దేశంలో చాపకింద నీరులా ఒమిక్రాన్.. నిన్న ఒక్క రోజే రికార్డుస్థాయిలో కేసులు

దేశంలో కొత్తరకం వేరియంట్ చాపకింద నీరులా వ్యాపిస్తోంది. రోజు రోజుకూ కొత్త కేసులు రెట్టింపు కావడం ఆందోళనకు గురిచేస్తోంది. సోమవారం ఒక్క రోజే దేశంలో కొత్తగా 135 ఒమిక్రాన్ కేసులు బయటపడ్డాయి. దేశంలో ఒక్క రోజు నమోదయిన అత్యధిక కేసులు ఇవే కావడం గమనార్హం. తాజా కేసులతో బాధితుల సంఖ్య 600 దాటింది. కొత్తగా మరో రెండు రాష్ట్రాల్లో ఒమిక్రాన్ కేసులు బయటపడ్డాయి. గోవా, మణిపూర్‌లో ఒక్కో కేసు నిర్ధారణ కావడంతో ఒమిక్రాన్ నమోదయిన రాష్ట్రాల సంఖ్య 20కి చేరింది. గోవాలో ఎనిమిదేళ్ల బాలుడికి ఒమిక్రాన్ నిర్ధారణ కాగా.. చిన్నారి ఇటీవలే యూకే నుంచి తండ్రితో కలిసి వచ్చాడు. మణిపూర్‌లో 48 ఏళ్ల వ్యక్తి టాంజానియా నుంచి వచ్చినట్టు అధికారులు తెలిపారు. దేశంలో మొత్తం ఒమిక్రాన్ కేసుల సంఖ్య 671కి చేరింది. వీటిలో 46 శాతం కేసులు ఢిల్లీ, మహారాష్ట్రలోనే ఉండగా.. గుజరాత్ (73), కేరళ (57) తర్వాతి స్థానాల్లో ఉన్నాయి. రాజధాని ఢిల్లీని కొత్త వేరియంట్‌ ఒమిక్రాన్ క్రమంగా చుట్టేస్తోంది. ఒమిక్రాన్ కేసులు అత్యధికంగా నమోదయిన రాష్ట్రాల జాబితాలో ఢిల్లీ రెండో స్థానంలో ఉంది. సోమవారం ఒక్క రోజే 63 కేసులు బయటపడ్డాయి. ఒక రోజు ముందు అక్కడ 79 కేసులే ఉండగా, ఇప్పుడవి 142కు పెరిగాయి. ఈనేపథ్యంలో సోమవారం నుంచి ఢిల్లీలో రాత్రి కర్ఫ్యూ మొదలైంది. కొవిడ్‌ ఆంక్షలు అమలవుతున్నా ప్రజలు పకడ్బందీగా పాటించడం లేదు. నిర్లక్ష్యంగా వ్యవహరించిన వారి నుంచి ఢిల్లీలో జరిమానా రూపంలో గరిష్ఠంగా రూ.1.50 కోట్ల వసూలు చేశారు. ఢిల్లీలో రోజువారీ కరోనా కేసులు కూడా సోమవారం ఏడు నెలల గరిష్ఠానికి పెరిగాయి. గత 24 గంటల్లో మొత్తం 331 కేసులు నమోదవగా, వీటిలో 142 ఒమైక్రాన్‌వే కావడం గమనార్హం. తాజా పరిణామాలతో మరోసారి ఢిల్లీలో ఎల్లో అలర్ట్‌ను జారీ చేసే అవకాశాలు ఉన్నాయి. ఇదే జరిగితే.. మాల్స్‌, రెస్టారెంట్లు, సినిమా హాళ్లు, స్పాలు, రవాణా సర్వీసులు, మెట్రో రైళ్లు, జిమ్‌ల కార్యకలాపాలపై మరోసారి ఆంక్షలు తప్పవు. అటు, ముంబైలో 809 కొత్త కేసులు నమోదయ్యాయి. ఒమిక్రాన్ కేసుల్లో మహారాష్ట్ర రెండో స్థానంలో ఉంది. అక్కడ ఇప్పటివరకు 167 మందికి ఒమిక్రాన్ నిర్ధారణ అయ్యింది. సోమవారం మహారాష్ట్రలో కొత్తగా 26 మందికి ఒమిక్రాన్ నిర్ధారణ కాగా.. ఒక్క ముంబయిలోనే 11 కేసులు ఉన్నాయి. గడచిన 24 గంటల్లో గుజరాత్‌ 24, తెలంగాణ 12, ఉత్తరాఖండ్ 3, రాజస్థాన్ 3, హరియాణా 2 ఒమిక్రాన్ కేసులు బయటపడ్డాయి.

By December 28, 2021 at 10:06AM

Read More https://telugu.samayam.com/latest-news/india-news/at-135-biggest-oneday-rise-in-omicron-cases-in-india/articleshow/88536493.cms