రూ.5 వేలకే ఐఫోన్ 7ప్లస్.. హైదరాబాదీకి రూ.58వేల టోకరా

ప్రముఖ ఈ-కామర్స్ సంస్థ అమెజాన్ ఇటీవల హైదరాబాద్‌లో అతిపెద్ద కార్యాలయాన్ని ప్రారంభించడాన్ని ఆసరాగా తీసుకున్న కేటుగాళ్లు ఘరానా మోసానికి తెరదీశారు. హైదరాబాద్‌ నగరంలోని టోలిచౌకిలో నివాసముండే లెక్చరర్ మహ్మద్‌ ఇస్లాంకు ఇటీవల ఫోన్ చేసిన ఓ సైబర్ నేరస్థుడు అమెజాన్ ద్వారా రూ.5వేలకే ఐఫోన్, తక్కువ ధరలో ల్యాప్‌టాప్, ఏసీ ఇస్తున్నామని చెప్పి ఏకంగా రూ.58వేలు కొట్టేశాడు. మోసపోయానని తెలుసుకున్న బాధితుడు పోలీసులను ఆశ్రయించడంతో సంఘటన వెలుగులోకి వచ్చింది. మహ్మద్‌ ఇస్లాం కొద్దిరోజుల క్రితం ఓ వ్యక్తి ఫోన్ చేశాడు. తాను అమెజాన్ సంస్థ నుంచి మాట్లాడుతున్నానని పరిచయం చేసుకుని...‘సర్‌.. హైదరాబాద్‌లో అమెజాన్‌ సంస్థ ప్రారంభించిన సందర్భంగా ప్రైమ్ వినియోగదారులకు తక్కువ ధరకే వస్తువులు అందిస్తున్నామని చెప్పాడు. రూ.60వేల విలువైన ఐఫోన్ 7ప్లస్‌ మొబైల్‌ని రూ.5వేలకే అందిస్తామని, ల్యాప్‌టాప్, ఏసీపై 50శాతం డిస్కౌంట్‌ అందిస్తున్నామని చెప్పాడు. తాను చెప్పిన బ్యాంక్ అకౌంట్లో రూ.5వేలు వేస్తే ఐఫోన్ మీ ఇంటికే వస్తుందని నమ్మబలికాదు. అతడి మాటలు పూర్తిగా నమ్మిన మహ్మద్‌ ఇస్లాం ఆ అకౌంట్లో డబ్బులు వేశాడు. మరుసటి మహ్మద్‌ ఇస్లాంకు ఫోన్ చేసిన ఆ వ్యక్తి జీఎస్టీ పేరుతో రూ.11,999 చెల్లిస్తే, ఐఫోన్ డెలివరీ కాగానే వాటిని రిఫండ్ చేస్తామని చెప్పాడు. మహ్మద్ ఆ డబ్బులు అకౌంట్లో వేశాడు. అయితే ఆ డబ్బులు తమ అకౌంట్లో క్రెడిట్ కాలేదని, మళ్లీ వేయాలని చెప్పడంతో అంతే మొత్తాన్ని మళ్లీ డిపాజిట్ చేశాడు. ఆ తర్వాత ఇతర ఖర్చుల కింద రూ.12వేలు.. ఇలా మొత్తం రూ.58వేలు మహ్మద్ నుంచి కొట్టేశాడు. ఐఫోన్ ఎంతకీ డెలివరీ కాకపోవడంతో మహ్మద్ ఫోన్ చేయగా స్విచ్ఛాఫ్ వచ్చింది. అలా రెండ్రోజుల పాటు ఫోన్ చేసిన బాధితుడు చివరకు మోసపోయానని గ్రహించి సైబర్ క్రైమ్ పోలీసులను ఆశ్రయించాడు.

By September 10, 2019 at 11:03AM

Read More https://telugu.samayam.com/latest-news/crime/cyber-criminals-convicted-of-fraud-in-the-name-of-amazon-in-hyderabad/articleshow/71059980.cms