జార్ఖండ్ ఫలితాలు: మెజార్టీకి చేరువలో కాంగ్రెస్ కూటమి.. సీఎంపై ఇండిపెండెంట్ ఆధిక్యం!
జార్ఖండ్ అసెంబ్లీ ఎన్నికల లెక్కింపు ప్రక్రియ కొనసాగుతుండగా, ఆధిక్యంలో కొనసాగుతోంది. అధికార బీజేపీ సైతం గట్టిపోటీ ఇస్తోంది. మొత్తం 81 స్థానాలకు గానూ 42 చోట్ల కాంగ్రెస్ కూటమి ఆధిక్యత ప్రదర్శిస్తోంది. ఒంటరిగా పోటీచేసిన బీజేపీ 29 స్థానాల్లోనూ, మాజీ సీఎం బాబూలాల్ మరాండీ పార్టీ జార్ఖండ్ వికాస్ మోర్చా నాలుగుచోట్ల, ఏజేఎస్యూ రెండు చోట్ల లీడింగ్లో ఉన్నాయి. అతిపెద్ద పార్టీగా బీజేపీ అవతరించినా ప్రభుత్వ ఏర్పాటుకు అవసరమైన సంఖ్యకు దూరంలో నిలిచిపోనుంది. ఎన్నికల ముందే కూటమిగా ఏర్పడిన జార్ఖండ్ ముక్తి మోర్చా, కాంగ్రెస్, ఆర్జేడీ, ఎన్సీపీలు కలిసి ప్రభుత్వం ఏర్పాటుచేసే అవకాశం ఉంది. జేఎంఎం నేత హేమంత్ సోరేన్ కూటమి తరఫున సీఎం అభ్యర్థిగా ఇప్పటికే ప్రకటించారు. ఫలితాల సరళి క్షణక్షణానికి మారుతుండటంతో అందరిలోనూ ఉత్కంఠ నెలకుంది. కాంగ్రెస్-జేఎంఎం కూటమి మెజార్టీ మార్క్ దాటి ఆధిక్యం దిశగా దూసుకెళుతోంది. జేఎంఎం వర్కింగ్ ప్రెసిడెంట్ హేమంత్ సోరేనే తమ కూటమి తరఫున ముఖ్యమంత్రి అభ్యర్థి అని కాంగ్రెస్ వర్గాలు ప్రకటించాయి. మరోవైపు ఏజేఎస్యూ, జేవీఎంలతో అటు కాంగ్రెస్, ఇటు బీజేపీ మంతనాలు జరుపుతున్నట్లు సమాచారం. కూటమి మెజార్టీ మార్క్ దాటడంతో జేఎంఎం, కాంగ్రెస్ వర్గాలు కొన్ని ప్రాంతాల్లో సంబరాలు జరుపుకున్నాయి. ఇక, జంషెడ్పూర్ తూర్పు నియోజకవర్గంలో ముఖ్యమంత్రి రఘుబర్దాస్ వెనుకంజలో ఉన్నారు. ఇక్కడ స్వతంత్ర అభ్యర్థి సరయూ రాయ్ 771 ఓట్ల ఆధిక్యంలో కొనసాగడం విశేషం. బర్హేట్, దుమ్కాలో పోటీచేసిన హేమంత్ సోరేన్ రెండుచోట్ల ఆధిక్యంలో కొనసాగుతున్నారు.
By December 23, 2019 at 12:54PM
No comments