సింగ్ వ్యాఖ్యానించడం గమనార్హం. ఉత్తర్‌ప్రదేశ్‌లో రెండు రోజుల్లోనే పౌరసత్వ సవరణ చట్టానికి వ్యతిరేకంగా జరుగుతున్న ఆందోళనల్లో 11 మంది చనిపోయారు. మొత్తం 21 జిల్లాల్లో ఉద్రిక్త పరిస్థితులు నెలకున్నాయి. దేశ రాజధాని ఢిల్లీ సహా పలు నగరాల్లో వేలాది మంది రోడ్లపైకి వచ్చిన నిరసనలు, ఆందోళనలు నిర్వహించారు. జాతీయ పతాకాన్ని చేతబట్టి ‘రాజ్యాంగాన్ని రక్షించండి’ అంటూ నినదించారు. యూపీ, మహారాష్ట్ర, బెంగాల్ సహా పలు రాష్ట్రాల్లో నిరసనలు హింసాత్మకంగా మారాయి. సీఏఏతోపాటు ఎన్‌ఆర్‌సీకి వ్యతిరేకంగా గళమెత్తారు. మరోవైపు, పరిస్థితి రోజు రోజుకూ చేయిదాటడంతో కేంద్ర ప్రభుత్వంలో కాస్త కదలిక వచ్చింది. సీఏఏపై సూచనలను స్వీకరించేందుకు సిద్ధమని ఉన్నతాధికారి ఒకరు వెల్లడించారు. కొత్త చట్టంపై ప్రజల్లో నెలకొన్న ఆందోళనలు, భయాలను తొలగించడానికి పలు ప్రయత్నాలు చేస్తున్నట్లు ఆయన వెల్లడించారు. సీఏఏపై ఆందోళనలతో ఉత్తర్‌‌ప్రదేశ్‌ రణరంగాన్ని తలపిస్తోంది. గోరఖ్‌పూర్‌, సంభాల్‌, భదోహి, బహ్రయిచ్‌, బులంద్‌శహర్‌, ఫిరోజాబాద్‌ సహా పలు ప్రాంతాల్లో శుక్రవారం ప్రార్థనల అనంతరం నిరసనకారులు చెలరేగిపోయారు. పోలీసులపై రాళ్లు రువ్వి, వాహనాలకు నిప్పంటించారు. నిరసనలు హింసాత్మకంగా మారడంతో పోలీసులు బాష్పవాయు గోళాలు ప్రయోగించి, రబ్బరు బుల్లెట్లతో కాల్పులు జరిపారు. పోలీసు కాల్పుల్లో మీరట్‌లో నలుగురు, బిజ్నోర్‌లో ఇద్దరు, సంభాల్‌, ఫిరోజాబాద్‌లలో ఒక్కొక్కరి చొప్పున మృత్యువాతపడ్డారని యూపీ డీజీపీ వెల్లడించారు. ఆందోళనకారుల దాడిలో 50 మందికిపైగా పోలీసులు తీవ్రంగా గాయపడ్డారని చెప్పారు. కాన్పూర్‌లో మరొకరు మరణించినట్లు అధికారవర్గాలు తెలిపాయి. మరోవైపు, వారణాసి, లక్నో సహా 21 జిల్లాల్లో ఇంటర్నెట్ సేవలను తాత్కాలికంగా నిలిపివేశారు. లక్నోలో గురువారం నాడు జరిగిన ఆందోళనల్లో ఒకరు చనిపోగా, శుక్రవారం యూపీ వ్యాప్తంగా ఆందోళనలు కొనసాగాయి. మీరట్‌లో పరిస్థితులు దారుణంగా తయారయ్యాయి. పోలీసుల కాల్పుల్లో తీవ్రంగా గాయపడి మీరట్ మెడికల్ కాలేజీ హాస్పిటల్‌లో చికిత్స పొందుతూ నలుగురు ప్రాణాలు కోల్పోయారు. మొత్తం 200 మందిని అరెస్టుచేసినట్టు పోలీసులు తెలిపారు. అటు మహారాష్ట్రలోని ఔరంగాబాద్‌లో 72 గంటలపాటు 144 సెక్షన్ విధించారు.

By December 21, 2019 at 09:24AM

Read More https://telugu.samayam.com/latest-news/india-news/ten-people-were-killed-as-protests-against-caa-turned-violent-in-uttar-pradesh/articleshow/72911358.cms