తానా ఆధ్వర్యంలో ‘రాజకీయ నేతల్లో సాహిత్య కోణం’.. అతిథులుగా తెలుగు రాష్ట్రాల నాయకులు
నిర్వహించిన ‘రాజాకీయ నాయకుల సాహిత్య కోణం’విజయవంతమయ్యింది. తానా అధ్యక్షులు లావు అంజయ్య చౌదరి ఈ కార్యక్రమంలో పాల్గొన్న అతిథులు, విజయవంతం కావడానికి కృషి చేసిన కార్యకర్తలకు ప్రత్యేక కృతజ్ఞతలను తెలియజేశారు. తానా ప్రపంచ సాహిత్య వేదిక నిర్వాహకులు డాక్టర్ తోటకూర ప్రసాద్ ఈ సందర్భంగా మాట్లాడుతూ.. కార్యక్రమంలో పాల్గొన్న వివిధ పార్టీలకు చెందిన నేతలు రాజకీయాలు మాట్లాడకుండా తెలుగు సాహిత్యంపై ప్రసంగించడం సంతోషకరమని అన్నారు. ‘‘ప్రస్తుత కలుషిత రాజకీయ పరిస్ధితుల్లో ‘న బూతో న భవిష్యతి’ అన్న చందంగా రాజకీయ నాయకులు ఒకరిని మించి ఒకరు బూతులు మాట్లాడంలో పోటీ పడుతున్నారు.. ఇటువంటి తరుణంలో వివిధ పార్టీలకు చెందిన నాయకులు పాల్గొని ఎటువంటి రాజకీయాలు మాట్లాడకుండా కేవలం తెలుగు సాహిత్యంపై క్లుప్త ప్రసంగాలు చేయడం “న భూతో న భవిష్యతి’’ అన్నారు. ప్రపంచ సాహిత్య వేదిక ప్రతి నెలా ఆఖరి ఆదివారం నిర్వహిస్తున్న ‘నెల నెలా తెలుగు వెన్నెల’ నవంబర్ 28 న జరిగిన 21 వ అంతర్జాల సాహిత్య సదస్సులో ‘రాజకీయ నాయకుల సాహిత్య కోణం’ అనే అంశంపై జరిగింది. ఈ కార్యక్రమంతో తెలంగాణ వ్యవసాయ శాఖ మంత్రి నిరంజన్ రెడ్డి, ఏపీకి చెందిన మాజీ ఎమ్మెల్సీ, రచయిత షేక్ హుస్సేన్ సత్యాగ్ని, సీపీఐ జాతీయ కార్యదర్శి డాక్టర్ కంకణాల నారాయణ, వైఎస్ఆర్సీపీ ఎమ్మెల్సీ డొక్కా మాణిక్య వరప్రసాద్, సీపీఎం (ఎం) పోలిట్ బ్యూరో సభ్యులు బీవీ రాఘవులు, ఏపీ బీజేపీ అధికార ప్రతినిధి ఆర్.డి. విల్సన్ (శరత్ చంద్ర), ఏపీ కాంగ్రెస్ వర్కింగ్ ప్రెసిడెంట్ డాక్టర్ తులసి రెడ్డి, మాజీ మంత్రి టీడీపీ నేత ఆలపాటి రాజేంద్రప్రసాద్, మాజీ మంత్రి పొన్నాల లక్ష్మయ్య విశిష్ఠ అతిధులు గా పాల్గొన్నారు. ఈ సందర్బంగా వివిధ సాహిత్య అంశాలపై అద్భుతంగా ప్రసంగించి అందరి అభిమానాన్ని చూరగొన్నారు. తానా ప్రపంచ సాహిత్య వేదిక సమన్వయకర్త చిగురుమళ్ల శ్రీనివాస్ మాట్లాడుతూ.. ఎన్నో ఒడుదొడుకులు, ఉద్యమాలతో పెనవేసుకుపోయిన రాజకీయ నాయకుల జీవితాలలో సాహిత్యం, కళలు అంతర్భాగమని అన్నారు. ఈ కార్యక్రమంలో ఇంతమంది రాజకీయ నాయకులు పాల్గొని సాహిత్య సమాలోచన చెయ్యడం చూడ ముచ్చటగా, సాహిత్య చరిత్రలో ఒక నూతన అధ్యాయంగా నమోదు అయ్యింది అన్నారు.
By December 03, 2021 at 09:05AM
No comments