ఉత్తరాదిని వణికిస్తున్న చలి: పొగమంచు కారణంగా ప్రమాదం.. ఆరుగురు మృతి

గత మూడు రోజులుగా ఉత్తరాదితో సహా దేశవ్యాప్తంగా ఉష్ణోగ్రతలు అమాంతం పడిపోవడంతో జనం చలికి వణుకుతున్నారు. పొగ మంచు దట్టంగా కమ్మేయడంతో ప్రమాదాలు చోటుచేసుకుంటున్నాయి. పొగ మంచు కారణంగా ఆదివారం అర్ధరాత్రి దాటిన తర్వాత యూపీలో ఆరుగురు మృత్యువాతపడ్డారు. పొగమంచు దట్టంగా అలముకోవడంతో వెలుతురు లేమితో గ్రేటర్‌ నోయిడాలో ఓ కారు అదుపు తప్పి కెనాల్‌లోకి దూసుకెళ్లింది. ఈ ఘటనలో ఆరుగురు మృతి చెందగా, మరో ఐదుగురు గాయపడ్డారు. వీరిలో ఇద్దరు మైనర్లు ఉన్నారు. బాధితులు యూపీలోని సంభాల్ నుంచి ఢిల్లీకి వెళ్తుండగా ప్రమాదం సంభవించింది. పొగమంచు కారణంగా రహదారి సరిగ్గా కనిపించకపోవడమే ప్రమాదానికి కారణమని పోలీసులు ప్రాథమికంగా నిర్ధారించారు. సంభాల్‌కు చెందిన 11 మంది మారుతి ఎర్టిగాలో ఢిల్లీకి వెళ్తుండగా ఖరేలి కాల్వలోకి వాహనం దూసుకెళ్లింది. ప్రమాదం గురించి సమాచారం అందుకున్న పోలీసులు ఘటనా స్థలికి చేరుకుని సహాయక చర్యలు చేపట్టారు. గాయపడిన 11 మందిని హాస్పిటల్‌కు తరలించగా, అప్పటికే ఆరుగురు చనిపోయినట్టు వైద్యులు ధ్రువీకరించారు. మృతులు మహేశ్ (35), కిషన్‌లాల్ (50), నీరేశ్ (17), రామ్ ఖైలాదీ (75), మల్లు (12), నేత్రపాల్ (40)‌గా గుర్తించారు. ఇదిలా ఉండగా ఉత్తరాది రాష్ట్రాల్లో చలి తీవ్రత మరింత పెరిగింది. ఉష్ణోగ్రతలు 3 నుంచి 4 డిగ్రీల దిగువన నమోదవుతున్నాయి. పొగమంచు కారణంగా ఢిల్లీలో విమానాల రాకపోకలకు తీవ్ర అంతరాయం ఏర్పడింది. పొగ మంచు కారణంగా రన్‌వే 50 మీటర్ల నుంచి 175 మీటర్ల పరిధిలోపే కనిపిస్తోందని ఢిల్లీ విమానాశ్రయవర్గాలు తెలిపాయి. దీంతో పలు విమానాలను మళ్లించారు. అయితే విమానాలను రద్దు చేయలేదని ప్రకటించాయి. ఈ మేరకు ఒక సర్క్యులర్‌ జారీ చేశాయి. అటు ఉత్తర రైల్వే పరిధిలో 30 రైళ్లు ఆలస్యంగా నడుస్తున్నాయి. ఢిల్లీకి రావాల్సిన రైళ్లు దాదాపు 8 గంటలు ఆలస్యంగా నడుస్తున్నట్లు ఉత్తర రైల్వే అధికారులు వెల్లడించారు. ఇక, పర్వత ప్రాంతాలైన షిమ్లా, ముస్సోరిల కంటే ఢిల్లీలో చలి తీవ్రత ఎక్కువగా ఉంది. దేశ రాజధానిలో వేసవి ఉష్ణోగ్రతలు అధికంగా నమోదుకావడం సర్వసాధారణం. కానీ, ఈ ఏడాది చలి కూడా అదేస్థాయిలో ఉంది. గత 119 ఏళ్లలో డిసెంబరు నెల ఉష్ణోగ్రతలు అత్యల్పంగా నమోదుకావడం ఇది రెండోసారి. గతంలో 1997లో డిసెంబరులో సగటు ఉష్ణోగ్రత 2.5 డిగ్రీలు కాగా, ప్రస్తుతం దానికి సమీపంగా ఈ ఏడాది నమోదయ్యాయి. షిమ్లా, ముస్సోరిలో సాధారణ ఉష్ణోగ్రతలు 14 డిగ్రీల సెల్సియస్‌గా ఉంటే, ఢిల్లీ మాత్రం దీని కంటే దిగువ ఉన్నాయి.

By December 30, 2019 at 10:13AM

Read More https://telugu.samayam.com/latest-news/india-news/six-including-2-minors-killed-as-car-plunges-into-canal-due-to-fog-in-noida/articleshow/73024972.cms