Bengaluru: మెడ విరగ్గొట్టుకున్న టిక్‌టాక్ యువకుడు మృతి
ఇటీవల బాగా పాపులర్ అయిన సోషల్‌మీడియా యాప్ టిక్‌టాక్‌లో గాల్లోకి ఎగిరే వీడియో చేస్తూ మెడ విరగ్గొట్టుకున్న యువకుడు మృత్యువుతో పోరాడి ఓడిపోయాడు. కర్ణాటకలోని తుమకూరు జిల్లా చిక్కనాయకనహళ్లి తాలూకా గూడెకెరె నివాసి కుమార్ (26) వృత్తి రీత్యా గాయకుడు. ఈ నెల 17న ఎలాంటి జాగ్రత్తలు తీసుకోకుండా స్నేహితుడి సాయంతో గాల్లోకి ఎగిరే స్టంట్ చేశాడు. అదికాస్తా వికటించి కుమార్ మెడ, వెన్నుముక విరిగిపోయింది. దీంతో స్నేహితులు, కుటుంబసభ్యులు కుమార్‌ను చికిత్స నిమిత్తం బెంగళూరులోని విక్టోరియా ఆసుపత్రికి తరలించారు. అతడిని పరీక్షించి డాక్టర్లు వెన్నుముక బాగా దెబ్బతిందని, దీంతో శరీరం మొత్తం పక్షవాతానికి గురైందని చెప్పడంతో ఫ్యామిలీ షాకైంది. పరిస్థితి విషమించడంతో కుమార్ ఆదివారం మృతి చెందడంతో అతడి కుటుంబసభ్యులు కన్నీరుమున్నీరవుతున్నారు. తమ కుటుంబాన్ని కొడుకే పోషిస్తున్నాడని, ఇప్పుడు తమకు ఎవరు దిక్కని కుమార్ తల్లిదండ్రులు విలపిస్తున్న తీరు అందరినీ కలచివేస్తోంది. ఇటీవల పిచ్చితో ఎంతో మంది ప్రాణాలు తీసుకుంటున్నారు. కొత్త విన్యాసాలు చేసి లైకులు కొట్టించుకోవాలన్న అత్యాశతో ప్రాణాలే కోల్పోతున్నారు. కొంతమంది అయితే ఆత్మహత్య చేసుకుంటూ దాన్ని టిక్‌టాక్ వీడియో తీసుకుంటున్నారు. ఈ తరహా ఘటనలపై మానసిక నిపుణులు, మేధావులు ఆందోళన వ్యక్తం చేస్తున్నారు.
By June 24, 2019 at 08:20AM
No comments