గాలి దుమారం.. ఆకాశంలో తలకిందులైన ఎయిర్ కెనడా విమానం

బ్రిటిష్ కొలంబియాలోని వాంకోవర్ నుంచి ఆస్ట్రేలియాలోని సిడ్నీకి వెళ్తున్న విమానానికి గాలి చుక్కలు చూపించింది. పసిఫిక్ మహాసముద్రం మీదుగా ప్రయాణిస్తున్న విమానం ప్రచండ గాలులకు చిగురుటాకులా వణికిపోయింది. విమానం ఒక్కసారిగా కుదుపునకు గురవడంతో ప్రయాణికులు తీవ్ర ఆందోళనకు గురయ్యారు. ఇక తమ పని అయిపోయిందని దేవుళ్లకు ప్రార్థించారు. అయితే అదృష్టం కలిసొచ్చి కాసేపటికే గాలి దుమారం దగ్గడంతో అంతా ఊపిరి పీల్చుకున్నారు. ఈ ఘటనలో కొందరు ప్రయాణికులు గాయపడ్డారు. ఎయిర్‌ కెనడాకు చెందిన బోయింగ్‌ 777-200 విమానం 269 మంది ప్రయాణికులు, 15 మంది సిబ్బందితో గురువారం వాంకోవర్‌ నుంచి సిడ్నీకి బయల్దేరింది. సముద్ర మట్టానికి 10,973 మీటర్ల ఎత్తులో పరిఫిక్ మహాసముద్రంపై ప్రశాంతంగా ప్రయాణిస్తున్న విమానం గాలుల చలనంతో ఊగిపోయింది. ‘టర్బులన్స్’గా పిలిచే ఈ పరిస్థితి విమానం తలకిందులైంది. సీటు బెల్టు పెట్టుకోని వారు, ఆ సమయంలో నిలబడి ఉన్నవారు జారిపడ్డారు. కొంతమంది అయితే టాప్‌కు అతుక్కుపోయారు. పైలట్లు చాకచక్యంగా వ్యవహరించి హవాయ్‌లోని హానోలూలు ఎయిర్‌పోర్టులో విమానాన్ని ల్యాండ్ చేయడంతో అంతా ఊపిరి పీల్చుకున్నారు. ఈ ఘటనలో విమానంలోని 37 మంది గాయపడ్డారు. విమాన పరిస్థితిని పైలట్లు ముందుగానే కంట్రోల్ రూమ్‌కి సమాచారం ఇవ్వడంతో విమానం దిగే సమయానికి డాక్టర్లు, అధికారులు అన్ని ఏర్పాట్లతో సిద్ధంగా ఉన్నారు. గాయపడిన వారిని వెంటనే ఆస్పత్రికి తరలించారు.

By July 13, 2019 at 09:06AM

Read More https://telugu.samayam.com/latest-news/international-news/37-injured-in-severe-turbulence-on-air-canada-flight-to-sydney/articleshow/70201288.cms