అనుమతిలేకుండా పాదాలే కాదు మహిళ బాడీలో ఏ పార్ట్ తాకినా నేరమే: బాంబే హైకోర్టు
మహిళ అనుమతి లేకుండా ఆమె పాదాలనే కాదు.. శరీరంలోని ఓ భాగాన్ని తాకినా.. ఆమె ప్రతిష్ఠకు, గౌరవానికి భంగం కలిగించడమేనని స్పష్టం చేసింది. ఈ మేరకు నిందితుడ్ని దోషిగా పరిగణిస్తూ కింది కోర్టు ఇచ్చిన తీర్పును సమర్ధించింది. తాను మహిళ పాదాలను మాత్రమే తాకానని పేర్కొంటూ కింది కోర్టు విధించిన శిక్షను రద్దుచేయాలని నిందితుడు బాంబే హైకోర్టులో పిటిషన్ దాఖలు చేశాడు. దీనిపై విచారణ చేపట్టిన ఔరంగాబాద్ ధర్మాసనం న్యాయమూర్తి జస్టిస్ ఎంజీ సెవ్లికర్.. అతడి పిటిషన్‌ను తోసిపుచ్చారు. కేసు వివరాల్లోకి వెళితే.. మహారాష్ట్రలోని జాల్నా జిల్లా పర్టూర్ పట్టణానికి చెందిన మహిళ.. నిందితుడు తన భర్త లేని సమయంలో అర్ధరాత్రి వేళ ఇంటికొచ్చి పాదాలను తాకాడని 2014 జులైలో పోలీసులకు ఫిర్యాదు చేసింది. నిందితుడు ఇంట్లోకి ప్రవేశించిన సమయంలో నాయనమ్మ, తాను మాత్రమే ఉన్నామని తెలిపింది. ఆ రోజు సాయంత్రం నీ భర్త ఎప్పుడొస్తాడని అడిగిన నిందితుడు.. రాత్రి 11 గంటల ప్రాంతంలో ఇంటిలోకి వచ్చాడు. నిద్రలో ఉండగా తన పాదాలను తాకడంతో మెలకువ వచ్చిందని, లేచిచూసేసరికి పక్కంటి వ్యక్తి కూర్చుని ఉన్నాడని తెలిపింది. ఆమె ఫిర్యాదు ఆధారంగా కేసు నమోదుచేసిన పోలీసులు.. పక్కంటి వ్యక్తిని అదుపులోకి తీసుకున్నారు. అయితే, ఆ సమయంలో ఆమె ఇంటిలోకివెళ్లింది తాను కాదని నిందితుడు బుకాయించాడు. తర్వాత మాత్రం లోపలి నుంచి తలుపు గడియ పెట్టకపోవడంతో ఇంటిలోకి రావడానికి ఆమె సమ్మతించిందని వాదించాడు. అయితే, తాను లైంగిక ఉద్దేశంతో ఆమె పాదాలను తాకలేదని, ఘటన జరిగిన 12 గంటల తర్వాత ఫిర్యాదు చేయడం ఏంటని అభ్యంతరం తెలిపాడు. దీనిపై విచారణ చేపట్టిన జల్నా సెషన్స్ కోర్టు నిందితుడ్ని దోషిగా నిర్ధారించింది. అర్ధరాత్రి బాధితురాలి ఇంటిలోకి ప్రవేశించి, పాదాలను తాకడం చూస్తుంటే లైంగిక ఉద్దేశంతో ఆ పనిచేసినట్టు అర్ధమవుతోందని పేర్కొంది. దీంతో అతడికి ఏడాది పాటు జైలు శిక్షను విధించింది. మహిళ అనుమతి లేకుండా పాదాలే కాదు శరీరంలోని ఏ భాగాన్ని తాకినా గౌరవానికి భంగం కలిగించినట్టేనని అభిప్రాయపడింది. దీనిని నిందితుడు బాంబే హైకోర్టులో సవాల్ చేయగా.. దిగువ కోర్టు తీర్పును సమర్ధించింది. ఈ సందర్భంగా 1996లో సుప్రీంకోర్టు ఇచ్చిన తీర్పును ఉదహరించింది.
By December 29, 2021 at 10:37AM
No comments