మహిళల లోదుస్తులే మాస్క్‌గా విమానం ఎక్కాడు.. తర్వాతే ఏమైందంటే?
కరోనా మహమ్మారి వ్యాప్తి నేపథ్యంలో విమానాలు, రైళ్లలో కఠినంగా అమలు చేస్తున్నారు. బోర్డింగ్‌ పాస్‌, కరోనా నెగెటివ్‌ రిపోర్ట్‌ చూపించిన తర్వాతే ప్రయాణికులను అనుమతిస్తున్నారు. ప్రయాణికులు విమానంలోకి ఎక్కిన తర్వాత ప్రతిఒక్కరు కొవిడ్‌ నిబంధలు పాటిస్తున్నారా? మాస్కులు ధరించారా? అని సిబ్బంది ఒకటికి రెండు సార్లు చెక్ చేస్తుంటారు. అయితే, ఓ విమానంలో ప్రయాణికుడు మహిళల అండర్‌వేర్‌ను మాస్కుగా ధరించడం చూసి క్యాబిన్ క్రూ విస్మయం చెందారు. ఇలా ఎందుకు చేశారని ప్రయాణికుడ్ని ప్రశ్నించగా.. అతడు చెప్పిన సమాధానం విని సిబ్బంది అవాక్కయ్యారు. దీంతో అతడిని విమానం నుంచి బలవంతంగా దింపేశారు. ఈ ఘటన అమెరికా ఫ్లోరిడాలోని ఫోర్ట్‌ లౌడెర్‌డేల్‌ విమానాశ్రయంలో చోటుచేసుకుంది. వాషింగ్టన్‌కు వెళ్లే విమానంలో ఆడమ్ జేన్ (38) అనే ప్రయాణికుడు మహిళల లోదుస్తు (థోంగ్‌)ను మాస్కుగా ధరించి తన సీట్లో కూర్చున్నాడు. ఇది గమనించిన విమాన సిబ్బంది దాన్ని తొలగించి మాస్కును ధరించాలని కోరగా జేన్ అందుకు ససేమిరా అన్నాడు. దీంతో సిబ్బంది అతడిని విమానంలో నుంచి దించేశారు. దీనికి సంబంధించిన వీడియో ఇప్పుడు సోషల్ మీడియాలో వైరల్ అవుతోంది. ఆడమ్ జేన్ చేష్టలపై చర్యలు తీసుకున్న ఎయిర్లైన్స్ సంస్థ.. నిబంధనలను ఉల్లంఘించాడని పేర్కొంటూ నిషేధం విధించింది. దీనిపై ఆడమ్ జేన్ మాట్లాడుతూ.. విమానంలో తినేప్పుడు, తాగేటప్పుడు కూడా మాస్కును ధరించాలని సిబ్బంది సూచిస్తున్నారని.. దానికి నిరసనగా తాను ఈ పని చేశానని తెలిపారు. ‘నిరసన తెలిపేందుకు ఇదే ఉత్తమమైన మార్గంగా భావించా’ అని జేన్ పేర్కొన్నాడు. అంతేకాదు, గతంలో ఓ విమానంలో తాను ఇలాగే ప్రయాణించానని, అది మాస్కులా పనిచేస్తుందని సిబ్బంది తనను ఏం అనలేదని చెప్పడం గమనార్హం. యునైటెడ్ ఎయిర్లైన్స్ విమానాల నుంచి తనను నిషేధించారని, గతంలో ఇదే పని చేసినందుకు డెల్టా ఎయిర్లైన్స్ విమానం నుంచి తనను తొలగించారని అతను చెప్పాడు. అయితే, జేన్‌ను విమానం నుంచి దింపడంపై తోటి ప్రయాణికులు అభ్యంతరం చెప్పారు. పలువురు అతడి వెనుక లేచి వెళ్లేందుకు సిద్ధపడ్డారు. యునైటెడ్ ఎయిర్‌లైన్ వెబ్‌సైట్ ప్రకారం.. మాస్క్‌లు నోరు, ముక్కును పూర్తిగా కప్పి ఉంచగలగాలి.. జేన్ మాత్రం తన లోదుస్తులు మాస్క్‌గా ధరించాడు.
By December 18, 2021 at 09:26AM
No comments