చురుకుగా నైరుతి.. నేడు, రేపు తెలుగు రాష్ట్రాల్లో భారీ వర్షాలు
తెలుగు రాష్ట్రాల్లో నైరుతి రుతుపవనాలు చురుకుగా కదులుతున్నాయని వాతావరణ శాఖ అధికారులు వెల్లడించారు. దీని ప్రభావంతో ఆది, సోమవారాలు ఏపీ, తెలంగాణల్లోని కొన్ని ప్రాంతాల్లో భారీ నుంచి అతిభారీ వర్షాలు కురుస్తాయని హైదరాబాద్ వాతావరణ కేంద్రం తెలిపింది. శనివారం తెలుగు రాష్ట్రాల్లోని పలు ప్రాంతాల్లో భారీ వర్షాలు కురిశాయి. హైదరాబాద్, వరంగల్, కర్నూలు, గుంటూరు, ప్రకాశం, నిజామాబాద్, పశ్చిమ గోదావరి, ఆదిలాబాద్ జిల్లాల్లో వర్షాలు కురిసినట్టు అధికారులు తెలిపారు. నైరుతి రుతుపవనాలు చురుకుగా ఉండటంతోపాటు ఆగ్నేయ బంగాళాఖాతంపై ఏర్పడిన ఉపరితల ఆవర్తనం వల్ల వర్షాలు కురుస్తున్నాయని అన్నారు. అలాగే, రాబోయే నాలుగు రోజుల్లో ఏపీలోని పలు ప్రాంతాల్లో విస్తారంగా వర్షాలు కురుస్తాయని విశాఖపట్నం వాతావరణ హెచ్చరికల కేంద్రం వెల్లడించింది. తెలంగాణలో అత్యధికంగా నిజామాబాద్ జిల్లా బోధన్‌ మండలం కల్దుర్కి, మెదక్‌ జిల్లా పాపన్నపేట మండలం లింగాయిపల్లెలో 15.4 సెంటీమీటర్ల వర్షపాతం నమోదయ్యింది. రాజన్న సిరిసిల్ల జిల్లా ఎల్లారెడ్డిపేటలో 14.4, కామారెడ్డి జిల్లా సర్వాపూర్‌లో 14.3, నిజామాబాద్ జిల్లాలోని మరికొన్ని మండలాల్లో 11 నుంచి 14 సెంటీమీటర్ల మేర వర్షం కురిసినట్టు వాతావరణ శాఖ తెలిపింది. సంగారెడ్డి జిల్లా మనూర్‌లో 13.6, రంగారెడ్డి జిల్లా మహేశ్వరం మండలంలో 13.5 సెం.మీ.తోపాటు పలు జిల్లాల్లో భారీ వర్షాలు నమోదయ్యాయి. రాష్ట్ర వ్యాప్తంగా 150కి పైగా ప్రాంతాల్లో వర్షాలు కురిశాయి. ఆంధ్రప్రదేశ్‌లో శుక్రవారం ఉదయం శనివారం వరకు కర్నూలు జిల్లా అవుకు, కృష్ణా జిల్లా తిరువూరులో అత్యధికంగా 9 సెం.మీ. వర్షం కురిసింది. శ్రీకాకుళం జిల్లా వీరఘట్టాంలో 8 సెం.మీ, కడప జిల్లా ప్రొద్దుటూరు, సంతమాగులూరులోని 7 సెం.మీ., గుంటూరు జిల్లా బాపట్ల, కృష్ణా జిల్లా అవనిగడ్డ, అనంతపురం జిల్లా గుత్తి, చిత్తూరు జిల్లా కుప్పంలో 6 సెం.మీ., పలమనేరు, ధర్మవరం, ఆత్మకూరు, కారంచేడు, అచ్చంపేట, కురుపాం, మచిలీపట్నంలో 5 సెం.మీ. వర్షం కురిసింది. మిగతా ప్రాంతాల్లోనూ వర్షాలు కురిశాయి. ఉత్తరాంధ్ర మీదుగా ఉన్న ఉపరితల ఆవర్తనం ప్రస్తుతం దక్షిణ చత్తీస్‌గఢ్ మీదుగా పయనిస్తూ నైరుతి దిశలో వాలుగా ఉండటంతో ఏపీపై ప్రభావం చూపుతోంది.
By July 21, 2019 at 08:52AM
No comments