Omicron కొత్త లక్షణాలు.. డెల్టాకు భిన్నంగా ఆ రెండు సింప్టమ్స్

దక్షిణాఫ్రికాలో వెలుగుచూసిన కొత్తరకం వేరియంట్ భౌగోళిక ముప్పుగా పరిణమిస్తోందని ప్రపంచ ఆరోగ్య సంస్థ ఆందోళన వ్యక్తం చేస్తోంది. భారత్‌లో తొలిసారి గుర్తించిన డెల్టా వేరియంట్‌ కంటే ఇది వేగంగా వ్యాపిస్తూ ఇప్పటికే 75కిపైగా దేశాలకు విస్తరించింది. ఒమిక్రాన్ వేరియంట్ డబ్లింగ్ రేటు రెండు రోజులుగా ఉందని అమెరికా సీడీసీ హెచ్చరించింది. కానీ, ఇప్పటికీ.. ఈ వేరియంట్ వ్యాధి తీవ్రత, లక్షణాలపై స్పష్టమైన సమాచారం మాత్రం లేదు. ఈ నేపథ్యంలో దక్షిణాఫ్రికాకు చెందిన ఓ వైద్యులు కీలక విషయాలను వెల్లడించారు. ఒమిక్రాన్‌ బారినపడ్డ బాధితుల్లో డెల్టా కంటే భిన్నమైన లక్షణాలు కన్పిస్తున్నాయని తొలిసారి ఒమిక్రాన్‌ను గుర్తించిన వైద్యురాలు వెల్లడించారు. ఈ వేరియంట్‌ బారిన పడిన కొందరు రాత్రిళ్లు విపరీతమైన చెమటతో బాధపడుతున్నారని ఆమె అన్నారు. ‘‘ఒమిక్రాన్‌ బాధితుల్లో భిన్నమైన లక్షణాలు కన్పిస్తున్నాయి.. అవి స్వల్పంగానే ఉన్నాయి.. కరోనా సాధారణ లక్షణాలైన దగ్గు, తరచూ ముక్కు కారడం, గొంతు నొప్పి, తీవ్రమైన జ్వరం వంటివి ఈ బాధితుల్లో లేవు.. ఎక్కువగా తీవ్రమైన తలనొప్పి, ఒళ్లునొప్పులు, స్వల్ప జ్వరం, అలసట, గొంతులో దురదతో బాధపడుతున్నారు’’ అని డాక్టర్‌ ఏంజెలిక్‌ కాట్జీ తెలిపారు. టీకాలు తీసుకోని వారిలో తలనొప్పి, ఒళ్లు నొప్పులు విపరీతంగా ఉంటున్నాయని చెప్పారు. కానీ, కొందరు బాధితుల్లో మాత్రం అసాధారణ లక్షణాలు కన్పిస్తున్నాయని, డెల్టా కంటే పూర్తి భిన్నంగా ఉన్నాయని తెలిపారు. ‘‘ఈ వేరియంట్‌ సోకిన బాధితులకు అలసట, బలహీనతతో పాటు రాత్రిపూట విపరీతమైన చెమటలు పడుతున్నాయి. ఎంతలా అంటే ఈ చెమట కారణంగా వారి దుస్తులు, బెడ్‌ కూడా తడిసిపోతున్నట్లు చెబుతున్నారు. చాలా మందిలో ఈ లక్షణం కన్పిస్తోంది’’ అని వైద్యుడు వెల్లడించారు. ఇక గొంతు గరగర కూడా ఎక్కువగా ఉంటోందని, డెల్టా సోకిన వారు వాసన కోల్పోగా.. ఒమిక్రాన్‌ బాధితుల్లో ఆ లక్షణం కన్పించట్లేదని తెలిపారు. మరోవైపు, దక్షిణాఫ్రికా వెల్లడించిన తాజా అధ్యయనంలో ఒమిక్రాన్ బాధితులకు తీవ్రమైన వెన్ను నొప్పి, గొంతులో దరద ఉన్నట్టు పేర్కొంది. దక్షిణాఫ్రికాలోని దాదాపు 78,000 ఒమిక్రాన్ కేసును విశ్లేషించి ఫలితాలను మంగళవారం వెల్లడించారు. గత వేరియంట్‌ల కంటే ఒమిక్రాన్ ఇన్‌ఫెక్షన్ తీవ్రత తక్కువగానే ఉందని, ఇతర వేవ్‌లతో పోల్చితే ఆస్పత్రుల్లో చేరేవారి సంఖ్య 29 శాతం తక్కువగా ఉందని తెలిపింది. దక్షిణాఫ్రికాలో అతిపెద్ద ప్రయివేట్ వైద్య సంస్థ డిస్కవరీ హెల్త్ చీఫ్ ఎగ్జిక్యూటివ్ ర్యాన్ నోచ్ మాట్లాడుతూ.. ఒమిక్రాన్ వేరియంట్ పాజిటివ్ వచ్చినవారికి లక్షణాలు భిన్నంగా ఉన్నాయన్నారు. అత్యంత సాధారణ ప్రారంభ సంకేతం గొంతులో దురద, ముక్కు కారడం, పొడి దగ్గు, వెన్నునొప్పి వంటివి బాధితుల్లో కనిపిస్తున్నట్టు తెలిపారు. చాలా కేసుల్లో తేలికపాటి లక్షణాలు ఉన్నప్పటికీ, ఓమిక్రాన్ తీవ్రత తక్కువని దీని అర్థం కాదని డాక్టర్ నోచ్ నొక్కి చెప్పారు. ఇన్ఫెక్షన్, టీకా రెండింటి ద్వారా పొందిన రోగనిరోధకశక్తి వ్యాధి తీవ్రతను మార్చడంలో ముఖ్యమైన పాత్ర పోషిస్తాయని పేర్కొన్నారు. కాగా, ప్రాథమిక డేటా ప్రకారం గత వేరియంట్‌లతో పోల్చితే ఒమిక్రాన్ ప్రవర్తన చాలా భిన్నంగా ఉందని ఆక్స్‌ఫర్డ్ యూనివర్సిటీకి చెందిన నిపుణుడు, యూకే ప్రభుత్వ కోవిడ్-19 సలహదారు సర్ జాన్ బెల్ అన్నారు.

By December 16, 2021 at 09:04AM

Read More https://telugu.samayam.com/latest-news/international-news/lower-back-pain-and-extreme-sweating-as-symptoms-of-omicron-variant/articleshow/88310542.cms