మరింత విషమించిన జైట్లీ ఆరోగ్యం.. ఎయిమ్స్‌కు బీజేపీ నేతలు
తీవ్ర అనారోగ్యంతో గత కొద్ది రోజులుగా కేంద్ర మాజీ ఆర్ధిక మంత్రి, బీజేపీ సీనియర్ నేత ఢిల్లీలోని ఎయిమ్స్‌లో చికిత్స పొందుతున్న విషయం తెలిసిందే. అయితే, ఆయన ఆరోగ్య మరింత విషమించినట్టు వర్గాలు వెల్లడించాయి. తీవ్ర అస్వస్థతతో ఆగస్టు 9 న జైట్లీ ఎయిమ్స్‌లో చేరగా, గురువారం ఆయనకు డయాలసిస్ నిర్వహించారు. అయితే, ఆగస్టు 10 నుంచి జైట్లీ ఆరోగ్య పరిస్థితిపై ఎయిమ్స్ వైద్యులు ఎలాంటి బులిటెన్ విడుదల చేయలేదు. కాగా, ఆగస్టు 17న ఆరోగ్యం క్షీణించడంతో ఆయనకు వెంటిలేటర్‌పై చికిత్స అందజేస్తున్నారు. ప్రస్తుతం జైట్లీని లైఫ్‌ సపోర్ట్‌పై ఉంచి చికిత్స అందిస్తున్నారు. ఆయనకు ఈసీఎంఓ (ఎక్స్‌ట్రా కార్పోరియల్‌ మెంబ్రాన్‌ ఆక్సిజనేషన్‌)ను అమర్చినట్లు వైద్యులు తెలిపారు. శ్వాస తీసుకోవడానికి జైట్లీ తీవ్రంగా ఇబ్బంది పడుతున్నారని, కిడ్నీలు, గుండె పనితీరు కూడా మరింత మందగించిట్లు తెలుస్తోంది. దీంతో మరోసారి ఎయిమ్స్‌కు రాజకీయ నేతలు క్యూ కడుతున్నారు. తాజాగా కేంద్ర మాజీ మంత్రి ఉమాభారతి ఎయిమ్స్‌కు చేరుకుని జైట్లీ ఆరోగ్యపరిస్థితి గురించి వైద్యులను అడిగి తెలుసుకున్నారు. వివిధ భాగాల నిపుణులతో కూడిన వైద్యుల బృందం జైట్లీ చికిత్సను పర్యవేక్షిస్తోంది. కాగా, రాష్ట్రపతి రామ్‌నాథ్ కోవింద్, ప్రధాని మోదీ, బీజేపీ సీనియర్ నేత ఎల్‌కే అద్వాణీ, కేంద్ర మంత్రు రాజ్‌నాథ్ సింగ్, స్మృతి ఇరానీ, జితేంద్ర సింగ్, రామ్‌విలాస్ పాశ్వాన్, అమిత్‌షా, యూపీ సీఎం యోగి ఆదిత్యానాథ్, ఢిల్లీ ముఖ్యమంత్రి అరవింద్ కేజ్రీవాల్, కాంగ్రెస్ నేతలు అభిషేక్ మను సింఘ్వీ, జ్యోతిరాధిత్య సింథియా, ఆర్ఎస్ఎస్ చీఫ్ మోహన్ భగవత్ తదితరులు జైట్లీని పరామర్శించారు. అనారోగ్య కారణాలతో ఈ ఏడాది జరిగిన సార్వత్రిక ఎన్నికల్లో అరుణ్ జైట్లీ పోటీకి దూరంగా ఉన్నారు. అంతేకాదు, ఈ ఏడాది మే నెలలో ఆయనకు కిడ్నీ మార్పిడి చికిత్స జరిగింది. అంతకు ముందు ఈ ఏడాది జనవరిలో రెగ్యులర్ మెడికల్ చెకప్ కోసం అమెరికా వెళ్లొచ్చారు. దీంతో ఆయన స్థానంలో రైల్వే మంత్రిగా ఉన్న పీయూష్ గోయల్ పార్లమెంట్‌లో బడ్జెట్ ప్రవేశపెట్టారు. ఈ సమయంలో ఆర్థిక శాఖ బాధ్యతలను రైల్వే మంత్రి పీయూష్ గోయల్ నిర్వర్తించారు. అయితే, ఏప్రిల్ 2018 నుంచి ఆగస్టు 23 వరకు అనారోగ్యంతో ఇంటికే పరిమితమయ్యారు. కోలుకున్న తర్వాత తిరిగి 2018 ఆగస్టు 23న విధులకు హాజరయ్యారు. జైట్లీకి సెప్టెంబర్ 2014లో బెరియాట్రిక్ సర్జరీ జరిగింది.
By August 24, 2019 at 10:43AM
No comments