వాల్‌మార్ట్‌లో కాల్పులకు తెగబడ్డ దుండగులు .. 20 మంది మృతి

అగ్రరాజ్యం అమెరికాలో మరోసారి గన్ కల్చర్ పడగవిప్పింది. విద్వేషంతో దుండగులు జరిపిన కాల్పుల్లో 20 నిండు ప్రాణాలు బలైపోయాయి. టెక్సాస్‌‌లోని ఎల్‌పాసోలో ఉన్న వాల్‌మార్ట్‌ స్టోర్‌లో శనివారం ఈ ఘటన చోటుచేసుకుంది. ఆయుధాలతో స్టోర్‌లోకి ప్రవేశించిన గుర్తు తెలియని వ్యక్తులు విచక్షణారహితంగా కాల్పులకు తెగబడ్డారు. ఈ కాల్పుల్లో 20 మంది వరకు ప్రాణాలు కోల్పోగా, మరో 40 మంది వరకు గాయపడినట్టు అధికారులు తెలిపారు. కాల్పుల్లో 15 నుంచి 20 మంది వరకు ప్రాణాలు కోల్పోయారని, క్షతగాత్రులు ఎంతమంది ఉండొచ్చనే విషయమై స్పష్టత రావాల్సి ఉందని టెక్సాస్‌ లెఫ్టినెంట్‌ గవర్నర్‌ డాన్‌ ప్యాట్రిక్‌ తెలిపారు. టెక్సాస్ చరిత్రలో ఇదో దుర్దినంగా ఆయన అభివర్ణించారు. కాల్పులకు తెగబడిన దుండగుల్లో ముగ్గుర్ని పోలీసుల అదుపులోకి తీసుకున్నారని ఎల్‌పాసో మేయర్‌ డీ మార్గో తెలియజేశారు. సాయుధులైన దుండగులు విరుచుకుపడి కాల్పులు జరిపినట్లు ప్రత్యక్ష సాక్షులు వెల్లడించారు. కాల్పులు జరుగుతున్న సమయంలో కొందరు భయాందోళనలతో పరుగెడుతున్న వీడియోలను కొందరు ట్విటర్‌లో ఉంచారు. దీనిపై పోలీసులు విచారణ చేపట్టారు. దుండగుల్లో ఒకరు డల్లాస్‌లోని అలెన్‌కు చెందిన 21 ఏళ్ల పాట్రిక్‌ క్రూసియస్‌ అనే యువకుడిగా పోలీసులు గుర్తించారు. అతడిని అదుపులోకి తీసుకుని విచారిస్తున్నారు. మెక్సికో సరిహద్దులో ఎల్‌ పాసో ప్రాంతం ఉంది. హిస్పానిక్‌ వర్గానికి చెందిన ప్రజలు ఇక్కడ ఎక్కువ మంది ఉంటారు. ఘటన జరిగే సమయానికి స్టోర్‌లో 1,000 నుంచి 3,000 మంది వరకు ఉంటారని అధికారులు అంచనా వేస్తున్నారు. ఈ దుర్ఘటనలో ప్రాణాలు కోల్పోయిన వారు నుంచి 82 వయసున్న వారని తెలిపారు. ఈ దుర్ఘటనపై అమెరికా అధ్యక్షుడు డొనాల్డ్‌ ట్రంప్‌ విచారం వ్యక్తం చేశారు. కాల్పులకు పాల్పడిన వారిని విడిచిపెట్టే ప్రసక్తేలేదని హెచ్చరించారు. ఈమేరకు ఆయన ట్వీట్‌ చేశారు. ‘ఈ రోజు ఎల్‌ పాసోలో జరిగిన దుర్ఘటన అత్యంత భయంకరమైనదే కాదు.. కుట్రపూరితమైంది కూడా. ఈ భయానక ఘటనను ఖండిస్తున్నాను. దేశంలోని ప్రతి ఒక్కరి వెనక నేనున్నాను. అమాయకులైన వారిని ఇబ్బందులు పెడితే ఉపేక్షించేది లేదు’ అని ట్వీట్‌ చేశారు. ఉత్తర కాలిఫోర్నియాలో మూడు రోజుల కిందట ఫుడ్ ఫెస్టివల్‌లో ఓ టీనేజర్ కాల్పులకు తెగబడి ముగ్గుర్ని పొట్టనబెట్టుకున్న విషయం తెలిసిందే. అమెరికాలో ఇప్పటి వరకు జరిగిన కాల్పుల్లో ఇది ఎనిమిదో అతిపెద్ద దుర్ఘటన. 1984లో శాన్ యసిడ్రోలో జరిగిన కాల్పుల్లో 21 మంది ప్రాణాలు కోల్పోయారు. వాల్‌మార్ట్ కాల్పులకు పాల్పడిన అనుమానితుడ్ని పోలీసులు గుర్తించారు. అలెన్‌కు చెందిన శ్వేతజాతీయుడు (21)గా అనుమానిస్తున్నారు. కాల్పుల్లో గాయపడిన 13 మందిని వైద్యం కోసం ఎల్‌పాసో యూనివర్సిటీ ఆఫ్ మెడికల్ సెంటర్‌కు తరలించారు. వీరిలో కొందరి పరిస్థితి విషమంగా ఉన్నట్టు తెలుస్తోంది. అలాగే గాయపడిన ఇద్దరు చిన్నారులను ఎల్‌పాసో చిల్డ్రన్స్ హాస్పిటల్‌కు తరలించి, చికిత్స అందజేస్తున్నారు.

By August 04, 2019 at 09:35AM

Read More https://telugu.samayam.com/latest-news/international-news/deadly-shooting-in-walmart-store-el-paso-in-texas-suspect-in-custody/articleshow/70518817.cms