యాప్‌ల ద్వారా భార్యల మార్పిడి.. కేరళలో వెలుగుచూసిన వికృత క్రీడ

వికృత లైంగిక వాంఛల కోసం జీవితభాగస్వాములను మార్చుకునే వ్యవహారం కేరళలో కలకలం సృష్టిస్తోంది. ఓ బాధిత మహిళ ఫిర్యాదుతో ఈ వ్యవహారం వెలుగులోకి వచ్చింది. భర్త వేరే వ్యక్తులతో శృంగారంలో పాల్గొనాలని తనను బలవంతపెడుతున్నాడని కొట్టాయం జిల్లా కరుకాచల్‌ పోలీస్‌ స్టేషన్‌లో ఓ మహిళ ఫిర్యాదు చేసింది. దీనిపై పోలీసులు కేసు నమోదుచేసి దర్యాప్తు చేపట్టగా విస్తుపోయే విషయాలు బయటపడ్డాయి. 1000కిపైగా జంటలు ఈ వ్యవహారంలో భాగస్వాములైనట్లు అధికారులు గుర్తించారు. టెలిగ్రామ్‌, ఫేస్‌బుక్ మెసెంజర్‌ లాంటి యాప్‌లలో గ్రూప్‌లు నిర్వహిస్తూ రహస్యంగా ఈ వ్యవహారం నడుపుతున్నట్లు వెల్లడయ్యింది. ముఖ్యంగా కొట్టాయం, అలప్పూజ, ఎర్నాకుళం జిల్లాలకు చెందిన వేల జంటలు ఈ గ్రూపుల్లో సభ్యులుగా ఉన్నారని పోలీసులు తెలిపారు. సమాజంలో ఉన్నతస్థాయి వ్యక్తులు కూడా రాకెట్‌లో భాగమైనట్లు పేర్కొన్నారు. ఈ వ్యవహారంలో ఇప్పటి వరకూ ఫిర్యాదు చేసిన మహిళ భర్త సహా మరో ఆరుగురిని అదుపులోకి తీసుకుని విచారిస్తున్నారు. అలాగే, ఈ కేసు సంబంధించి మరో 25 మంది అనుమానితులు పరిశీలనలో ఉన్నారని పోలీసులు తెలిపారు. ఒకట్రెండు రోజుల్లో మరిన్ని అరెస్టులు జరిగే అవకాశం ఉందని పేర్కొన్నారు. మెసెంజర్, టెలిగ్రామ్, ఫేస్‌బుక్ వంటి సోషల్ మీడియా యాప్‌ల ద్వారా భాగస్వాముల మార్పిడి, అసహ శృంగారం వంటి కార్యకలాపాలను కొనసాగిస్తున్నారని తెలిపారు. ఈ గ్రూపుల్లోని మహిళలు సహా మెజారిటీ వ్యక్తులు ఒకే అభిప్రాయాన్ని కలిగి ఉంటారని పేర్కొన్నారు. అయితే, కొంతమంది మహిళలు మాత్రం అటువంటి కార్యకలాపాల్లో పాల్గొనాలని తమ భర్తలు బలవంతం చేయడంతో భయపడుతున్నారని చెప్పారు. కరుకాచల్‌ పోలీసులకు ఫిర్యాదు చేసిన మహిళది ప్రేమ వివాహం కాగా.. ఆమె భర్త ఉపాధి కోసం సౌదీ వెళ్లొచ్చాడు. భర్త పరాయి వ్యక్తితో లైంగిక చర్యల్లో పాల్గొనాలని బలవంతం చేయడంతో తీవ్రంగా కలతచెంది.. తాను అటువంటి పనికి అంగీకరించనని స్పష్టం చేసిందని పోలీసులు తెలిపారు. ‘చాలా మంది మహిళలు తమ ఇష్టానికి వ్యతిరేకంగా ఇందులో పాల్గొనాల్సి వస్తుండటంతో పలువురు ఆత్మహత్యకు పాల్పడుతున్నారు.. కాబట్టి దీనిపై జాగ్రత్తగా దర్యాప్తు చేయాలి.. దాదాపు 90% మంది మహిళలు ఇటువంటి చర్యలను అంగీకరించరు’ అని అన్నారు. ఫేక్ ఐడెంటీలతో ఈ గ్రూప్‌లో వైద్యులు, లాయర్లు సహా ఉన్నత స్థానాల్లో ఉన్న చాలా మంది ఉన్నారని, పోలీసుల దర్యాప్తు మొదలైన తర్వాత వాటిని రద్దుచేశారని తెలిపారు. ఈ గ్రూప్‌ల్లో వందల సంఖ్యలో సభ్యులు ఉండగా.. ఒకదానిలో 5,000 మందికిపైగా ఉన్నారని చెప్పారు.

By January 11, 2022 at 08:26AM

Read More https://telugu.samayam.com/latest-news/crime/kerala-police-busted-partner-swapping-racket-and-arrested-seven/articleshow/88823282.cms