Jammu, Kashmir, Ladakh‌ ప్రాంతాల్లో మతాల వారీగా జనాభా, విస్తీర్ణం వివరాలు

జమ్మూ కశ్మీర్‌కు స్వయం ప్రతిపత్తిని కట్టబెట్టే ఆర్టికల్ 370ని కేంద్రం రద్దు చేసింది. ఆ రాష్ట్రం నుంచి లడక్‌ను వేరు చేసిన కేంద్రం.. ఆ ప్రాంతాన్ని చట్ట సభలేని కేంద్రపాలిత ప్రాంతంగా ప్రతిపాదించింది. అసెంబ్లీతో కూడిన కేంద్రపాలిత ప్రాంతంగా మారనుంది. ఆర్టికల్ 370 రద్దుతో జమ్మూ కశ్మీర్ భారత్‌లో పూర్తిగా అంతర్భాగమైనట్టే. జమ్మూ కశ్మీర్‌కు కేటాయిస్తోన్న నిధులు లడ‌క్‌కు చేరడం లేదని, అందుకే ఇలా విభజించామని హోం మంత్రి అమిత్ షా తెలిపారు. జమ్మూ కశ్మీర్‌గా భారీ సంఖ్యలో అదనపు బలగాలను పంపినప్పుడే అక్కడ ఏదో జరగబోతోందనే అనుమానాలు మొదలయ్యాయి. తర్వాత అమర్‌నాథ్ యాత్రను రద్దు చేసి.. అక్కడి నుంచి స్థానికేతరులను వెనక్కి పంపించేశారు. దీంతో ఆర్టికల్ 370, ఆర్టికల్ 35లను రద్దు చేస్తారని, జమ్మూ కశ్మీర్‌ను మూడు ముక్కలు చేస్తారని ప్రచారం జరిగింది. సోమవారం ఉదయం ఆర్టికల్ 370ని రద్దు చేస్తున్నట్టు పార్లమెంట్‌లో ప్రకటించారు. అనంతర కశ్మీర్‌ను రెండుగా విభజించారు. పాక్ ఆక్రమిత కశ్మీర్, అక్వాయ్ చిన్, చైనాకు పాకిస్థాన్ కట్టబెట్టిన భూభాగాన్ని మినహాయిస్తే.. జమ్మూ కశ్మీర్‌‌లో మూడు ప్రధాన ప్రాంతాలున్నాయి. ఒకటి కశ్మీర్ కాగా, మరొకటి జమ్మూ, మూడోది . జమ్మూ కశ్మీర్ మొత్తం విస్తీర్ణం 1,01,387 చ.కి.మీ.లు, 2011 జనాభా లెక్కల ప్రకారం అక్కడి జనాభా 1.25 కోట్లు. విస్తీర్ణం పరంగా చూస్తే లడక్ అతిపెద్ద ప్రాంతం. దీని విస్తీర్ణం 59 వేల చ.కి.మీ., జమ్మూ విస్తీర్ణం 26 వేల చ.కిమీ., కశ్మీర్ విస్తీర్ణం దాదాపు 16 వేల చ.కి.మీ. కశ్మీర్ విస్తీర్ణం తక్కువగానే ఉన్నప్పటికీ.. జమ్మూ కశ్మీర్ మొత్తం జనాభాలో కశ్మీర్ ప్రాంతం వాటా దాదాపు 55 శాతం. ఇక్కడ సుమారు 69 లక్షల మంది ప్రజలు నివసిస్తోన్నారు. జమ్మూ జనాభా సుమారు 54 లక్షలు, ఇది దాదాపు 43 శాతానికి సమానం. ఇక జమ్మూ కశ్మీర్ నుంచి విడగొట్టిన లడక్ ప్రాంతం విస్తీర్ణం పరంగా అతిపెద్దదయినప్పటికీ.. జనాభా కేవలం 2,74,289 మాత్రమే. భూభాగంలో 58 శాతానికిపైగా ఉన్న ఈ ప్రాంతం జనాభా కేవలం 2.18 శాతం. ఇక మతాల వారీగా చూస్తే.. 2011 జనాభా లెక్కల ప్రకారం జమ్మూ కశ్మీర్లో ముస్లిం జనాభా 68.31 శాతం. హిందువులు 28.43 శాతం, సిక్కులు 1.87 శాతం; బౌద్ధులు, ఇతరులు 0.89 శాతం ఉన్నారు. ప్రాంతాల వారీగా చూస్తే.. కశ్మీర్లో ముస్లింలు ఎక్కువ కాగా.. జమ్మూ హిందువులు, లడక్‌లో బౌద్ధులు ఎక్కువ. కశ్మీర్ ప్రాంతంలో 96.40 శాతం మంది ముస్లింలున్నారు. ఇక్కడ 2.45 శాతం మంది హిందువులు, 0.98 శాతం మంది సిక్కులు, 0.17 శాతం మంది బౌద్ధులు, ఇతరులు నివసిస్తున్నారు. జమ్మూ ప్రాంతంలో 62.55 శాతం మంది హిందువులు ఉండగా.. 33.45 శాతం మంది ముస్లింలు, 3.30 శాతం మంది సిక్కులు, 0.70 శాతం మంది బౌద్ధులు, ఇతరులు ఉన్నారు. లడక్‌లో 39.67 శాతం మంది బౌద్ధులుండగా.. 46 శాతానికిపైగా ముస్లింలు, 12 శాతానికిపైగా హిందువులు ఉన్నారు. గతంలో నిర్వహించిన జమ్మూ కశ్మీర్ అసెంబ్లీ ఎన్నికల్లో కశ్మీర్లో పీడీపీ సత్తా చాటగా.. జమ్మూ, లడక్‌లలో బీజేపీ ఎక్కువ సీట్లు గెలుపొందింది.

By August 05, 2019 at 01:06PM

Read More https://telugu.samayam.com/latest-news/india-news/jammu-and-kashmir-ladakh-demographics-and-population-as-per-religion/articleshow/70532345.cms