రెండో పెళ్లికి సిద్ధమైన భర్త.. ఇంటి ముందు భార్య ధర్నా
ఆరేళ్ల క్రితం యువతిని ప్రేమించి పెళ్లి చేసుకున్న వ్యక్తి ఇప్పుడు ఆమెను వదిలించుకునేందుకు యత్నిస్తున్నాడు. ఆమెకు విడాకులిచ్చేసి రెండో పెళ్లి చేసుకునేందుకు సిద్ధమవుతున్నాడు. ఈ విషయాన్ని గ్రహించిన బాధితురాలు మహిళా సంఘాలతో కలిసి భర్త ఇంటి ముందే ధర్నాకు దిగింది. బోరబండకు చెందిన హబీబ్ ఫాతిమానగర్‌లో నివాసముందే ఆరిఫ్ అనే వ్యక్తి ఆరేళ్ల క్రితం వైజాగ్‌కు ఓ పని నిమిత్తం వెళ్లాడు. అక్కడ ఈవెంట్ మేనేజర్‌గా పనిచేస్తున్న యువతిపై మనసు పారేసుకున్నాడు. ఆమెను ప్రేమిస్తున్నట్లు చెప్పడం.. వెంటనే యువతి ఓకే చెప్పేయడం జరిగిపోయింది. కొద్దిరోజుల ప్రేమాయణం తర్వాత వివాహ బంధంతో ఇద్దరూ ఒక్కటయ్యారు. ఆమెను హైదరాబాద్‌కు తీసుకొచ్చి కాపురం పెట్టాడు. వీరికి ఓ బాబు పుట్టాడు. ఆ తర్వాత పక్కదారులు పట్టిన ఆరిఫ్ భార్యను పట్టించుకోవడం మానేశాడు. దంపతుల మధ్య చిన్నగా మొదలైన గొడవలు కోర్టు వరకు చేరాయి. దీంతో ఆమె భర్తకు దూరంగా ఉంటూ కొడుకుతో కలిసి ఉంటోంది. ఈ క్రమంలోనే ఆరిఫ్ మంగళవారం రెండో పెళ్లి చేసుకుంటున్నట్లు తెలుసుకున్న బాధితురాలు భర్త ఇంటి ముందు ఆందోళన చేపట్టింది. ఆమెకు స్థానిక మహిళా సంఘాలు మద్ధతుగా నిలిచాయి. దీనిపై సమాచారం అందుకున్న జూబ్లీహిల్స్ పోలీసులు అక్కడికి చేరుకుని వివరాలు తెలుసుకున్నారు. బాధితురాలి ఫిర్యాదు ఆధారంగా ఆరిఫ్‌పై కేసు నమోదు చేసి అతడిని అరెస్ట్ చేశారు.
By July 31, 2019 at 08:23AM
No comments