జులై 23న తిరుమలకు కొత్త గవర్నర్.. 24న ప్రమాణస్వీకారం

విభజన అనంతరం ప్రత్యేకంగా ఆంధ్రప్రదేశ్‌కు గవర్నర్‌ను కేంద్రం నియమించిన విషయం తెలిసిందే. బీజేపీ సీనియర్, ఒడిశా మాజీ మంత్రి బిశ్వభూషణ్ హరిచందన్‌ను నియమిస్తూ రెండు రోజుల కిందట ఉత్తర్వులు జారీచేసింది ప్రస్తుతం ఉమ్మడి గవర్నర్‌గా ఉన్న ఈఎస్ఎల్ నరసింహన్‌ను తెలంగాణకే పరిమితం చేసింది. రాష్ట్ర నూతన గవర్నర్‌గా నియమితులైన బిశ్వభూషణ్‌ హరిచందన్‌ జులై 24న బాధ్యతలు స్వీకరించనున్నారు. అంతకు ముందు ఆయన జులై 23 న తిరుమలకు రానున్నారు. శ్రీవారిని దర్శించుకున్న అనంతరం అమరావతికి చేరుకుని ఈ నెల 24న ప్రమాణ స్వీకారం చేయనున్నారు. ఈ మేరకు టీటీడీకి గురువారం సమాచారం అందింది. మరోవైపు, రాష్ట్ర గవర్నర్‌ త్వరలోనే బాధ్యతలు స్వీకరించబోతున్న దృష్ట్యా ఆయన అధికార నివాసం రాజ్‌భవన్‌ ఏర్పాట్లలో అధికారులు ముమ్మరంగా కసరత్తు చేస్తున్నారు. విజయవాడలోని ముఖ్యమంత్రి క్యాంప్‌ ఆఫీసును రాజ్‌భవన్‌గా మార్చనున్నారు. ఉన్నతాధికారుల పర్యవేక్షణలో పనులు సాగుతున్నాయి. సాధారణ పరిపాలన విభాగం అధికారులు ఆ కార్యాలయాన్ని సందర్శించి, రాజ్‌భవన్‌గా మార్చాలంటే ఏమేం మార్పుచేర్పులు అవసరమో చర్చించారు. గవర్నర్‌ అధికార నివాసంతోపాటు కార్యాలయం కూడా అక్కడే ఏర్పాటు చేస్తున్నారు. వ్యవధి తక్కువగా ఉన్నందున శరవేగంగా పనలు సాగుతున్నాయి. గ్రౌండ్ ఫ్లోర్‌‌లో కార్యాలయం, మొదటి అంతస్తులో గవర్నర్ నివాసానికి తగిన వసతి సదుపాయాలు కల్పిస్తున్నారు. స్వరాజ్ మైదాన్‌కు చేరువలోనే ఉన్న ఈ కార్యాలయం ఇకపై రాజ్‌భవన్‌గా రూపుదిద్దుకోనుండటంతో నగరం ప్రత్యేక శోభను సంతరించుకోనుంది. కాగా, గవర్నర్ కార్యదర్శిగా సీనియర్ ఐఏఎస్ అధికారి ముఖేష్ కుమార్ మీనాను నియమిస్తూ ప్రభుత్వం ఉత్తర్వులు జారీచేసింది. ప్రస్తుతం ఆయన గిరిజన సంక్షేమశాఖ కార్యదర్శిగా బాధ్యతలు నిర్వహిస్తున్నారు. గవర్నర్ కార్యదర్శిగా ప్రభుత్వం ఆయనకు పూర్తి అదనపు బాధ్యతలు అప్పగిస్తూ ఆదేశాలు జారీ చేసింది. ఉమ్మడి రాష్ట్ర గవర్నర్ నరసింహన్ కార్యాలయంలో పనిచేసే ఏపీ సిబ్బంది కూడా రాష్ట్రానికి వస్తున్నందున వారికి తగిన వసతి సదుపాయాలు కల్పించేందుకు ప్రయత్నాలు జరుగుతున్నాయి. రాజ్‌భవన్ పనులను గురువారం ముఖేష్‌కుమార్ మీనాతో పాటు జీఏడీ ప్రిన్సిపల్ సెక్రెటరీ ఆర్పీ సిసోడియా పరిశీలించారు. ఈ భవనాల్లో ఒక దర్బార్ హాల్, సమావేశ మందిరం, 7 పడక గదులు, మరో 7 ఆఫీసు రూమ్‌లు సిద్ధమయ్యాయి. జులై 23 నాటికి ఏర్పాట్లు పూర్తవుతాయని సిసోడియా తెలిపారు.

By July 19, 2019 at 09:34AM

Read More https://telugu.samayam.com/latest-news/state-news/ap-new-governor-biswa-bhushan-will-visit-tirumala-on-july-23rd/articleshow/70287376.cms