కర్ణాటకలో ఉప-ఎన్నికలు.. లబోదిబోమంటున్న అసమ్మతి ఎమ్మెల్యేలు!
![](https://blogger.googleusercontent.com/img/b/R29vZ2xl/AVvXsEhr2RcoK5Nf9NTRnPrStQ3-ZEfWwNyAVOOY6PB6ANhCKZnZochRr_RqPaaDi69eUIGsDRKvoByMaFr3cDoUjes5s8YnYK1JmNBBqqCvhrWe7EYyAph699mJoYmlAtAa9N1iUdMDhRpkjdA/s1600/telugu+news.png)
![](https://telugu.samayam.com/photo/71241499/photo-71241499.jpg)
మహారాష్ట్ర, హరియాణా అసెంబ్లీలతోపాటు దేశంలోని వివిధ రాష్ట్రాల్లో ఖాళీగా ఉన్న 64 శాసనసభ, ఒక పార్లమెంటు స్థానాలకు కేంద్ర ఎన్నికల కమిషన్ షెడ్యూల్ వెలువరించిన విషయం తెలిసిందే. వీటిలో ఇటీవల కాంగ్రెస్-జేడీఎస్ అసమ్మతి ఎమ్మెల్యేలు రాజీనామా చేసిన 15 స్థానాలు కూడా ఉన్నాయి. మొత్తం 17 మంది రాజీనామా చేయగా మాస్కి, రాజరాజేశ్వరినగర నియోజకవర్గాల ఎన్నికలకు సంబంధించిన ఫిర్యాదులు హైకోర్టు విచారణ నేపథ్యంలో ఈ రెండు చోట్ల ఎన్నికలు నిర్వహించబోమని ఎన్నికల ప్రధాన అధికారి తెలిపారు. ఈ నేపథ్యంలో అనర్హత వేటుపడిన అసమ్మతి ఎమ్మెల్యేల భవిత్యం అగమ్యగోచరంగా మారింది. సంకీర్ణ ప్రభుత్వంపై అసంతృప్తితో కాంగ్రెస్కు చెందిన 14 మంది, ముగ్గురు జేడీఎస్ ఎమ్మెల్యేలు గత జూన్లో రాజీనామా చేశారు. మాజీ స్పీకర్ రమేశ్ కుమార్ వీరిపై నాలుగేళ్లపాటు ఎన్నికల్లో పాల్గొనకుండా అనర్హత వేటు వేశారు. దీంతో ఈ 17 మంది ఎమ్మెల్యేలు సుప్రీంకోర్టును ఆశ్రయించగా, విచారణ వాయిదా పడుతూ వస్తోంది. తదుపరి విచారణ సెప్టెంబరు 23న జరగనుంది.. స్పీకర్ నిర్ణయంపై సర్వోన్నత న్యాయస్థానం ‘స్టే’ విధిస్తే తప్ప ప్రస్తుత ఉప-ఎన్నికల్లో వారు పోటీ చేసే అవకాశాలు కోల్పోయినట్టే. అసమ్మతి ఎమ్మెల్యేలంతా కర్ణాటక ముఖ్యమంత్రి యడియూరప్పతో సమావేశమై తమ గోడు వెల్లగక్కినట్టు సమాచారం. మహారాష్ట్ర, హరియాణాతో సహా అన్ని చోట్ల అక్టోబరు 21న పోలింగ్ నిర్వహించి, అక్టోబరు 24 ఫలితాలను వెల్లడిస్తారు. కర్ణాటకలో నోటిఫికేషన్ సెప్టెంబరు 23న విడుదల చేసి అదే రోజు నుంచి నామినేషన్లు స్వీకరిస్తారు. దీనికి గడువు సెప్టెంబరు 30 కాగా, అక్టోబరు 1న పరిశీలన, అక్టోబరు 3 ఉపసంహరణకు చివరితేది. నామినేషన్కు కేవలం ఎనిమిది రోజులు మిగిలి ఉందని, ఈ లోగా సుప్రీంకోర్టు నిర్ణయం వెలువడకపోతే పోటీచేయడం కుదరదని అసమ్మతి ఎమ్మెల్యేలు ఆవేదన వ్యక్తం చేస్తున్నట్టు తెలుస్తోంది. అంతేకాదు, సీఎం యడియూరప్పతో సమావేశం సందర్భంగా ఆయన వ్యక్తిగత సహాయకుడు ఎన్ఆర్ సంతోష్ను అసమ్మతి ఎమ్మెల్యేలు నారాయణ గౌడ, ఆర్ శంకర్లు కాలర్ పట్టుకుని నిలదీసినట్టు విశ్వసనీయ వర్గాలు పేర్కొంటున్నాయి. గతంలో తమకు ఇచ్చిన హామీలను బీజేపీ నెరవేర్చలేదని తీవ్ర ఆగ్రహం వ్యక్తంచేస్తూ బయటకు వెళ్లిపోయినట్టు సమాచారం. తప్పుడు హామీలతో తమను నిలువునా ముంచేశారని సంతోష్పై వారు నిప్పులు చెరిగారు. అసమ్మతి ఎమ్మెల్యేలు నిలదీస్తుంటే.. అంతా చేజారిపోయిందని సంతోష్ అన్నారు. ‘ఆపరేషన్ కమలం’లో కీలక భూమిక పోషించిన సంతోష్.. కాంగ్రెస్-జేడీఎస్ ఎమ్మెల్యేలను ఆకర్షించి సంకీర్ణ ప్రభుత్వాన్ని పడగొట్టడంలో తెరవెనుక ప్రయత్నాలు చేశారు. మరోవైపు, హుటాహుటీన శనివారం రాత్రి ఢిల్లీకి వెళ్లిన కర్ణాటక సీఎం.. అసమ్మతి ఎమ్మెల్యేల విషయంలో జోక్యంచేసుకోవాలని అధినాయకత్వాన్ని కోరే అవకాశం ఉంది. బీజేపీ జాతీయ అధ్యక్షుడు అమిత్ షా ఆదివారం భేటీ అయ్యే సూచనలు ఉన్నాయి. శనివారం మధ్యాహ్నం తన అనుయాయులతో అత్యవసర సమావేశాన్ని ఏర్పాటుచేసిన యడ్డీ.. ఎన్నికల వ్యూహంపై చర్చించారు. వీలైనన్ని ఎక్కువ స్థానాల్లో గెలిచి ప్రభుత్వాన్ని నిలబెట్టుకోవాలని భావిస్తున్నారు.
By September 22, 2019 at 10:41AM
No comments