యూపీ క్యాబినెట్‌లోకి కొత్త ముఖం.. ఈ ఎమ్మెల్యే జీతం తీసుకోరు!

ఉత్తర్‌ప్రదేశ్‌లో ప్రభుత్వం తొలిసారిగా మంత్రివర్గాన్ని పునర్వవస్థీకరించింది. 2017 ఎన్నికల్లో విజయం సాధించిన ప్రభుత్వం ఏర్పాటుచేసిన తర్వాత ముఖ్యమంత్రిగా బాధ్యతలు చేపట్టారు. తాజాగా, యోగి తన క్యాబినెట్‌ను గురువారం విస్తరించారు. మొత్తం 23 మంది కొత్తవారిని యోగి తన మంత్రివర్గంలోకి తీసుకున్నారు. వీరిలో ఆరుగురు క్యాబినెట్, ఆరుగురు స్వతంత్ర, 11 మంది సహాయ మంత్రులు ఉన్నారు. కులం, మతం, సామాజిక సమీకరణాల ప్రాతిపదికన క్యాబినెట్‌ను పునర్వవస్థీకరించారు. వీరిలో అత్యధికంగా ఆరుగురు బ్రాహ్మణ సామాజిక వర్గానికి చెందినవారు ఉన్నారు. అలాగే ఠాకూర్లు, జాట్లు, కూర్మీలు ఇద్దరు చొప్పున, దళితులు, వైశ్యులు ముగ్గురు, గుజ్జర్, రాబ్‌భర్, గారేడియా, శాఖ్య, మల్హా సామాజికి వర్గాలకు చెందిన ఒక్కొక్కరికీ క్యాబినెట్‌లో చోటు దక్కింది. యోగి క్యాబినెట్‌లో కొత్తగా చేరిన ఎమ్మెల్యే రవీంద్ర జైశ్వాల్‌కు ఓ ప్రత్యేకత ఉంది. వారణాసి (ఉత్తర) అసెంబ్లీ నియోజకవర్గం నుంచి ఆయన ఎమ్మెల్యేగా ఎన్నికయ్యారు. వరుసగా రెండోసారి అక్కడ నుంచి గెలిచిన రవీంద్ర జైశ్వాల్.. ఇప్పటి వరకు ఎమ్మెల్యేగా తన జీతం తీసుకోకపోవడం విశేషం. 2012, 2017ల్లో గెలుపొందిన రవీంద్ర.. ప్రభుత్వం నుంచి ఒక్కపైసా కూడా వేతనం తీసుకోలేదు. సంపన్న కుటుంబానికి చెందిన ఆయనకు సచ్ఛీలుడుగానూ కూడా పేరుంది. అంతేకాదు నియోకవర్గ అభివృద్ధికి తన సొంత డబ్బులను కూడా వినియోగిస్తుంటారు. తన నియోజకవర్గంలో విద్యుత్తు స్తంభాలను, సోలార్ లైట్లను తన సొంత నిధులతోనే ఏర్పాటుచేశారని ప్రజలు చెబుతున్నారు. గత ఎన్నికల్లో జైశ్వాల్.. 46 వేలకుపైగా ఓట్ల మెజార్టీతో కాంగ్రెస్ అభ్యర్థిపై విజయం సాధించారు. తాజాగా ఆయనకు మంత్రివర్గంలో చోటుదక్కింది.

By August 23, 2019 at 10:23AM

Read More https://telugu.samayam.com/latest-news/india-news/varanasi-north-bjp-mla-minister-ravindra-jayaswal-who-doesnt-take-salary/articleshow/70798685.cms