చంద్రయాన్-2 పంపిన తొలి ఫోటోలు.. షేర్ చేసిన ఇస్రో!

చంద్రుడి ఉపరితలంపై అధ్యయనానికి భారత అంతరిక్ష పరిశోధన సంస్థ (ఇస్రో) జులై 22న ప్రయోగించిన ప్రయాణం కొనసాగుతోంది. జీఎస్ఎల్వీ మార్క్-3ఎం1 రాకెట్ ద్వారా నెల్లూరు జిల్లా శ్రీహరికోటలోని సతీశ్ ధావన్ స్పేస్ సెంటర్ రెండో ప్రయోగ కేంద్రం నుంచి చంద్రయాన్-2ను ప్రయోగించారు. ఇది చంద్రుని వైపు ప్రయాణించే క్రమంలో భూమికి సంబంధించిన చిత్రాలను ఉపగ్రహంలోని కెమెరా బంధించింది. చంద్రయాన్-2 తీసిన తొలి చిత్రాలను విడుదల చేసింది. విభిన్న రంగుల్లో భూమి ఆకారాన్ని బంధించి పంపింది. చంద్రయాన్-2 ప్రయాణిస్తుండగా అందులోని ఎల్ ఐ4 కెమరా భూమి ఫోటోలను తీసింది. ఇందుకు సంబంధించిన ఫోటోలను ఇస్రో తన ట్విట్టర్‌ ఖాతాలో ఉంచింది. ‘ఆగస్టు 3 సాయంత్రం 5.34 గంటల ప్రాంతంలో చంద్రయాన్-2 ఎల్ ఐ14 తీసిన ఫోటోల్లో భూమి ఇలా కనిపిస్తుంది’ అంటూ ట్వీట్ చేసింది. కాగా, చంద్రయాన్‌–2 మిషన్‌కు సంబంధించి శుక్ర వారం మధ్యాహ్నం 3.27 గంటలకు ఆర్బిటర్‌లోని ఇంధనాన్ని శాస్త్రవేత్తలు 646 సెకండ్ల పాటు మండించి నాలుగోసారి కక్ష్య దూరాన్ని విజయవంతంగా పెంచారు. చంద్రయాన్‌–2 మిషన్‌ విజయవంతంగా ప్రయాణి స్తోందని ఇస్రో శాస్త్రవేత్తలు అధికారికంగా వెల్లడించారు. బెంగళూరు సమీపంలో బైలాలులో ఉన్న భూ నియంత్రిత కేంద్రం నుంచి చంద్రయాన్‌–2 ఉప్రగహంలోని ఆర్బిటర్‌లో నింపిన ఇంధన సాయంతో కక్ష్య దూరాన్ని పెంచే ప్రక్రియను నాలుగోసారి కూడా విజయవంతంగా నిర్వహించారు. జీఎస్‌ఎల్‌వీ మార్క్‌3–ఎం1 రాకెట్ ద్వారా చంద్రయాన్‌–2 మిషన్‌ను భూమికి దగ్గరగా 170 కిలోమీటర్లు, భూమికి దూరంగా 45,475 కిలోమీటర్ల ఎత్తులో భూ మధ్యంతర కక్ష్యలోకి ప్రవేశపెట్టిన విషయం తెలిసిందే. కక్ష్య దూరాన్ని పెంచడంలో భాగంగా జులై 24న తొలిసారి భూమికి దగ్గరగా ఉన్న 170 కిలోమీటర్ల ఎత్తును 230 కిలోమీటర్లకు, 26న రెండోసారి భూమికి దూరంగా 45,475 కిలోమీటర్లుగా ఉన్న కక్ష్య దూరాన్ని 54,829 కిలోమీటర్లకు, జులై 29న మూడోసారి భూమికి దగ్గర్లో ఉన్న 230 కిలోమీటర్ల దూరాన్ని 270 కిలోమీటర్లకు, దూరంగా ఉన్న 54,829 కిలోమీటర్ల దూరాన్ని 71,792 కిలోమీటర్లకు ఇస్రో శాస్త్రవేత్తలు విజయవంతంగా పెంచిన విషయం తెలిసిందే. శుక్రవారం నాలుగోసారి భూమికి దగ్గరగా ఉన్న 270 కిలోమీటర్ల దూరాన్ని 277 కి.మీ, భూమికి దూరంగా ఉన్న 71,792 కి.మీ దూరాన్ని 89,472 కిలోమీటర్ల దూరానికి విజయవంతంగా పెంచారు. మళ్లీ ఆగ్టు 6న ఐదోసారి కక్ష్యదూరం పెంచేందుకు ఇస్రో శాస్త్రవేత్తలు సిద్ధమవుతున్నారు. తర్వాత ఆగస్టు 14న చివరిగా చంద్రయాన్‌–2 మిషన్‌ను భూ మధ్యంతర కక్ష్య నుంచి ఒకేసారి చంద్రుడి కక్ష్యలోకి పంపే ప్రక్రియను కూడా చేపట్టనున్నారు.

By August 04, 2019 at 01:35PM

Read More https://telugu.samayam.com/latest-news/science-technology/isro-releases-first-set-of-earth-pictures-captured-by-l-i4-camera-in-chandrayaan-2/articleshow/70520641.cms