నేటి నుంచి జరగాల్సిన జగన్ ప్రజా దర్బార్ వాయిదా.. కారణం ఇదే!
పరిపాలన, సంక్షేమ పథకాల అమలులో తన తండ్రి వైఎస్ రాజశేఖర్రెడ్డి బాటలో ఏపీ సీఎం నడుస్తున్నారు. ప్రజా సమస్యల పరిష్కారంలోనూ తండ్రిని అనుసరించాలని భావించారు. జనం సమస్యలను నేరుగా తెలుసుకొని పరిష్కరించడం కోసం జూలై 1 నుంచి ప్రజా దర్బార్ను ఏర్పాటు చేస్తారనే ప్రచారం సాగింది. గతంలో వైఎస్ సీఎంగా ఉన్నప్పుడు హైదరాబాద్లోని బేగంపేట క్యాంప్ ఆఫీస్లో ప్రజా దర్బాబు నిర్వహించేవారు. ప్రజా సమస్యలను తెలుసుకుని సత్వరమే పరిష్కరించాలని అధికారులను ఆదేశించేవారు. దీనికి ప్రజల నుంచి అప్పట్లో అనూహ్య స్పందన వచ్చింది. అదే కార్యక్రమాన్ని జగన్ ప్రారంభించనున్నారు. అయితే, జులై 1న ప్రారంభం కావాల్సిన వాయిదా పడింది. దీనిని ఆగస్టు 1 నుంచి నిర్వహించనున్నారు. ప్రజలతో ప్రత్యక్షంగా మాట్లాడి వారి వినతులు స్వీకరించి సత్వరమే పరిష్కారించాలనే ఉద్దేశంతో ప్రజాదర్బార్ను ముఖ్యమంత్రి ప్రారంభించాలనుకున్నారు. ఈ కార్యక్రమాన్ని జూలై 1 నుంచి తాడేపల్లిలోని తన క్యాంపు ఆఫీసులో మొదలు పెట్టాలని ఆయన భావించారు. అయితే దీనికి ఇంకా ఏర్పాట్లు పూర్తి కాకపోవడం, జులైలో అసెంబ్లీ సమావేశాలు ఉన్నందున ఆగస్టు 1కి వాయిదా వేసినట్లు సీఎం కార్యాలయ వర్గాలు వెల్లడించాయి. శాసనసభ సమావేశాల తర్వాత ప్రజా దర్బార్ ప్రారంభం కానుంది. తాజాగా దీనిపై మంత్రి కన్నబాబు మాట్లాడుతూ.. జూలై 1వ తేదీ నుంచి ప్రజాదర్బార్ జరుగుతుందని మీడియాలో ప్రచారం సాగుతోందని, అది సరికాదని అన్నారు. శాసనసభ సమావేశాలు మొదలైతే ముఖ్యమంత్రి రోజూ ఉదయం 8.30 గంటలకే అసెంబ్లీకి వెళ్లాల్సి ఉంటుందని, ఈ సమయంలో ప్రజలను కలుసుకుని, విజ్ఞప్తులు స్వీకరించడం కష్టం అవుతుందని తెలిపారు. అలాగే, సీఎంని కలవవడానికి వచ్చే ప్రజల కోసం మౌలిక వసతులు, ఇతర ఏర్పాట్లు చేయాల్సి ఉందని, అవన్నీ పూర్తయ్యాక ప్రజా దర్బార్ ప్రారంభిస్తారని ఆయన తెలియజేశారు. మరోవైపు, జగన్ సీఎం పగ్గాలు చేపట్టాక తాడేపల్లిలోని ఆయన నివాసానికి జనం తాకిడి ఎక్కువైంది. వ్యక్తిగత సమస్యలు, స్థానిక సమస్యలను పరిష్కరించాలని కోరడం కోసం ప్రజానీకం సీఎం నివాసానికి వెళ్తున్నారు. ఇలా వచ్చిన వారి నుంచి నెలరోజులుగా సీఎంవో అధికారులు వినతి పత్రాలను తీసుకొని పరిష్కరించే ప్రయత్నం చేస్తున్నారు.
By July 01, 2019 at 10:58AM
No comments