సీఏఏ నిరసనలపై ఆర్మీ చీఫ్ రావత్ వ్యాఖ్యలు.. విపక్షాలు ముప్పేటదాడి
పౌరసత్వ సవరణ చట్టంపై కొనసాగుతున్న నిరసనలు, ఆందోళనలపై ఆర్మీ చీఫ్ గురువారం నోరుజారి వివాదంలో చిక్కుకున్నారు. రావత్ వ్యాఖ్యలపై రాజకీయ దుమారం రేగుతోంది. నిరసనలు హింసాత్మకంగా మారడాన్ని తప్పుపట్టిన రావత్.. కాలేజీలు, యూనివర్సిటీల్లోని విద్యార్థులు సహా ప్రజలను తప్పుదారి పట్టించి దాడులకు ప్రేరేపించడం నాయకత్వం కాదని రావత్ చేసిన వ్యాఖ్యలపై విపక్షాలు భగ్గుమన్నాయి. రాజకీయ అంశాలపై సైన్యాధిపతి స్పందించడమేంటని నిలదీశాయి. ఆరోగ్య సంరక్షణకు సంబంధించి ఢిల్లీలో జరిగిన ఓ సదస్సులో పాల్గొన్న రావత్ మాట్లాడుతూ.. జనాల నుంచే నాయకులు పుట్టుకొస్తారని వ్యాఖ్యానించారు. యూనివర్సిటీలు, కాలేజీల్లో విద్యార్థులు పెద్ద ఎత్తున్న నిరసనల్లో పాల్గొన్న అంశాన్ని ప్రస్తావించిన ఆర్మీ చీఫ్.. జన సమూహాలను దమనకాండ, హింసను ప్రేరేపించే దిశగా నడిపించడం నాయకత్వం కాదని పరోక్షంగా విపక్షాలను ఉద్దేశించి వ్యాఖ్యలు చేశారు. ప్రజలను సరైన దిశలో నడిపించేవాడే నాయకుడని, సరైన సలహాలిస్తూ తన వెంట ఉన్నవారిని జాగ్రత్తగా చూసుకుంటాడని రావత్ పేర్కొన్నారు. నాయకత్వం చూడటానికి సులభమైనదిగానే కనిపిస్తుందని, కానీ అది చాలా క్లిష్టమైందని ఆయన పేర్కొన్నారు. ఆర్మీ చీఫ్ బిపిన్ రావత్ చేసిన వ్యాఖ్యలపై విపక్షాలు మండిపడ్డాయి. సీఏఏ వ్యతిరేకంగా కొనసాగుతున్న ఆందోళనలపై రావత్ వ్యాఖ్యలు ప్రజాస్వామ్యానికి విరుద్ధంగా ఉన్నాయని కాంగ్రెస్ అధికార ప్రతినిధి బ్రిజేష్‌ కలప్ప ధ్వజమెత్తారు. సైన్యాధిపతి రాజకీయ వ్యవహారాలపై మాట్లాడటం ఆమోదయోగ్యమే అయితే, దేశంలో పాలనను సైన్యం తమ చేతుల్లోకి తీసుకునే ప్రయత్నాలు కూడా జరిగే ముప్పుందని విమర్శించారు. రావత్ వ్యాఖ్యలపై ట్విట్టర్‌ ద్వారా స్పందించిన కాంగ్రెస్ సీనియర్ నేత దిగ్విజయ్ సింగ్ తనదైన శైలిలో విమర్శలు గుప్పించారు. ‘విధ్వంసం దిశగా ప్రజలను నడిపించేవారు నాయకులు కాదన్న జనరల్‌ రావత్ మాటలతో తాను ఏకీభవిస్తున్నాను.. అయితే- మత ఘర్షణలతో విధ్వంసాన్ని సృష్టించేందుకు అనుచరులను అనుమతించేవారూ నాయకులు కారు.. మీరు నాతో ఏకీభవిస్తారా జనరల్‌ రావత్?’ అంటూ ట్వీట్ చేశారు. రాజకీయ అంశాలపై స్పందించడం ద్వారా సైన్యాధిపతి తన పరిధిని ఉల్లంఘించారని, ఆయన అధికార పార్టీకి అనుకూలంగా మాట్లాడినట్లు స్పష్టమవుతోందని కమ్యూనిస్ట్ పార్టీలు దుమ్మెత్తిపోశాయి. ఆర్మీ చీఫ్ వ్యాఖ్యలను బట్టి మోదీ పాలనలో పరిస్థితి ఎంతగా దిగజారిపోయిందో అర్ధమవుతుందని సీపీఎం నేత సీతారాం ఏచూరి వ్యాఖ్యానించారు. రావత్ వ్యాఖ్యలపై విమర్శలు రేగడంతో సైన్యం వివరణ ఇచ్చింది. పౌరసత్వ సవరణ చట్టంపై ఆయన మాట్లాడలేదని స్పష్టం చేసింది. జనరల్‌ రావత్ రాజకీయ పరిణామాలపైగానీ, వ్యక్తుల గురించిగానీ మాట్లాడలేదని, భావి భారత పౌరులైన విద్యార్థులను ఉద్దేశించి రావత్ ప్రసంగించారని తెలిపింది. దేశ భవిష్యత్తు వారిపైనే ఆధారపడబోతుంది కాబట్టి వారికి మార్గనిర్దేశం చేయడం ఆయన విధి అని పేర్కొంది. కశ్మీర్‌లో నాయకులుగా ప్రజలు భావించినవారు యువతను తప్పుదోవ పట్టించారని సైన్యం వివరణ ఇచ్చింది.
By December 27, 2019 at 08:10AM
No comments