కోర్టు ధిక్కరణ కేసు.. అధికారులపై ఏపీ హైకోర్టు ఘాటు వ్యాఖ్యలు
జైలు శిక్షను అనుభవిస్తోన్న ఓ వ్యక్తిని విడుదల చేయాలంటూ ఏప్రిల్ 9న ఆదేశాలు జారీచేసింది. అయితే, ఎన్నికల కోడ్ సాకుగా చూపిన అధికారులు అతడిని జులై 4 వరకు విడుదల చేయలేదు. దీంతో ఖైదీ సోదరుడు హైకోర్టులో కోర్టు ధిక్కరణ వ్యాజ్యం దాఖలు చేశాడు. దీనిపై విచారణ సందర్భంగా తాత్కాలిక ప్రధాన న్యాయమూర్తి జస్టిస్ సి. ప్రవీణ్కుమార్, జస్టిస్ ఎం సత్యనారాయణమూర్తిల ధర్మాసనం ఆగ్రహం వ్యక్తం చేసింది. జైల్లో ఉన్న వ్యక్తిని విడుదల చేయాలన్న కోర్టు ఉత్తర్వులను సకాలంలో ఎందుకు అమలు చేయలేదో తెలుపుతూ అఫిడ్విట్ దాఖలు చేయాలని ఆదేశించింది. నెల్లూరు సెంట్రల్ జైల్లో జీవిత ఖైదు అనుభవిస్తున్న గని శ్రీనివాసులు ప్రత్యేక క్షమాభిక్షకు అర్హుడని, అతడిని తక్షణమే విడుదల చేయాలని ఏప్రిల్ 9న హైకోర్టు ఆదేశాలు జారీచేసింది. శ్రీనివాసులును విడుదల చేయకపోవడంతో ఆయన సోదరుడు పవన్కుమార్ కోర్టును ఆశ్రయించారు. దీనిపై జూన్ 14న నాటి విచారణలో పిటిషనర్ తరఫున లాయర్ మనోహర్రెడ్డి వాదనలు వినిపించారు. ఎన్నికల కోడ్ అమల్లో ఉందని సాకుతో శ్రీనివాసులును విడుదల చేయలేదని ఆయన వివరించారు. కోర్టు ధిక్కరణ వ్యాజ్యంలో అధికారులు వ్యక్తిగతంగా హాజరు కావాలని జూన్ 14న హైకోర్టు ఆదేశాలు జారీ చేసిందని, జులై 4న శ్రీనివాసులును విడుదల చేశారన్నారు. ఉత్తర్వుల అమల్లో ప్రస్తుత హోంశాఖ ముఖ్య కార్యదర్శి కూడా నిర్లక్ష్యం చూపారనీ, బాధితులకు పరిహారం ఇప్పించాలని కోరుతూ అనుబంధ పిటిషన్ దాఖలు చేశానని కోర్టుకు తెలియజేశారు.దీంతో తీవ్ర ఆగ్రహం వ్యక్తంచేసిన ధర్మాసనం.. కోర్టు ఉత్తర్వులకు ఎన్నికల కోడ్ ఎలా వర్తిస్తుందని నిలదీసింది. ఈ విషయంలో కోర్టుధిక్కరణ కింద చర్యలు ఎందుకు తీసుకోరాదో తెలపాలని నాటి హోంశాఖ ముఖ్య కార్యదర్శి ఏఆర్ అనూరాధ, జైళ్లశాఖ డైరెక్టర్ జనరల్ వినయ్రంజన్, సూపరింటిండెంట్ రవికిరణ్కు నోటీసులు జారీ చేసింది. ఈ కేసులో అధికారులు ఏఆర్ అనూరాధ, ఎం.రవికిరణ్ హైకోర్టుకు హాజరయ్యారు. ఈ సందర్భంగా అధికారులను ఉద్దేశించిన ధర్మాసనం ఘాటు వ్యాఖ్యలు చేసింది. కారాగార జీవితం ఎలా ఉంటుందో మీకు అనుభవంలోకి రావాలంటూ మండిపడింది. ఎన్నికల కోడ్ అమల్లో ఉన్న కారణంగా వ్యక్తిని విడుదల చేయలేదన్న అన్న వ్యాఖ్యలకే కట్టుబడి ఉండాలని, మరో కారణం చెప్పడానికి వీల్లేదని హైకోర్టు తేల్చిచెప్పింది.
By July 13, 2019 at 08:46AM
No comments