అయ్యన్నపాత్రుడికి సోదరుడి బర్త్ డే గిఫ్ట్.. టీడీపీకి రాజీనామా, లోకేశ్‌కీ ఝలక్!
విశాఖపట్నం: నేత, మాజీ మంత్రి అయ్యన్నపాత్రుడు సోదరుడు సన్యాసి పాత్రుడు తెలుగు దేశం పార్టీకి రాజీనామా చేశారు. ఆయన వైఎస్ఆర్సీపీలో చేరే అవకాశం ఉందని తెలుస్తోంది. అయ్యన్నపాత్రుడి పుట్టిన రోజు నాడే ఆయన సోదరుడు పార్టీకి గుడ్‌ బై చెప్పడం గమనార్హం. ఆయనతోపాటు పలువురు కౌన్సిలర్లు కూడా టీడీపీకి రాజీనామా చేశారు. అయ్యన్న పాత్రుడు బర్త్ డే సందర్భంగా మాజీ మంత్రి నారా లోకేష్ బుధవారం విశాఖ జిల్లాలో పర్యటించనున్నారు. లోకేష్ పర్యటన రోజే.. సన్యాసి పాత్రుడు పార్టీకి రాజీనామా నిర్ణయం టీడీపీ వర్గాల్లో చర్చనీయాంశంగా మారింది. అయ్యన్న పాత్రుడు, సన్యాసి పాత్రుడి మధ్య వైరం ఉంది. అయ్యన్నను హతమార్చడానికి ఆయన సోదరుడు కుట్ర పన్నారనే వార్తలు కూడా వచ్చాయి. కాగా తన ప్రతిష్టను దెబ్బతీయడానికి ఉద్దేశపూర్వకంగా ఈ తరహా ప్రచారానికి శ్రీకారం చుట్టారని సన్యాసి పాత్రుడు ఆరోపించారు. సన్యాసి పాత్రుడికి నర్సీపట్నం ప్రాంతంలో మంచి పట్టుంది. దీంతో ఆయన్ను వైఎస్ఆర్సీపీలో చేర్చుకోవడానికి ఎన్నికల ముందే ప్రయత్నాలు జరిగాయి. కానీ ఆయన పార్టీ మారలేదు. ఇప్పటికే విశాఖపట్నం జిల్లాకు చెందిన పలువురు టీడీపీ నేతలు వైఎస్ఆర్సీపీలో చేరారు. విశాఖ డెయిరీ సీఈఓ, టీడీపీ అనకాపల్లి ఎంపీ అభ్యర్థి ఆడారి ఆనంద్‌ కుమార్, డెయిరీ డైరెక్టర్‌ పిల్లా రమాకుమారి తదితరులు సీఎం జగన్‌ సమక్షంలో వైఎస్ఆర్సీపీలో చేరారు. గంటా శ్రీనివాస రావు కూడా వైఎస్ఆర్సీపీలో చేరే అవకాశం ఉందని ప్రచారం జరుగుతోంది.
By September 04, 2019 at 10:50AM
No comments