WhatsApp సెప్టెంబరులో 22 లక్షల భారతీయ ఖాతాలను బ్యాన్ చేసిన వాట్సాప్!
సెప్టెంబరులో 2.2 మిలియన్ల భారతీయుల ఖాతాలను వాట్సాప్ నిలిపివేసినట్టు కంప్లియన్స్ నివేదిక వెల్లడించింది. 2.2 మిలియన్లకుపైగా భారతీయ ఖాతాలను వాట్సాప్ నిషేధించగా.. దీని ద్వారా 560 ఫిర్యాదుల నివేదికలు అందాయి. సోమవారం విడుదల చేసిన నివేదిక ప్రకారం.. సెప్టెంబరులో 2,209,000 ఖాతాలను నిలిపివేసినట్టు వాట్సాప్ తెలిపింది. భారతీయ ఖాతాలను మొబైల్ నెంబరు ముందున్న ‘+91’ఆధారంగా గుర్తించినట్టు పేర్కొన్నారు. ‘ఎండ్-టు-ఎండ్ ఎన్‌క్రిప్టెడ్ మెసేజింగ్ సర్వీస్‌లలో దుర్వినియోగాన్ని నిరోధించడంలో వాట్సాప్ అగ్రగామిగా ఉంది.. అనేక సంవత్సరాలుగా మా ప్లాట్‌ఫారమ్‌లో వినియోగదారుల గోప్యత, భద్రత కోసం ఆర్టిఫిషియల్ ఇంటెలిజెన్స్, ఇతర అత్యాధునిక సాంకేతిక పరిజ్ఞానం, డేటా శాస్త్రవేత్తలు, నిపుణులు, ప్రక్రియలలో స్థిరమైన దృష్టిసారించాం’ అని వాట్సాప్ అధికార ప్రతినిధి అన్నారు. భారత ప్రభుత్వం తీసుకొచ్చిన ఐటీ నిబంధనలు 2021 ప్రకారం సెప్టెంబరు 1 నుంచి 30 మధ్య కాలంలో నాలుగో నెల నివేదికను వాట్సాప్ వెలువరించింది. ‘ఈ వినియోగదారుల భద్రతా నివేదికలో వినియోగదారుల నుంచి స్వీకరించిన ఫిర్యాదుల వివరాలు, WhatsApp తీసుకున్న సంబంధిత చర్యలు.. మా ప్లాట్‌ఫామ్‌లో దుర్వినియోగాన్ని అడ్డుకోడానికి స్వంత నివారణ చర్యలు ఉన్నాయి’ అని పేర్కొన్నారు. ఆటోమేటెడ్ లేదా స్పామ్‌ను అనధికారికంగా ఉపయోగించడం వల్ల 95 శాతానికిపైగా ఖాతాలపై నిషేధం విధించినట్లు ఫేస్‌బుక్ యాజమాన్యం గతంలో పేర్కొంది. WhatsApp తన ప్లాట్‌ఫారమ్‌లో దుర్వినియోగాన్ని నిరోధించడానికి నిషేధించిన ప్రపంచ సగటు ఖాతాల సంఖ్య నెలకు 8 మిలియన్లు. తాజా నివేదికలో సెప్టెంబర్‌లో 560 ఫిర్యాదు అందాయని వీటిలో 121 అకౌంట్ సపోర్ట్, 309 బ్యాన్ అప్పీల్, 49 ప్రోడక్ట్ సపోర్ట్, మరో 32 సెఫ్టీకి సంబంధించినవి తెలిపింది. సెప్టెంబరులో వచ్చిన ఫిర్యాదుల ఆధారంగా 51 ఖాతాలపై చర్యలు తీసుకున్నట్టు వివరించింది. ‘అకౌంట్ యాక్షన్డ్’ రిపోర్టుల ఆధారంగా తీసుకున్న పరిష్కార చర్యలను సూచిస్తుందని వాట్సాప్ వివరించింది. చర్య తీసుకోవడం అనేది ఒక ఖాతాను నిషేధించడం లేదా ఫిర్యాదు ఫలితంగా గతంలో నిషేధించిన ఖాతాను పునరుద్ధరించడాన్ని సూచిస్తుంది.
By November 02, 2021 at 09:09AM
No comments